بنگه‌هێ لالش پیرۆزباهیێ ل میرێ نوو یێ ئێزدیان دكت
-كارێن مه‌زن ل پێشیا میرێ ئێزدیا نه
ده‌سته‌یا بلندا بنگه‌هێ لالش یێ ره‌وشه‌نبیری و جڤاكی گه‌رمترین و جوانترین پیرۆزباهیان پێشكێشی سه‌ماحه‌تا میر حازم ته‌حسین به‌گ دكت ب هه‌لكه‌فتا دانانا وی وه‌ك میرێ نوو یێ ئێزدیان ل كوردستان و عێراق و جیهانێ و هیڤیا سه‌ركه‌فتنێ بۆ دخوازین.
ئه‌م دووپات دكه‌ین كو دێ مل بملێ سه‌ماحه‌تا وی بین،ژبۆ خزمه‌تكرنا ئێزدیاتیێ،ئه‌م دبینن كو ئه‌ركێن مه‌زن ل پێشیا سه‌ماحه‌تا میرێ نوونه، و ب هه‌ڤكاری و راوێژیا لایه‌نێن په‌یوه‌ندیدار دێ ئاسته‌نگ و ڤێ ره‌وشا ئێزدی تێدا دژین ژبه‌ر ده‌ست بسه‌رداگرتنا هۆڤانه یا گرۆپێ داعش بۆ سه‌ر شنگالا بریندار ده‌رباز بكت.
ئه‌م سوپاسی و پێزانینێن خۆ ئاراسته‌ی ته‌ڤ پێكۆلێن خێرخوازان دكه‌ین چ ژ ئێزدیان یان ژ كوردستانێ و ل پێشیێ سه‌رۆك مه‌سعود بارزانی كو ب راسپارده و ئامۆژگاریێن وی یێن پر به‌ها هه‌ڤكار بوون بۆ ئێكلاكرنا پرسا هه‌لبژارتنا كه‌سایه‌تیا میرێ نوو،ژبه‌ركو پرسا هه‌لبژارتنا میری وه‌خته‌كی درێژ ڤه‌كێشا،چنكو ئه‌رك و ده‌ستكه‌فتی هه‌نه كو پێتڤیه سه‌ره‌ده‌ری لگه‌ل بێته كرن ل ته‌ڤ ئاستێن ئێزدیان و غه‌یری ئێزدیان.
دووباره پیرۆزباهیێ ل سه‌ماحه‌تا میر حازم ته‌حسین به‌گ دكه‌ین،هه‌روه‌سا پیرۆزباهیێ ل بنه‌مالا میرا ئێك ب ئێك دكه‌ین بۆ ڤێ پێنگاڤێ و رێككه‌فتنا هه‌لبژارتنا كه‌سایه‌تیا میرێ نوو،ته‌كه‌ز دكه‌ین كو ب رێیا ئێكگرتن و به‌رچاڤ وه‌رگرتنا بیر و بۆچۆنێن جیاواز و هزرێن حه‌كیمانه،ته‌ڤ ئاسته‌نگ و به‌ربه‌ست نامینن.
ده‌سته‌یا بلندا بنگه‌هێ لالش یێ ره‌وشه‌نبیری و جڤاكی/دهۆك
27/7/2019
تُتاح هذه الصورة أيضا في: کوردی
