سه‌رۆك بارزانى:ب مه‌ره‌م ژماره‌كا زێده یا ده‌نگێن پارتی هاتینه سۆتن ب تایبه‌ت ده‌نگێن كه‌مپان و یێن خوشك و برایێن ئێزدی
WAAR-دهۆك:
سه‌رۆك بارزانی پێشوازی ل بالیۆزێ ئه‌مریكا ل ئیراقێ و شاندا دگه‌ل دا كر و دووپات ژی كر: یاكو بۆ هه‌رێما كوردستانێ گرنگ پێدڤییه ئالیێن سیاسی پێگیربوونا خوه ب سێ پره‌نسیپان دیاربكه‌ن، ئه‌و ژی هه‌ڤپشكی و ته‌وافوق و هه‌ڤسه‌نگی د بیاڤێن جودا یێن حوكمرانیێ دا.
د كۆمبوونا د ناڤبه‌را سه‌رۆك بارزانی و دۆگلاس سیلیمان بالیۆزێ ئه‌مریكا ل ئیراقێ و شاندا دگه‌ل دا، وی به‌رپرسێ ئه‌مریكی ئاشكه‌را كر: وه‌لاتێ وی دخوازیت هه‌رێما كوردستانێ بهێز بیت و رۆله‌كێ كاریگه‌ر د پرۆسه‌یا سیاسی یا ئیراقێ دا هه‌بیت.
هه‌ر د كۆمبوونێ دا هه‌ردو ئالیان بووچون ل دۆر داوی پێشهاتێن سیاسی و ده‌ركه‌فتنا هه‌ڤكێشه‌یێن نوو ل ئیراقێ و قوناغا پشتی هه‌لبژارتنان و بزاڤێن پێكئینانا حكومه‌تێ لهه‌ڤ گۆهارتن و لدۆر پرۆسه‌یا هه‌لبژارتنان و ئه‌نجامان، بارزانی ب شاندا مێڤان را گۆت: گه‌له‌ك تێبینی ل سه‌ر رۆلێ كۆمسیۆنێ و ب رێڤه‌برنا پرۆسه‌یا هه‌لبژارتنان و ده‌ستكاری ئه‌نجام و سه‌خته‌كاریان هه‌بوو و دا زانین ژی: پارتی چ نوونه‌ر د كۆمسیۆنا هه‌لبژارتنان دا نه‌بوون، لێ ب مه‌ره‌م ژماره‌كا زێده یا ده‌نگێن پارتی هاتینه سۆتن ب تایبه‌ت ده‌نگێن كه‌مپان و یێن خوشك و برایێن ئێزدی.
د درێژه‌یا ئاخڤتنێن خوه دا، سه‌رۆك بارزانی دووپات كر: پارتی ژ بۆ نه‌هێلانا گۆمان و پاقژیا پرۆسه‌یێ، ب هه‌می رێكاران رازیبوویه ئه‌گه‌ر دوباره‌كرنا هه‌لبژارتنان ژی بیت، به‌لێ بزاڤێن یاریكرنێ ب ئه‌نجامان و هه‌لوه‌شاندنا ده‌نگێن پێشمه‌رگه‌ی ب چ ئاوایه‌كی ناهێن قه‌بوولكرن و تنێ ژ بۆ مه‌ره‌مێن سیاسی ئه‌و كاره دهێت كرن.
خویا ژی كر:كاركرن بۆ هه‌لوه‌شاندنا ده‌نگێن پێشمه‌رگه‌ی ئاماژه‌یه‌كا مه‌ترسیداره و كاركرنه بۆ هه‌لوه‌شاندنا پاشه‌رۆژ و چاره‌نڤیسێ كوردستانێ، له‌ورا ب چ ئاوایه‌كی ل هه‌مبه‌ر وێ بریارا زالمانه نا راوه‌ستین.
تُتاح هذه الصورة أيضا في: کوردی
