شێخ شامۆ: پەرلەمانێ كوردستانێ دێ بریارێ لسەر جینۆساید ناساندنا كەیسا ئێزدیان ل شنگال دەت
تۆرا لالش یا راگەهاندنێ/تایبەت
نوونەرێ ئێزدیا ل پەرلەمانێ كوردستانێ ئاشكەرا كر كو پرۆژێ بریارا ناساندنا كارەساتا شنگالێ وەكو جینۆساید،بۆ سەرۆکاتیا پەرلەمانێ كوردستانێ هاتیە رەوانەكرن و پێشكێشكرن.
“شێخ شامۆ” نوونەرێ كوردێن ئێزدی و ئەندامێ پەرلەمانێ كوردستانێ بۆ(تۆرا لالش یا راگەهاندنی)ئاشكەراكر:”پشتی كارەساتا شنگالێ سێ جاران ب هەولدانێن بەردەوام مە پرۆژە یاسا بەرهەڤكریە و پێشكێشكریە،لێ دوی سەردەمی دا ژبەر گرنگی نەدانا سەرۆکێ پەرلەمانی ب ڤێ کەیسێ و ئالۆزیێن دناڤبەرا لایەنێن سیاسی دا ئەڤ پرۆژە دهاتە سەكناندن هەتا كو پەرلەمان ژ كاركەفتی ،نهۆ پەرلەمان دەست بكاربوویە و ب سوپاسی ڤە ب هەڤكاریا پرانیا ئەندامێن پەرلەمانی هەموو فراكسیۆنان پرۆژە هاتیە ئامادەكرن و پێشكێشكرن بۆ سەرۆكاتیا پەرلەمانی و دی كەفتە دبەرنامێ كاری دا و بریار لسەر ئێتە دان”.
لدۆر ناڤەرۆكا پرۆژەی”شێخ شامۆ” راگەهاند:”پرۆژە ژ هەفت بەندا پێك هاتیە و تێدا هاتیە ناساندنا كارەساتێ وەك جینۆساید،هەروەسا خالەكا دی دا حكوومەتا عێراقێ ئاگەهدار دكەت كو ئەو ژی وێ بریارێ ب جینۆساید بدەنە قەبوولكرن و داخوازێ ژ بەغدا و پەرلەمانێ عێراقێ دكە ببتە ئەندام د دادگەها تاوانێن نێڤ دەولەتی یا لاهای دا،داكو لسەر ئاستێ نێڤ دەولەتی بریار لسەر ڤی كەیسی بێتە دان،زێدەباری داخوازا قەرەبووكرنا زەرەر و زیانا ب خەلكێ كەفتی ژ حكوومەتا هەرێما كوردستانێ و عێراقێ ،هەروەسا ب فەرمیكرنا رۆژا كارەساتا شنگال لسەر ئاستێ كوردستانێ وەك رۆژا كیمیا بارانكرنا هەلەبچە”.
نوونەرێ كوردێن ئێزدی زێدەتر گۆت:”بارێ مەغدووری و زەرەر و زیانا ب جڤاكێ ئێزدی كەفتی ل شنگالێ بارەكی گەلەك گرانە و دشیانا حكوومەتا هەرێما كوردستانێ دا نینە ڤی باری ب تنێ هەلگرە”.
دیسان شێخی دا خویاکرن کو ئەڤ پرۆژە ژلایێ بەرێزان “د. وعدی سلیمان مزوری” و”خالیدە خەلیل رەشۆ”راوێژكارێن پەرلەمانێ كوردستانێ هاتیە بەرهەڤكرن و پرانیا ئەندامێن پەرلەمانی و ب دەمێ كەفتە بەرنامێ كاری دا وبریار لسەر دئێتە دان دێ دانپێدان ب كارەساتا ئێزدیان ئێتە كرن وەكو جینۆساید،و دیسان دگەل پرۆژەی دۆسەیەكا پتر ژ هەزار لاپەران دڤان دووسال وونیڤێن بۆری دا كو ئەو بەلگە و كارێ پێتڤی یێن پێ رابووین كۆمكرینە لگەل پرۆژەی وەك بەلگە بۆ وێ زەرەر و زیانا ب جڤاكێ ئێزدیا كەفتی.
ل 3ئابا 2014ێ رێكخراوا داعش دەست بسەر قەزا شنگالێ دا گرت و تاوانێن دژی مرۆڤایەتیێ دەرهەقێ خەلكێ وێ ئەنجام دان،بگرە ژ كوشتن و گرتن وسەبیكرن و دەربەدەركرن و ئاوارەیی و كۆچبەری و وێرانكرنێ،هەتا نهۆ لسەر ئاستێ نێڤ دەولەتی چەندین وەلاتان كەیسا ئێزدیان ل شنگال ب جینۆساید دایە ناساندن.
تُتاح هذه الصورة أيضا في: کوردی
