پێكڤەژیان دناڤبەرا پێكهاتێن شنگالێ دا بهێز و مكوم بوویە
تۆرا لالش:
شنگال جیێ پێكڤەژیانا هەموو ئاین و پێكهاتە و نەتەوان بوویە و ئۆلێن ئێزدی و موسلمان مەسیحی دناڤ دا ب ئارامی و ئاشتی ب هەڤرا دژین،رۆژ بۆ رۆژێ پێكڤەژیان بتر بهێز مكوم دبت،وەلاتیەك ژی دبێژت:رێزگرتنەكا مەزن دناڤبەرا ئۆلێن شنگالێ دا هەیە و ب گیانەكێ براینی پێكڤە دژین.
عادل سەبری،گەنجەكێ ئێزدیێ خەلكێ شنگالێ یە بۆ رۆژناما دەنگێ لالش دیاركر،پێكڤەژیان نیشانا سەركەفتنا مللەتانە و هەر ژ كەڤندا و ژ سەردەمێ باب و كالان ژی شنگال جیێ پێكڤەژیانا هەموو ئاین و نەتەوان بوو ب ئارامی و تێگەهشتن و بێ جوداهی دگەل ئێك دا دژین، ئەڤ چەندە ژی جیێ دلخۆشی و هیڤی و پاراستنا جڤاكا شنگالێ یە، داكو پێكڤەژیان یە بەردەوام بت پێتڤیە لسەر حكومەتان و رێكخراوێن مرۆڤی باوەریێ دناڤ جڤاكی دا پەیدا بكن و پشتەڤانیا گەنجان بكن ژ ئالیێ ئاشتی و ڤیانێ و هاریكاریكرنا هەڤدوو.
هەروەسا عەباس حسێن،گەنجەكێ كوردێ موسلمانە و خەلكێ شنگالێ یە بۆ رۆژناما دەنگێ لالش دبێژت:ئەڤە بترە ژ سالەكێ خێزان و كەسوكارێن وی زڤرینە سەر جهـ و وارێن خۆ ل شنگالێ و ژیانا وان ب شێوەكێ باش و ئارام ب رێڤە دچت و چ ئاستەنگ و ئاریشێن جڤاكی و ئاینی بۆ وان پەیدا نەبووینە، ئەڤەژی ئارمانجان زێدە دكت ژبۆ گەشەكرنا شنگالەكا بهێز و پاراستی بتر رێبێن ساخلەمتر بۆ جڤاكەكێ ساخلەم بكاربینین.
ستیڤن یوحەنا،گەنجەكێ مەسیحیێ شنگالێ یە بۆ رۆژناما دەنگێ لالش گۆت:پیكڤەژیان یا بوویە ئەرك لسەر ملێن مرۆڤان و چ وەلات ب ئێك نەتەوە و ئێك ئاین ناژین و دەڤەرا شنگالێ ب تێكەلبوونا هەموو ئاینان و نەتەوا پێك هاتیە،ئەڤە ژی وێ دگەهینت كو خەلكێ دەڤەرا مە ب شێوەیەكێ ئارام و ئاشتی ب هەڤرا دژین، و موسلمان و ئێزدی و مەسیحی …هتد رێزگرتنەكا مەزن ژ هەڤ دوو دگرن ئەڤە ژی وەلاتی بەرەف ژیانەكا باشتر و ب ئاڤاكرنێ دبەت و رێزێ ل هەلكەفت و جەژن و بیرەوەریێن ئێك و دوو دگرن و هەر ئۆل و نەتەوەیەك هندەك بنەمایێن هەڤ قبولكرنێ دناڤ دا هەنە و ب رێیێن زانستی و مرۆڤایەتی پەیرەو دكن و لسەر یەك ئاخ و جوگرافیەت ژیانێ بەردەوام دكن و شنگال دئێتە هژمارتن وەك ئێك ژوان دەڤەرێن ناڤدار ب پێكڤەژیانێ.
ژبال خۆڤە رۆژنامەڤان هەڤاڵ عەبدوللە كو موسلمانە بۆ رۆژناما دەنگێ لالش دبێژت:ژبۆ گەشەكرنا پێكڤەژیانێ ل شنگالێ یا گرنگە ئیدارا شەرعی بزڤرتە شنگالێ و هەموو پێكهاتێن شنگالێ بێ جوداهی بێنە قەرەبووكرن،نۆكە پێكڤەژیان ل ناڤ خەلكێ شنگالێ دا ب هەموو پێكهاتێن دەڤەرێ ڤە یا بەردەوامە و خەلكێ شنگالێ ئاشتیخوازن وەكو خوشك و برا پێكڤە دژین و رۆژ بو رۆژێ پێكڤەژیان بهێزتر دبت،هەروەسا ل ناڤا كەمپان دا ل سنوورێ پارێزگەها دهۆكێ خیڤەتێن ئاوارێن ئێزدی و موسلمان د پێكڤەنە كەواتە برایەتی دناڤ شنگالیا دا یا بەردەوامە، ئەم هیڤی دكن خەلكێ مە ڤەگەرنە سەر جیێ باب و كالان و دەست ب ئاڤاكرنا شنگال بكن و هەر كەسەكێ دەستدرێژی و زوڵم و زۆرداری لسەر برایێن مە یێن ئێزدی كربت جیێ وان كەسان ل ناڤا جڤاكا شنگالێ دا نینە.
تُتاح هذه الصورة أيضا في: کوردی
