سەنتەرێ ڤەكۆلینان ل زانكۆیا دهۆكێ پرۆژەیەك لسەر فرمانێن ئێزدیان بەرهەڤكریە
تۆرا لالش:
ڤەكۆلەرێ مێژوویا ئێزدیان و هاریكارێ سەرۆكێ سەنتەرێ ڤەكۆلینێن جینۆسایدێ ل زانكۆیا دهۆكێ راگەهاند،چەندین پرۆژە لسەر جێنوسایدا ئێزدیان لبەردەستن و ژوان ژی دنۆكەدا ل سەنتەرێ ڤەكۆلینێن جێنوسایدێ ل زانكۆیا دهۆكێ مژوولی پرۆژەیەكی نە كو گەلەك بواران بخۆڤە دگرت،ئەو ژی لسەر فرمانێن بسەرێ ئێزدیان دا هاتین و نێزیكی (1500)ژێدەرێن مێژوویی بخۆ ڤە دگرت.
داود موراد خەتاری،ڤەكۆلەرێ مێژوویا ئێزدیان و هاریكارێ سەرۆكێ سەنتەرێ ڤەكۆلینێن جینۆسایدێ ل زانكۆیا دهۆكێ بۆ رۆژناما دەنگێ لالش دیاركر،هەر ژ رۆژا ئێكێ یا فرمانا ئێزدیان ل سالا (2014)ێ‌َ و هەتا ئیرۆ ب پێنوسێ خۆ د خزمەتا مللەتێ خۆدا بوویمە،ژبەركو ئەگەر ئەم مێژوویا خۆ نەنڤیسین و دۆزا خۆ ب رێڤە نەبەین بیانی وەكی مە بڤێت ب رێڤە نابەن، و كارێن وی كرین گەهشتیە ئەنجامەكێ باش و دنۆكەدا دئێنە وەرگێران بۆ زمانێ ئەلمانی و ئینگلیزی،هەروەسا بەریا دوو هەیڤ و نیڤان كەریم خان سەرۆكێ دەستەیا ڤەكۆلینا نێڤ دەولەتی روونشتنەك بۆ ماوێ(45)خۆلەكان دەربارەی مێژوو و دۆزا ئێزدیان دگەل وی ئەنجام دا و نێزیكی سێ هەزار لاپەرێن گرێدایی فرمانا(2014)ێ و دگەل (400) ڤیدیۆیان رادەستی وی كرن و گەلەك كەیفخۆشبوو و گۆت دێ كار لسەر جێنوساید ناساندنا فرمانێ كەین.
خەتاری گۆت:هەتا نهۆ(36)پەرتۆك چاپكرینە و یا (37)ێ كو ناڤەرۆكا وێ گرێدایی فرمانا (74)ێ‌َ یا جینۆسایدا ئێزدیانە ئەوا ل تەباخا (2014)ێ لسەر دەستێ رێكخراوا تیرۆرستیا داعشێ هاتیە ئەنجام دان ل شنگالێ و پەرتۆك ل وەلاتێ ئەلمانیا د قۆناغا چاپكرنێ دایە،زێدەباری گەلەك پەرتۆكێن نەچاپكری هەنە و ئەگەر هاریكاریا وی بێتەكرن ئەو ژی دێ ئێنە چاپكرن و خەمێ ل مێژوو و دۆزا ئێزدیان دخۆم ژبەركو گەلەك رۆژ و فرمانێن رەش بسەر مەدا هاتینە و كارتێكرن ل كەسایەتیا تاكێ ئێزدی كریە،ئێزدی ئاینەكێ سروشتی یە لەورا مللەتێن دۆرماندۆری مە بزاڤێن ژناڤبرن و كوشتن و حەلاندنا ئاینێ مەكریە و ئەڤ چەندە بتر مە پالڤەددەت مێژوویا ئێزدیان بنڤیسن و بپارێزن ژ حەلاندن و ژناڤچۆنێ،چنكو چەند مێژوویا ئێزدیان بێتە نڤیسین هەر یا كێمە ژبەركو گەلەك بتر ژوێ یا مە نڤیسی بسەرێ مە هاتیە،لەورا داخوازێ ژ مێژوونڤیسێن ئێزدیان دكەم ئەو ژێدەرێن كەفتینە دناڤ بەرپەرێن مێژوویا نڤیسی یا ئێزدیان دا بكارنەئینن بەلكو ل وان ژێدەران بگەرن یێن نەهاتینە نڤیسن داكو بكەڤنە دناڤ مێژوویا ئێزدیان دا و هەروەسان ب رژدی ژی كاربكن و ژێدەران پشتراست بكن،داكو زنجیرەیا خەلەكێن مێژوویا ئێزدیان هەڤدوو تەمام بكن.
ڤەكۆلەری ئەو یەك ژی ئاشكەراكر،چەندین پرۆژەیێن دی لسەر جێنوسایدا ئێزدیان لبەردەستێ منن و ژوان ژی دنۆكەدا ل سەنتەرێ ڤەكۆلینێن جێنوسایدێ ل زانكۆیا دهۆكێ مژوولی پرۆژەیەكی نە كو گەلەك بواران بخۆڤە دگرت،ئەو ژی لسەر وان فرمانێن بسەرێ ئێزدیان دا هاتین و نێزیكی (1500)ژێدەرێن مێژوویی یێن رووسی و ئەرمەنی و ئنگلیزی و بەهرا بتر ئۆسمانی نە، لێ ئەڤ پرۆژە دێ ڤەكێشت.
هەروەسا دیاركر،بتریا نڤیسین و گۆتنێن د مێژوویێ دا هاتین د راستن، و مێژوو خۆ دووبارە دكت و ئەو تاكێ مفایی ژ رابردوویێ خۆ نەبینت نكارت پلانا ئاڤاكرنا خۆ ژبۆ ژیان و پاشەرۆژێ بدانت، و گرنگە گەنجێن ئێزدی مفایی ژ تۆرێن كۆمەلایەتی وەرگرن و وەختێ زێدە پێ دەربازنەكن داكو بكارن خۆ ئاڤاكەن و ببن ئاڤاكەرێن جڤاكێ خۆ،دیسان گەلەكا گرنگە مێژوویا ژیانا باب و كالان كۆم بكەین و ڤەكۆلینێ لسەر بكەین داكو ئەم ژی وەكو هەموو مللەتێن جیهانێ بزانین بەری نۆكە چ بسەرێ مەهاتیە،و داكو بزانین پاشەرۆژا مە دێ چ لێ ئێت و د نها دا ئەڤ كارە لسەر مللێن گەنجان دكەڤت ژبەركو ئەم مێژوونڤیسێن هەردەما ئەم نەماین د ژیانێ دە پێنووسێ مە ژی دێ ژكاركەفت و ئێدی كارناكەت،لەوا پێتڤیە گەنج بەرپرسیارەتیا خۆ یا مێژوویی هەلبگرن و هەڤركیێ دگەل نەخۆشیێن ژیانێ بكن ژبەركو ژیان وەسایە نفش ژبۆ نڤشی دئێتە گهۆرین.
داود موراد خەتاری ل سالا(1964)ێ ل گوندێ خەتارێ ژدایكبوویە،خووندنا خۆ یا سەرەتایی و ناڤنجی و ئامادەیی هەر ل خەتارێ ب داوی ئانی یە،ل سالا (2006)ێ باوەرناما بەكالۆریوسێ ل كولیژا پەروەردێ پشكا مێژوویێ ل زانكۆیا مووسل وەرگرتیە و ل سالا(2013)ێ باوەرناما ماستەرێ ل زانكۆیا مووسل لژێر ناڤێ (الصراع بین ولایتی الموصل ودیاربكر حول جزیرە بوتان وشنكال فی الوپائق العپمانیە ١٨٤٢-١٨٤٨) وەرگرتیە و بنگەهێ لالش یێ رەوشەنبیری و كۆمەلایەتی پرۆژێ وی لسەر ئەركێ خۆ ل سالا(2015)ێ چاپكریە.
تُتاح هذه الصورة أيضا في: کوردی
