بنگه‌هێ لالش: عێراقی ل دژى گه‌نده‌ليێ خۆپيشاندانا دكن نه كو ل دژی مافێن ده‌ستوورى يێن پێكهاتا و هه‌رێما كوردستانێ
ب گرنگ ته‌ماشه‌ى خۆپيشاندانێن ل بتريا ده‌ڤه‌رێن عێراقێ هاتينه كرن دكه‌ين كو ژماره‌كا زۆر يا گه‌لێ عێراقێ داخوازا مافێ خۆ و نه‌هێلانا گه‌نده‌ليێ كرن كو ئاليێن ديار دابه‌شكرينه و دراڤ دزينه.
ئه‌م لگه‌ل خۆپيشاندانێن ئاشتى و داخوازێن خۆپيشانده‌ران يێن ره‌وانه،هه‌ر كرياره‌كا كوشتن و ده‌سته‌سه‌ركرنێ ل دژى خۆپيشانده‌رێن سڤيل و چالاكڤانان ئيدانه دكه‌ين،هه‌روه‌سا ده‌ستدرێژيكرنێ لسه‌ر كه‌لوپه‌لێن گشتى و تايبه‌ت و هێزێن ئێمناهيێ ره‌ت دكه‌ين.
هه‌روه‌سا ته‌كه‌ز دكه‌ين كو خۆپيشانده‌رێن عێراقى يێن رژياينه سه‌ر جاده و گۆره‌پانان بۆ داخوازكرنا بچووكترين مافێن خۆ وه‌ك دابينكرنا خزمه‌تگۆزاريان و ده‌ليڤێن كارى و به‌لاڤكرنا سامانان ب شێوه‌كى دادپه‌روه‌رانه و نه‌هێلانه گه‌نده‌ل و گه‌نده‌لچيان،نه‌ك گهۆرينا ده‌ستوورێ ئتيحادى يێ عێراقێ، و دژى مافێن پێكهاتێن ئايينى و نه‌ته‌وه‌ى و مافێن ده‌ستوورى يێن هه‌رێما كوردستانێ نينن.
ئه‌م وه‌ك كه‌مينه‌يه‌كا ئايينى،چوو خێراتێن عێراقێ يێن نوو بده‌ست مه ڤه نه‌هاتينه بتنێ پۆستێن پشتگۆ هاڤێتى نه‌بت،هه‌روه‌سا كاره‌سات و نه‌خۆشيێن عێراقێ يێن نوو به‌ر مه كه‌فتينه ئه‌و ژى تاوانا كۆمكوژيا بكۆم دژى خه‌لكێ مه ل شنگال،كو بترى 6هه‌زار ئێزدى هاتنه كوشتن و گرتن و نيڤا وان هێش بێ سه‌ر و شوونن،لگه‌ل كۆچكرنا دۆرێن 100 هه‌زار ئێزدى بۆ ئه‌ورۆپا و ئوستراليا و ئه‌مريكا كو هێش يا به‌رده‌وامه.
دوێ باوه‌ر‌يێ داینه كو كوردستان په‌ناگه‌ها ئێكێ و داويێ يه بۆ پێكهاتێن ئايينى و نه‌ته‌وه‌ى كو لبن سيبه‌را ئالا و سه‌ركردايه‌تيا وێ يا حه‌كيمانه پاراستى بين،ئه‌م هۆشداريێ دده‌ين مافێ مه وه‌ك كه‌مينه يان مافێن ده‌ستوورى يێن هه‌رێما كوردستانێ بێنه خوارن،و قه‌بوول ناكه‌ين بێ ده‌نگيا خوه‌نيشانده‌ران ب ده‌رفه‌ت بێته ديتن لسه‌ر سياسيێن گه‌نده‌لچى ل عێراقێ و قوتێ وان بێته خوارن،كو زيانێ بگه‌هينته مافێن هه‌رێما كوردستانێ كو چ ب شێوه‌كى راسته‌وخۆ يان نه راسته‌وخۆ بت مافێ مه‌يه.
ده‌سته‌يا بلندا بنگه‌هێ لالش يێ ره‌وشه‌نبيرى و كۆمه‌لايه‌تى/دهۆك
3/11/2019
تُتاح هذه الصورة أيضا في: کوردی
