كچ و ژنێن ئاوارێن ئێزدی داهاتەكی ئابووری بۆ خێزانێن خۆ پەیداكریە
تۆرا لالش یا راگەهاندنێ
سەرەرای ئاوارەبوونێ و ژیانا د خیڤەت و كەمپان دا،كاركرنا كچ و ژنێن ئاوارێن ئێزدی دچەندین بوارێن بازرگانی دا بەرەف زێدەبوونێ یە بۆ هاریكاری و پەیداكرنا داهاتەكی ئابووری بۆ خێزانێن خۆ،ڤێ پێنگاڤێ بسەركەفتیانە ل قەلەم ددەن و هیچ جێوازیێ دناڤبەرا ژنێ و زەلامی دا نابینن.
(عەمشە موراد) كارێ درینیێ ل كەمپا شاریا دكت بۆ رۆژناما دەنگێ لالش دبێژت: سەرەرای ئاوارەبوونێ ژنێ ژی ماف هەیە وەكی زەلامان كار بكن،ژبەر كاودانێت من یێن ئابووری لاوازن لەورا ب شەڤ و رۆژ كار دكەم بۆ خودانكرنا خێزانا خۆ و سەرباری كارێن رۆژانە یێن ناڤ مالێ و زارۆكێن خۆ هەر دەمەكی ڤالا هەبت هەولددەم كارێ درینیێ بكەم ل درینگەهەكا دی.
ژلایەكی دی ڤە (باسمە) كوافێرە بۆ رۆژناما دەنگێ لالش دیاركر، ل جڤاكی دا هندەك كار هەنە پێتڤی ب ژنێ هەیە و تایبەتی ب ژنان ڤە گرێدایە داكو دوی بواری دا كار بكت وەكو جوانكاریان،لەورا من بفەر دیت كارەكی بڤی شێوەی بكەم و گرنگیێ بدەمێ و ئەڤە چەندین سالە ڤی كاری دكەم و باوەرنامە ژ رێكخراوا (iom) وەرگرتیە و ل چەند جیان كاركریە و كاریە هاریكاریا خێزانا خۆ بكەم و داهاتەكی بۆ پەیدا بكەم.
هەروەسا(جانێ) كچەكە كارێ فرۆتنا جلكێن ژنان دكت بۆ رۆژناما دەنگێ لالش گۆت:فەرە ئیرۆ ژن رابتە سەر لنگان و كار بكت ژبۆ بدەستڤەئینانا هیڤی وئارمانجێن خۆ و چ جێوازی دناڤبەرا ژنێ و زەلامان دا نینە ژبۆ كاركرنێ، جڤاكا ئێزدی ئیرۆ ماف دایە ژنێ ل گەلەك بواران دا كار بكت،ژ ئالیێ ئابووری ڤە بڤی كاری هاریكاریا خێزانا خۆ كریە و داهاتەك بۆ ژیانا خۆ یا رۆژانە پەیداكریە.
هەر لسەر كاركرنا ژنان چالاكڤانا كچ (لەیلا سەیدۆ) بۆ رۆژناما دەنگێ لالش خویاكر،كاركرنا ژنان دبوارێ بازرگانی دا پێنگاڤەكا سەركەفتیە و بتر باوەریا وێ زێدە دكت،زێدەباری پێكئینانا پەیوندیێن جڤاكی وكێمكرنا بێزاریا وێ یا رۆژانە و دبتە ئەگەرێ هندێ كو ژن بخۆ كارێ خۆ ب رێڤەببەت بسەر بلندی و دبتە باشكرنا ژیانا ئابووری یا خێزانی،ئەڤە بخۆ ژی دبتە جۆرەك ژ جۆرێن ئازادیێ كو جڤاكێ ئێزدی دایە ژنێ.
تُتاح هذه الصورة أيضا في: کوردی
