ئێزدیاتی د هۆنەرێ ژیانێ دا
جوان عزەت 
ژیان، ئەو پێگەهە لسەر پیڤەرێن هەبوونێ دئێتە سەكناندن، نەخاسمە دناڤ جڤاك و مللەتێن جودا جودا دا ژیانێ سەنگ و بەهایێ خۆ یێ زانستی هەیە، لێ مللەتێ مە وەكو كورد هەتا نهۆ نكاریە هەبوونێ بدەت ئاستێ ژیانێ،چنكو ئەم ب دروستی لسەر بنەما و پیڤەرێن وێ نەسەكنینە،بتنێ هەتا رادەیەكی ئەم هەست پێ دكەین كو ژیان ب تنێ واتەیەك سادەیە و رۆژانە ب شێوەیەكی سروشتی سەرەدەردكەین،بەلێ ل ڤێدەرێ پرسیارا كو ئاراستەی هزرا مە دبت،گەلۆ جڤاكێ كوردی و ئێزدی چاوان د واتەیا ژیانێ گەهشتینە، یان چاوان كارینە پێناسەیەكێ بدەن ژیانێ، كو ئەو ژیان لگۆر ئاستێ وان یێ زانستی و هۆنەری نەهاتبتە گونجاندن؟،دیارە هەتا نهۆ گەلێ كورد و ب تایبەتی ئێزدی نكاریە ژیانێ ژ خۆ را بكن میتۆدەك سەركەفتی و نێزیكی پراكتیزەكرنا وێ میتۆدێ ببن، چنكو هەردەم بێ پلان و ستراتیژی سەرەدەریێ دگەل بوویەر و ئاستەنگان دا كریە،لەورا نە مرۆڤەك بهێز و خۆراگر ئاڤابوویە، نە ژی جڤاكەك ستاندەر ب ئاستێ ئەتیك و پرەنسیپان هاتیە ئافراندن، ژبەر هندێ یا كو بوویە سەدەمێ تێكدانا رەوشا مللەتی چارەسەرنەكرنا زانست و هۆنەرێ ژیانێ بوویە،وەكو هایدگەر دبێژت:(مرۆڤ درێیا نەبوونێ دا، دكارت بەرەف رێیا هەبوونێ بچت)، واتە ئەگەر ئەم هەست پێ بكەین كو مە هەبوون نینە هینگی گرنگە ئەم ل رێیێن چارەسەریێ بگەرین،هەتا ئەم نەگەرین ب هزرا من ئەم نكارین واتەیا تشتان ژی ببینین،لسەر ڤێ رێكخستێ مرۆڤ چاوان دكارت ببتە خودان هێمایەك هەبوونی؟ كا چاوان مرۆڤ رۆژانە كار بۆ بدەستڤەئینانا پێتڤیێن ژیانێ دكت،گرنگە مرۆڤ بەردەوام كار بۆ ناسكرنا خۆ ژی بكت،خۆ ناسكرن نە تشتەك ئاسانە،كو هەردەما مە ڤیا ئەم دكارین لسەر رێیا وێ ژیانێ بمەشینن، نەخێر، بەلكو ناسكرن سەرپێهات، ئەزموون و ئەقلێ مرۆڤی یە،ژبەر ڤێ چەندێ هێشا ئەم لسەر وی ئەساسێ كو ژیان ل مە بگەرت دیار نەبووینە، بەلكو ئەم ژیانێ وەك لێگەریان بەرجەستە ژی ناكن،ئەها كێشەیا كو مە ئاراستەی پرس و ئاستەنگان دكت ل ڤێدەرێ خویایە،چنكو بەرگریگرنا مە بۆ هۆنەرێ ژیانێ نەگەهشتیە ئاستێ بلنداهیا ڤەكۆلینێن سەردەمی، بەلكو ئەم د مەزهەرێ گەردوونی دا بووینە خودان هێزەك ئاراستەكری،ئەنجام:لسەر ئاستێ جڤاكی ئێزدی ژی هەتا نهۆ ئێزدیاتی ژ هێلا ئاشووپی دەربازی هێلا تەیووری و هۆنەرێ ژیانێ نە بوویە،چنكو ئەو د دیرۆكەكا تراژیدی دا ژیایە و سەر هەبوونا وان كارەساتان بەردەوامی دایە پێنگاڤێن ژیانێ، بەلێ ل ڤێدەرێ تشتێ سەیر ئەوە، هەتا نهۆ نكاریە وان تراژیدیان ژی وەكو هزر پێناسە بكت،لەورا لگۆر هزرا جڤاكی، ئابووری و سیاسی هەتا رادەیەكی جڤاكەك دووری شیانێن ئاڤابوونێ یە، بەلێ ئەگەر هزر د هێزا مەعریفی دا بكت، ئەز باوەرم ئەو دێ كارت جڤاكەكی ساخلەم بنگەهین ئاڤاكت.
تُتاح هذه الصورة أيضا في: کوردی
