هەڤژینیا پێش وەخت دیاردە و نەریتەكی جڤاكی
ئەمین شەمۆ 
مرۆڤ بونەوەرەك خوداییە وەكی هەر بونەوەرەكی دیتر لسەر روویێ ئەردی ،دیارە تاكە رێیا درێژەپێدانا مرۆڤ و زێدەبوونا وی و بەردەوامیدان ب ژیانێ لسەر روویێ ئەردی ب رێیا جۆتبوونێ هەڤژینیێ یە دناڤبەرا هەردوو رەگەزێن نێر و مێ دا،لێ بەلێ ئەڤێ جۆتبوونێ ل هەر جڤاكەكی دا چەندین رێ و بنەما و نەریتێن خۆ هەنە،دیارە دجڤاكێ ئێزدی ژی دا جۆتبوونێ هندەك بنەما و پێگیری و یاسایێن خۆ هەنە وەكو تەمەن و هەستكرن ب بەرپرسیارەتیێ …هتد،ئەگەر ئەم بەرێ خۆ بدەینە جڤاكێ ئێزدی لڤان هەر سێ چار سالێن بۆری دا دێ بینین هەڤژینیا پێش وەخت دناڤبەرا كچ و كوران دا ب شێوەیەكی هەری بەرچاڤ زێدەبوویە و گەهشتیە ئاستەكی ترسناك و بتریا خوەندەڤان و رەوشەنبیرێن ئێزدیان ڤێ دیاردێ ب دیاردەكا ترسناك و كارەكی نە رەوا ل قەلەم ددەن،ئەگەر ئەم دووڤچۆنەكێ لسەر ئەگەرێن ڤێ دیاردێ بكەین دێ بینین ڤێ پرۆسێسا هەڤژینیێ چەندین ئەگەرێن خۆ هەنە لناڤ جڤاكێ مەدە وەكو هەبوونا بێكاریەكا زۆر لناڤ گەنجان دا و نەبوونا رەوشەنبیریەكا گشتی ل جەم گەنجان دیسان دەیك و باب و سەمیانێن ڤان جۆرە كەسان ب ئەركێ خۆ رانابن وەكو ئیدارەكرنا مالێ ب شێوەیەكی دورست،هەردیسان هەبوونا حەزێن توخمی (جنسی) ل جەم گەنجان ئێكە ژئەگەرێن دیتر و سەرەرای چەندین ئەگەرێن دی، هەر وەكو یا دیار ئەڤ دیاردە بتر دناڤ كچ و كور و كۆمەلگەهێ مەیێ خەلكێ شنگال یێن دناڤ كەمپان دا دژین هەیە بتر ژ خەلكێ وەلات شێخ و دەڤەرا هەوێریا و باشیك و بەحزانێ دا،چنكو ئەڤ دیاردە دیاردەكا نێگەتیڤە و نەشارستانیە بێگۆمان دەرئەنجامێن وێ ژی دێ دخراب و مەترسیداربن لەورا دبینین دەرئەنجام و لێكەفتێن وێ ژی دمەترسیدارن ژبۆی پێشەرۆژ و ئایندێ مللەتێ ئێزدی ژوان دەرئەنجامێن خراب یێن ڤێ دیاردێ وەكو هەبوونا كێشێن جڤاكی بۆ نموونە كێشێن خێزانی و ژێكڤەبوونا ژن و مێران (تەلاق) دان و قوربانیكرنا هندەك كەسان بۆ نموونە زارۆك و ژدەستدانا دەیك و بابان ژلایێ وان زارۆكان ڤە و گەلەك دەرئەنجامێن دی یێن خراب كو كارتێكرنەكا راستەوخۆ لسەر پێشەرۆژا مللەتێ ئێزدی هەیە،ئەڤێ دیاردێ پێتڤی ب چەندین رێیان هەیە تا وەكو ئەڤ دیاردە كێم و لاواز ببت و نەمینت،ژوان رێكاران دەیك و باب ب رۆلێ خۆ یێ سەرەكی رابن دناڤ خێزانێ دا وەكو ئیدارەكرنا مالێ كۆنترۆلكرن لسەر زارۆكێن خۆ كو كارێن خراب ئەنجام نەدەن و بەلاڤبوونا رەوشەنبیریەكا گشتی دەربارەی ڤێ دیاردێ و ڤەكرنا خۆل و سمینار و كۆر و كۆمبوونا دەرئەنجام و لێكەفتێن وێ یێن خراب.
تُتاح هذه الصورة أيضا في: کوردی
