پیرۆزیا كانیا بیرەخایێ
حەیدەر عەرەبۆ یوسڤانی
هەلبەت لناڤ هەموو مللەتێن جیهانێ دا، جی ، ئاقد ، و ناڤێن پیرۆز هەنە و جیێ خۆ لناڤ ئایین و جڤاكا وان دا گرتینە،ئێزدی وەك مللەتەكی كەڤن پیرۆزی دایە گەلەك تشتێن سروشتی و ئاسایی و ب چاڤەكی مەزن تەماشە دكن،لێ كانیا بیرەخایێ پیرۆزیەكا تایبەت ل جەم خەلكێ شنگالێ هەیە ، ئەڤ كانی دكەفتە گەلیێ كەرسێ ل باكوورێ چیایێ شنگالێ ل نێزیك كەلەهۆشگا كۆلكا،كانیەكا ئاڤ زەلال و تام خۆشە،لڤێدەرێ پرسیار تێتە كرن،پیرۆزیا ڤێ كانیێ چاوا جیێ خۆ لناڤ خەلكێ شنگالێ دا گرتیە؟ دبێژن:دەمێ شیخادی ژ شامێ هاتی و ب تایبەت ژ گوندێ بەعلەبەك ژبۆ لالشا نوورانێ ل گەلیێ كەرسێ را دەرباز بوو، و ل جەم ڤێ كانیێ لگەل جۆقەتا خۆ بێهنا خۆڤەدان و هندەك ژ ئاڤا ڤێ كانیێ ڤەخوارن و دەست و چاڤێ خۆ پێ هەمبێزكرن،لێ بۆ زانین بەری شیخادی بێتە سەر ڤێ كانیێ ناڤێ وێ كانیا (گۆلاڤا) بوو، وەكو ل درۆزا خاسا تێتە دیاركرن بڤی رەنگی(و مەندێ مال ئاڤا ، و كانیا گۆلاڤا ، و دیوانا بەرێ شبایكێ …كەی)،لێ پشتی شیخادی دوعا لێكری ناڤێ وێ كرە كانیا بیرەخایێ و هەتا نهۆ خەلكێ وێ دەڤەرا ناڤبری ب ئاڤەكا پیرۆز دبینن و خەلكێ وێ دەڤەرێ هۆسا هزر دكن كو ئاڤا ڤێ كانیێ دەرمانە بۆ گەلەك نەخۆشیا،بۆ زانین ژیانا بەرێ هەموو لسەر ئاڤا كانیا بوو هەر جیێ ئاڤ لێ نەبا ژیان لێ نەدبوو،بەلێ ئاڤ ڤەخوارنا خەلكێ گوندێ كۆلكا و سمێ هێستر و دۆرماندۆری وێ بوو هەموو ژ ڤێ كانیێ بوو ،هەروەسا چاندنی لبەر دكرن وەك تووتن و باغ و بستان و ژبەر پیرۆزیا ئاڤا ڤێ كانیێ هۆزا فەقیرا ل وێ دەڤەرێ خەرقەیا خۆ پێ جوان دكن و مۆر دكن،هەروەسا گەلەك نیشانگەه ل دۆرماندۆری ڤێ كانیێ هەنە ، وەك قوبا شیخادی( ژبەر هاتنا وێ بۆ وێ دەڤەرێ خەلكێ شنگالێ بفەر دیت قوبەكا وێ ل وێدەرێ چێ بكن و ل سالا١٩٩٥ هاتە چێكرن)،و مەزارێ خەرقە و خەزینا خەرقە و گەلیێ هارونێ و كەلەهۆشگا كۆلكا و كەفرێ حنگالا و كەفرێ گەلۆ و گەلەك دارێن زرگوزا لدۆرا ڤێ كانیێ هەنە،هەر بۆ زانین ئاڤا ڤێ كانیێ ب هەزاران خەلكێ دەڤەرێ و شنگالێ ژ تێنیبوونێ قورتالكرن دەما رێكخراوا تیرۆرستیا داعشێ هێرشی قەزا شنگال كری و خەلك ئاوارەی باكوورێ چیایێ شنگالێ بووین.
تُتاح هذه الصورة أيضا في: کوردی
