هەڤژینیا پێش وەخت بوویە دیاردەكا مەترسیدار
سەردار داود
هەر وەكو یا خویایە ل جیهانێ هەموویێ هەڤژینی مافەكی رەوایێ هەر تاكە كەسەكی یە و بتریا خەلكێ هەڤژینیێ پێك دئینن ژبلی هندەك حالەتێن گرێدایی ب كارێن ئایینی و پەروەستەبوونێ ڤە،لێ وەكو تێتە زانین دڤێت هزرەكا باش بۆ ڤێ پێنگاڤێ بێتەكرن بەری بێتە ئەنجام دان و هەر ژمێژدا و هەتا نهۆ دیاردەكا هەرا خراب دناڤ جڤاكان دا یا هەی و ب تایبەت دناڤ جڤاكا ئێزدی دا ئەو ژی هەڤژینیا پێش وەختە و ژلایێ هەردوو رەگەزا ڤە یا هەی و ب تایبەت رەگەزێ مێ و گەلەك خووندنا ئاماژە ب كارتێكرنێن وێ كرینە ژئالیێ جڤاكی و ساخلەمی و پەروەردێ و گەلەك ئالیێن ژیانێ،گەلەك جاران كور و كچەك وێ ژیانا هەڤژینیێ پێك ئینن و تەمەنێ هەردوویان ژ(18)سالان كێمترا لێ ل وی دەمی چ تشتی ژ رێڤەبرنا ژیانا هەڤژینیێ نزانن و تووشی گەلەك ئاریشان دبن ب تایبەت كچ دەمێ ل وی تەمەنێ كچك ل دەمێ زارۆكبوونێ دا گەلەك جاران نێزیكی مرنێ دبت ژ ژنەكا ئاسایی دا،هەروەسا كچا تەمەن كێمتر ژ(18)سالی مەترسیا تووشبوونێ زێدەترە بۆ نەخۆشیا ئایدزێ ژبەر نەبوونا دانوستاندنێ بۆ ئەنجام دانا جۆتبوونەكا ب سەلامەت و زێدە رووبروی توندوتیژیا خێزانی دبن ژ كچەكا تەمەن مەزن،لێ شووكرنا پێش وەخت ژئالیێ كۆمەلایەتی و ئایینی و كەلتۆری ل گەلەك ژ كۆمەلگەهێن عێراقێ دا دهاتە ئەنجام دان و ب تایبەت ل ڤی بارودۆخێ شەر و ئاوارەی و پەنابەریبوونێ دا ب جۆرەك ژ جۆرێن كاریگەر هەبوو لسەر كچێن هەرزەكار،هەروەسا دەمێ كور ل تەمەنێ كێمتر ژ هەژدە سالی ژنێ دئینن چ ژبارێ خێزانداریێ نزانت پشتی چەند سالان دیسا هەول ددەت ژنەكا دی بینت ئەو خێزان تووشی گەلەك ئاریشان دبن،دیسا دەمێ دوو كەس هەڤژینیێ پێك دئینن ل وی دەمی وەختێ كچ كێمتر بت ژڤی تەمەنی و تەمەنێ كوری مەزنتر بت و ب تایبەت دەمێ رەڤاندنێ مالا كچكێ نە یارازی گەلەك ئاریشە چێدبن دناڤبەرا هەردوو مالان دا و گەلەك جاران دگەهتە وێ چەندێ كۆ مالا كچكێ سكالایێ تۆماربكن ل دادگەهێ لسەر كوركی،ئەڤ حالەت و گەلەك حالەتێن دی دروست دبن و ژبەر ئەو كور و كچ گەلەك ژی هزرەكێ ل دەمەكی كورت دا دكن و ل پاشەرۆژێ هەردوو باش ل ئێك و دوو ناگەهن و ئەنجامێن خراب و مەترسیدار تێنەبەر وەكو بەردان و خۆكوشتن و ئەنجام دانا كارێن نە ئاسایی و كارتێكرنەكا نەیا جوان لسەر كەسایەتیا هەردوویان دئێتەكرن و پۆشمان دبن و ل داویێ سەركەفتنێ ل ژیانا هەڤژینیێ دا نائینن،هەڤژینیا پێش وەخت ل جڤاكا مەدا بوویە دیاردەكا بەربەلاڤ دناڤبەرا كچ و كوران دا ئانكو كێَمتر ژ تەمەنێ لسەری دیاركری گەلەك ژ كچ و كورێن جڤاكێ هەڤژینیێ دكن و خێزانێ پێك دئینن و زارۆك ژ وان را پەیدادبن،دڤی تەمەنێ كچك دا ئەڤە ئاریشەكا گەلەك مەزنە دناڤ جڤاكان دا چنكو ژ بنیات چێنابت ل تەمەنێ سنێلەیێ دا هەردوو رەگەز هەڤژینیێ بكن و دڤێت تەمەنێ وان ل پێ یاسا و رێنمایێن مەدەنی و جڤاكی بتر ژ هژدە سالان بت،ئەگەرێن هەڤژینیا پێش وەخت چنە ؟ پەروەردەكرنا نەباش ژلایێ دەیك و بابان ڤە و ئامۆژگاری نەكرن ل كچ و كورێن خۆ،جڤاك ژی بەرپرسە ژ ڤی كارێ خراب چنكو خەلك و جڤاك بڤی جۆرێ هەڤژینیێ ب تایبەت ژلایێ كوران ڤە خۆ پێ سەر بلند دبینن ئەڤ بابەت بوویە بابەتەكی گەلەك بەرفرەه و بەربەلاڤ ب تایبەت دناڤ جڤاكێ مە دا و دڤێت بێتە چارەسەركرن،ئەركە لسەر حكومەتێ و رێكخراوێن جڤاكێ سڤیل ب رۆلێ خۆ رابن هەمبەر گەنجان ب رێیا قوتابخانێ و خووندنگەها و هەردەم بزاڤێ بكن گەنجا هشیاربكن ل مەترسی و خرابیا هەڤژینیا پێش وەخت و كارتێكرنا وێ لسەر ژیان و پاشەرۆژا وان.
تُتاح هذه الصورة أيضا في: کوردی
