قوتابیێن ئێزدی دناڤبەرا بەردەوامیدان و بجهێلانا خووندنێ ل زانكۆیان
ئاراز خدر خەتاری
لسەر وێ چەندێ را كو قوتابیێن ئێزدی بەردەوام پشكێن باش ل زانكۆیان چ ل كولیژان یان ژی ل پەیمانگەهان بدەستخۆڤە دئینن و هەروەسا ل وان پشكان ژی سەركەفتنەكا گەلەك مەزن و نمرەیێن گەلەكێن باش وەردگرن،بەلێ دڤی دەمی دا بەردەوام قوتابیێن ئێزدی هزر ل بجهێلانا خووندنێ دكن،ئەگەرێ ڤێ چەندێ ژی دزڤرت بۆ وێ یەكێ كو قوتابیێن ئێزدی بەردەوام خۆ بێ پشتەڤان دبینن و چ كەس و لایان ب ئاستێ پێتڤی هاریكاریێ پێشكێشی وان ناكت هەتا كو ب ئاستێ پێتڤی پشتەڤانی ژی نائێتە كرن دماوێ وان چەند سالێن خووندنێ ل زانكۆیێ هەتا كو بكارن بەردەوامیێ ب خووندنا خۆ بدەن،هەروەسا نەبوونا دامەزراندنێ پشتی خووندنێ ب داوی دئینن ل زانكۆیان،ئەڤ چەندە ژی بەردەوام كارتێكرنەكا نەرێنی لسەر ئاستێ وان یێ خووندنێ دكت و دبتە ئەگەر قوتابی حەز و ڤیان ژبۆ خووندنێ نەمینن،ژێدەرێن مێژوویی ئەو چەندە دیاركریە كو قوتابیێن ئێزدی بەردەوام بزاڤ و پشكداری كرینە دئاڤاكرنا عێراقێ ب شێوەیەكی گشتی و هەرێما كوردستانێ ب شێوەیەكی تایبەتی و بەردەوام هزر ل پێشكەفتنێ كریە و هەتا ئاستەكی گەلەكی باش كارینە بگەهنە وان ئارمانجێن خۆ لسەر وێ چەندێ ژی را ژیانەكا ب زەحمەت دبۆراندن،بەلێ لسەر وێ ژیانا ب زەحمەت را ئەوا بۆراندین و ئەوا دبۆرینن بەردەوام بووینە لسەر خووندنا خۆ و دەست ژێ بەرنەداینە،پشتی جینۆسایدا بسەرێ ئێزدیان هاتی ب شێوەیەكی گشتی و خەلكێ دەڤەرا شنگال ب شێوەیەكی تایبەتی لسەر دەستێ رێكخراوا داعش یا تیرۆرستی و نەبوونا ئارامیەكا پێتڤی ل دەڤەرێن ئێزدیان و ب تایبەتی ژی دەڤەرا شنگال و ئاوارەبوونا خەلكێ وێ دەڤەرێ و دەوروبەرێن وێ،هەروەسا نەبوونا خزمەتكاریان ل وان دەڤەران وا بوویە رێگر و ئاستەنگ درێیا ڤەگەریانا ئێزدیان بۆ وێ دەڤەرا ئەوا باب و كالێن وان لێ ژیاین و قوربانیێن مەزن لێ داین و نەچاركرینە دكەمپان و خانیێن كاڤل دا بژین و د سەرمایا زڤستانێ و دگەرما هاڤینێ دا ل وان جیان ژیانا خۆ ب زەحمەتی ب بۆرینن،ئەڤێ چەندێ ژی كارتێكرنەكا نەرێنی یا خراب لسەر قوتابیێن وان دەڤەران كریە و هەروەسا قوتابیێن وان دەڤەران نەچاركرینە ئێك ژڤان دوو هەلبژارتنان بخۆ هەلبژێرن یا ئێكێ ژی بەردەوامیدان ب خووندنێ و ب رێڤەبرنا ژیانەكا ب زەحمەت،یا دووێ ژی بجهێلانا خووندنێ و كرنا كارەكی هەتا كو بكارن ژیانا خۆ ب شێوەیەكی باشتر ژ نهۆ ب رێڤەببەن.
تُتاح هذه الصورة أيضا في: کوردی
