برینا شنگالێ هەردەم یاساخە د دلێ مەدا
دلۆڤان ئەمجەد بارزانی
كارەساتا شنگالێ ئەوا ل (3/8/2014)ێ بسەرێ كوردێن ئێزدی دا هاتی كو كارەساتەك ، تاوانەك بوو هەتا نهۆ ژی د هزرا چ مرۆڤان دا نەبوو،تاوانەكا هندا مەزن بەرامبەری دیانەتەك،نەتەوەكا كچك یا هەرێما كوردستانێ بێتەكرن ، كو ئەو ژی كوردێن ئێزدی نە، هەروەسا یا ژ هەموویێ گرنگتر كوردێن رەسەنن،ئەگەر ئەم بچینە سەر ئەسل و ئەساسێ كوردان دێ دیرۆك بۆ مە دیاركت كو ژ ئێزدیاتیێ یا هاتی،لەوما دڤێت رێز ل هەبوونا وان بێتە گرتن.
ئەڤە چار سال بسەر كارەساتا شنگالێ دا دەربازبوون ، كو ب درندەترین و داخبارترین كارەساتا بسەرێ مللەتێ مە یێ ئێزدی دا هاتی، بێشك ژی ئەڤ برینا كور چ جارا د دل و هزرا مەدا دەرناكەڤت دێ هەر مینت برینەكا كور،چنكو چ جارا ل پێش چاڤێن مە ناچت ئەڤ تاوانا دژی مرۆڤایەتیێ،هێرشا دەولەتا ئیسلامی یا بناڤێ ” داعش ” بۆ سەر شنگالێ و ب درندەترین كارەسات دئێتە هژمارتن كو دڤان سالا دا هاتینەكرن ،دڤی دەمی دا جیهان دبلندیا پێشكەفتن و پێشڤەچۆنان دا بوو،لێ مخابن ئەڤ هۆڤ و درندە بناڤێ ئیسلامێ هاتن و ئەو بخۆ ژی دوور و دژی ئیسلامێ بوون،هەولدان ناڤێ ئیسلامێ ژی كێم بكن و ئەم هەموو دزانین كا كویلێت دەستێ كێ بوون و چ دەولەت بوون، هەر ل دەستپێكا هاتنا وان بۆ كوردستانێ بوو،چنكو هاتن و هەولا هەموو دەولەتێن جیران و ئەوێن دی یێن رۆژهەلاتا ناڤەراست ژناڤبرن و قركرنا كوردانە ب ئێكجاری،ئەگەر ب وان بت یێ كورد بت لسەر روویێ ئەردی نامینت بەس هزر و بیرێن وان د بەتال و فاشلن،چنكو كورد چ جاران خلاس نابن هندی دنیا ژی هەبت كورد دێ هەر هەبن، لێ وان ڤێجارێ كوردێن مە یێن ئێزدی كرنە ئارمانج وان دڤیا نەهێلن و ب تەمامی ژناڤ ببەن بتنێ ژبەر هندێ كو كوردن و ئێزدینە، بێشك ژی ئەڤا بسەرێ كوردێن ئێزدی دا هاتیەكرن جینۆسایدە،ئەگەر ئەم بەحسێ هێرشا لسەر شنگالێ بكەین دڤێت بێژین جینۆسایدكرنا كوردێن ئێزدی ژلایێ دەولەتا ئیسلامی ڤە یا ب ناڤێ ” داعش”، ب راستی ئەو تشتێ ئەم كوردستانی هەموو ئیشاندین و برینداركرین كو هندی د ژیانێ دابین ئەڤ برینە د دلێ مەدا ساخ نابت دێ هەر یا ئازریایی و كووربت ئەو ژی برنا كچ و ژنێن كوردێن مە یێن ئێزدی بوون،ژبلی كوشتن و ژناڤبرنا چەندین زەلام و زارۆیان ب ساخی بن ئاخكرن و ب درندەترین شێوە ئەشكەنجەدان ،ب زۆری ئایینێ ئیسلامێ بسەردا دسەپاند،هەتا وی رادەی ئەو كەسێ نەببا موسلمان دكوشتن و سەر ژێدكرن،هەروەسا ب زۆری و زۆرداریێ شەهدە پێ دئینا و نڤێژ پێ دكرن،گهۆرینا دیانەتەكی ب دارێ زۆرێ ب راستی ئەو بخۆ ژی كارەساتەكا گەلەكا مەزنە د دیرۆكا جیهانێ دا،هەروەسا چەندین هەزار زارۆك و گەنج و پیر د چیایێ شنگالێ دا مان بێ نان و ئاڤ ژ برسان و ترسان و تێنیبوونێ دا مرن و بوونە قوربانی، هەتا هێزێن پێشمەرگێن قارەمان گەهشتینێ و رزگاركرین، لەوما پێڤیە لسەر مە كو بەحسا كارەساتا شنگالێ دكەین قارەمانی و مەردایەتیا پێشمەرگا ژبیرنەكەین كو وان هەموو هەولێن خودان بۆ ئازادكرنا كوردێن ئێزدی ئەوێن ل چیایی دا ماین و كارین ب زووترین دەم وان رزگار بكن ب هەر رەنگەكی هەبت.
هەروەسا دڤێت ئەم خەلكێ هەرێما كوردستانێ ب گشتی و كوردێن ئێزدی ب تایبەتی هەردەم سوپاسیا دەڤەرا بادینان و خەلكێ دهۆكێ و دەوروبەر بكەین و چ جاران باشی و ئەركێ وانێ مرۆڤایەتیێ ژبیرنەكەین،چنكو وان ب هەموو رەنگان دەرگەهێت مالێن خۆ و دلێ خۆ بۆ ئاوارێن شنگالێ و دەوروبەران ڤەكرن و هەروەسا دەرگەهێت خاندنگەهان و مزگەفتان ژی هاتنە ڤەكرن، زۆرا ب زەحمەتە راستی مللەتەكی لسەر ئاخا وان وەلاتێ وان زێدێ باب و باپیرێن وان دەربەدەر بكن و ل مال و حالێ وان بكەنە دەرێ و مال و ملكێ وان تالان بكن،یا ژ هەموویێ نەخۆشتر دناڤ وەلاتێ خۆ دا ببنە ئاوارە و ئەو بخۆ خودانێت ڤی وەلاتی و ئاخێ بن،ئەز بخۆ سەرێ رێز و تەقدیرێ و بەژنا خۆ دچەمینم بۆ هەموو خێزانێن سەربلندێن شەهید و قوربانیێن كارەساتا شنگالێ،بۆ وان هەموو خەباتكار و قەهرەمانا و هەموو پێشمەرگا و شەرڤانا ئەڤێن كو هەموو هەولێن خۆدایی و شەڤ و رۆژێن خۆ كرینە ئێك بۆ رزگاركرنا كەس و كارێن مە یێن ئێزدی،ئەڤان كوردبوونا خۆ سەلماند ،كورد هەموو ئێكن بێ جوداهیا ئایین و نەتەوە ، ئەم هەموو دڤێ كوردستانێ دا وەكی برایان بووینە و دێ هەر مینین برا ژی،سەر شۆری و شەرمەزاری ژی دێ هەر بەهرا دوژمن و نەحەز و نەیارێن كوردستانێ بت.
تُتاح هذه الصورة أيضا في: کوردی
