بنگه‌هێ لالش دێ چاره‌مين سالڤه‌گه‌را ته‌ڤكوژيا گوندێ كۆچۆ ساخ كت
باسنيوز:
به‌رپرسێ بنگه‌هێ لالش یێ ره‌وشه‌نبیرى و كۆمه‌لایه‌تى، ل سنۆنێ، دیاركر، کو چواره‌مێن سالڤه‌گه‌را كاره‌ساتا گۆندى كۆچو دێ ل رۆژا 15/8 ب چه‌ندێن چالاكیێن جۆدا هێته ساخكرن خه‌لكێ كۆچو 15 رۆژان پشتى كاره‌ساتا شنگال ماینه دوورپیچ كرى ژلایێ تیرۆرستێن داعش ڤه حكومه‌تا عێراقى هیچ هه‌ڤكاریا خه‌لكێ گۆندى نه‌كرن بهێنه رزگاركرن.
د. سلیمان فانۆ، به‌رپرسێ بنگه‌هێ لالش یێ ره‌وشه‌نبیرى و كۆمه‌لایه‌تى ل سنۆنێ بۆ (باسنیوز)، دیاركر: “چواره‌مێن سالڤه‌گه‌را كاره‌ساتا گۆندى كۆچو دێ ب چه‌ندێن چالاكیێن هه‌مه جۆر هێته ساخكرن ئه‌ڤ سالا دێ ل كۆمه‌لگه‌ها شاریا سنۆرى پارێزگه‌ها دهۆكێ بنگه‌هى لالش سالڤه‌گه‌را كۆچو ساخ كه‌ت، دێ سالڤه‌گه‌را كاره‌ساتا گۆندێ كۆچو دا داخاز ژ حكومه‌تا عێراقى هێته كرن بێده‌نگ نه‌مینت و هه‌ڤكاریا حكومه‌تا هه‌رێما كوردستانێ بكه‌ت بۆ ڤه‌كرنا گۆرێن بكۆم و جینوسایدا ناساندنا كاره‌ساتا شنگال و قه‌ره‌بوو كرنا خه‌لكێ لیقه‌ومایى یێن شنگال و رزگاركرنا ره‌ڤاندیێن ئێزدى”.
ئیدریس بشار سلو، ئیك ژ رزگاربوویێن گۆندێ كۆچو بۆ (باسنیوز)، دیاركر، کو ل رۆژا 15/8/ 2014تیرۆرستێن داعش ده‌ست ب سه‌ر گۆندى كۆچو دا گرت دماوى شه‌ڤ ورۆژه‌كێ دا تیرۆرستان 1740 كه‌سێن ئێزدى ژ گۆندى كۆچو ده‌سته‌سه‌ركرن هه‌تا نوكه ژى ئه‌ڤه چار سال بسه‌ر كاره‌ساتا گۆندى كۆچو ڤه چوون هیشتا چاره‌نڤیسى سه‌دان كه‌سان دیارنێنه و13 گۆرێن بكۆم ل گۆچو هه‌نه بتنى 19 كه‌سێن ئێزدى ژ بن وان گۆرێن بكۆم رزگاربوون.
ئێك ژ برێندارین كاره‌ساتا گۆندێ كۆچو ب بریندارى ژ گۆره‌كێ ب كۆم رزگاربوویه، دیاركر: “ده‌مێ تیرۆرستێن داعش ل رۆژا 3/8/2014 شنگال داگیركرى هه‌موو رێك ل گۆندى كۆچو هاتنه گرتن خه‌لكێ نه‌شیا خوه رزگاربكه‌ن بۆ ده‌مێ 15 رۆژان خه‌لكێ گۆندێ كۆچو مانه دوورپێچ كرى ژلایێ تیرۆرستان ڤه ل رۆژا 15/8/2014 تیرۆرستێن داعش خه‌لكێ گۆندى دناڤ قوتابخانا گۆندێ كوچو دا كۆمكرن وداخازا ئایینى گهۆرینێ ژ خه‌لكێ گۆندى هاته كرن”.
ئاشكرا كر، کو گۆندى كۆچو سالا 1965 هاتیه دروستكرن ژ 220 ئاڤاهێان پێك دهات دبوونه 186 خێزان كو بوونه 1740 كه‌س ژ هه‌ردوو ره‌گه‌زان هه‌تا نوكه بتنى نڤیسینگه‌ها سه‌رۆكێ حكومه‌تا هه‌رێما كوردستانێ پشته‌ڤانیا لیقه‌ومایێن گۆندى كۆچو كریه سه‌رجه‌مێ 1740 كه‌سان 613 كچ وژن وزارۆكێن رزگاركرینه هیشتا چاره‌نڤیسى 335 زه‌لامان دیارنێنه دگه‌ل چاره‌نڤیسى گه‌له‌ك كچ وژن وزارۆكێن دێ هیشتا نه‌هاتینه دیتن وهه‌موو خانیێن خه‌لكێ یێن هاتینه خرابكرن و تێكدان وتیرۆرستێن داعش بنگه‌هێ ته‌ندروستى ژى یێ گۆندى خرابكرینه و قوتابخانه ژى كاڤلكرینه ئه‌ڤه چار سال بسه‌ر كاره‌ساتا گۆندێ كۆچو ڤه چوون هه‌تا نوكه ژى ئێك خێزانا خه‌لكێ گۆندى نه‌شیایه زڤرته سه‌ر جهێن خوه چونكو خه‌لكێ باوه‌رى ب عێراقى نه‌مایه.
ئه‌وژى دیاركر: “دماوى شه‌ڤ ورۆژه‌كێ دا تیرۆرستێن داعش ئه‌م ل ترۆمبێلان كرن هه‌ر ترۆمبیله‌كێ 50 كه‌س تێدا بارگرن ئه‌م دووراتیا 300 مه‌تران برینه دوورى گوندێ كۆچو ل وێده‌ر ئه‌م گولله‌بارانكرن ئه‌م حه‌فت كه‌س بریندارمان مه گیانى خو ژده‌ست نه‌دا ده‌نگێ فرۆكه‌یان هات ئێكسه‌ر ئه‌و تیرۆرستێن داعش ره‌ڤین پشتى هێنگى مه ب بریندارى خوه گه‌هاندا دناڤ بستانه‌كێ چاندنێ دا هه‌تا بوویه شه‌ڤ شنگال ژى 26 كیلومه‌تران ژ گوندى كۆچو یا دووره مه نه‌شیا خوه بگه‌هیینه شنگال چونكو ل شنگال ژى داعش هه‌بوون ب وێ ده‌مێ هه‌ڤكاریا ناسیاره‌كى عه‌ره‌ب مه خوه گه‌هاندا حه‌ویجه ژ حه‌ویجه ئه‌م هاتینه كه‌ركوك ورزگاربووین”.
ئاماژه دا وى چه‌ندى ژى كو 13 گۆرێن بكۆمدا خه‌لكێ گۆچو هاتینه گولله‌بارانكرن دناڤ هه‌ر گۆره‌كى بكۆمدا 50 هه‌تا 80 كه‌سێن ئێزدى تێدانه ئه‌م بتنى 19 كه‌س ژ گۆرێن بكۆم رزگاربووینه هه‌تا نوكه ژى هیچ رۆژه‌كى ژى حكومه‌تا عێراقى پیسیارا مه نه‌كریه هیچ هه‌ڤكارى وپشته‌ڤانیا مه ژى نه‌كریه بتنى حكومه‌تا هه‌رێما كوردستانى پشته‌ڤانیى و هه‌ڤكاریا خه‌لكێ گۆندێ كۆچو كریه ئه‌ڤ چار سالن ل كه‌مپا قادیا سنۆرى پارێزگه‌ها دهۆكێ هژماره‌ك ژ لیقه‌ومایێن گوندى كۆچو هاتینه ئاكنجیى كرن هه‌موو پێدڤیى بۆ مه هاتینه دابینكرن.
ل جینوسایدا شنگال 6417 كه‌س هاتبوونه ره‌ڤاندن ژوانا ژى 3548 كچ وژنن بوون و2869 زارۆك وزه‌لام بووینه هه‌تا نوكه 3315 كه‌س ژ ده‌ستێن تیرۆرستێن داعش رزگاربووینه ژوانا ژى 1155 ژن وكچن و337 زه‌لامن و 953 زارۆكێن كچن و870 زارۆكێن كورن هه‌تا نوكه 3102 كه‌س ده‌ستێن تیرۆرستێن داعشدا ماینه ئه‌وژى 1440 ژ ره‌گه‌زى مێ نه و 1662 ره‌گه‌زى نێرن.
تُتاح هذه الصورة أيضا في: کوردی
