ل شوونا ئاڤەدانكرنێ شنگال بوویە جیێ ململانا سیاسی
مەهدی حەسەن موراد 
د رۆژەكا وەكی ئیرۆ دا ل رۆژا (٣)ی تەباخا سالا(٢٠١٤)ێ لەشكەرێ ئیسلامێ یێ بناڤێ داعش هێرش كرە سەر خەلكێ سڤیلێ شنگالێ ژبۆ نەمانا ئێزدیاتیێ و تالانكرن و قركرنا ئێزدیخانێ ب پلانەكا دیراسەت كری لسەر ئاستێ نێڤ دەولەتی و هەرێمی ژبۆ بەرژەوەندیێن خۆ دەلیڤە هاتە دان داعش ڤێ تاوانا نەچاڤ لێكری لڤی سەردەمی كۆمكوژیەكا وەسا ئەنجام بدەن،ژبەركو جیێ سەرسۆرمانێ یە هەڤپەیمانێن نێڤ دەولەتی ونەتەوێن ئێكگرتی و جڤاتا ئاسایشا نەتەوەیی وهەر دەولەتەكا خۆ ب خودانێ مافێ مرۆڤی و پاراستنا كێم ئاین و نەتەوە دزانن،خۆ لبەر ڤێ كارەساتێ كەر و لالكرن هەتا دەولەتا ئیسلامێ ئارمانجا خۆ ب داوی ئینا و ئێزدیاتی ژ كوك دا هلقاندن ،ژبەركو ئێزدی مللەتەك كەڤنار و خودێ ناس وبەلنگاز لڤێ جیهانێ.
ئێزدیان پشتی (٧٣)ێ فەرمانان خۆ دجیێن ئاسێ و قولاچكا و شەكەفت و نەهالا دا پاراستین و چوو جی ل جیهانێ نەماین ئێزدی ب وار و جیێ خۆ ب زانن تەنها شنگال وهندەك جیێن دیتر ل كوردستانێ ماین ژبەرمایكێن(٧٣)ێ فەرمانا ئێزدی لێ بژین،دەولەتا ئیسلامی ئەڤ جیە ژی كرن ئارمانجا خۆ ب هاریكاری و پشتەڤانیا ئەرەبێن بێ وەفایێن ئەڤێن دەوروبەرێن شنگالێ بوونە پالپشتێن دەولەتا ئیسلامێ بۆ دۆرپێچكرنا ئێزدیا ونەهێلن كەسەك قورتالبت و درێژە ب فەرمانا دا،ئەڤ كۆمكوژی دەرهەقێ ئێزدیاتیێ و ئێزدیخانێ كرن و كەسی خۆ لڤی مللەتی نەكرە خودان هندی كرن گازی و هاوار، هەتا شنگال تەمام هاتە ستاندن وكەتە دەستێ داعش بەلێ چیایێ شنگالێ یێ خۆ گەهاندی گەهشت و یێ گیانێ خۆ ل دەست دایی ب رێڤە ژ برسا و تێنا و گەرما كەلەخێ وی ل دەشتێ و چیا ما تەیر و تەوالا لەشێن وان خارن وهندەك كۆمكرن دگۆڕێن بكۆم ڤەكرن هەتا ڤێ گاڤێ ژی وەسا ماینە،یێ هاتە گرتن ما ل دەستێ چەكدارێن داعش و ب رەنگەكی هۆڤانە بەرێ خۆ دانە وان بەلنگازێن ئێخسیر دكرن چ ژن و چ زەلام هەر ل دەسپێكێ هەموو زەلام كوشتن و زارۆك ل فێرگەهێن خۆ فێری پەروەردا ئۆلا ئیسلامێ یا توندرەوكرن بۆ خۆ پەقاندن و تیرۆركرنێ و كرنە لەشكەرێ دەولەتا ئیسلامێ،ژن و كچك ل بازار و قەیسەیرێن رەققا و شامێ و موەسل كرنە كەنیزە و كرین و فرۆتن پێ دهاتنە كرن و ل تۆرێن كۆمەلایەتی وێنە و ڤیدیۆ دهاتنە بەلاڤكرن دا دنیا پێ ئاگەهداربت كا چی بسەرێ ئێزدیا دئێتە كرن،ئێزدیێن ماین ژبەر ڤێ فەرمانێ دەربەدەربوون ل بن چادرا و كاڤلادا لبەر دەرگەهێن خەلكێ وەك سێویا و بەلنگازا مان كا دێ كی نانەكێ ب خێر دەتە وان،بۆ زانین نە هەر ئێزدیێن شنگالێ یێن باشیك و بەحزان خانك و قەباغ لەحفا قایدیا بنكەندی و قەزا شێخان و وەلاتێ شێخ و كۆمەلگەها مەهەتێ و باعەدرێ ئێزدیێن ل هەر جیەكی عێراقێ و بەغدا وكوردستانێ گیانێ خۆ قورتالكرن و رەڤین ژ ترسا خۆ گەهاندن سنوورێن دەولەتا و تەركا مال و حالێن خۆ دان ژ ترسێن ڤێ فەرمانا هاتیە سەرێ ئێزدیا وهاتنا داعش بۆ ناڤ باژارێ شنگال و باشیكێ.
جیێ سەرسۆرمانێ یە ئۆلەكا كەڤنار و نێریكی پێنچ سەد هەزار كەسی ب شەڤ و رۆژەكێ ئاوارەبن و دەربەدەربن بێ جی و وار هندەك دسووریا ب گەهن و هندەك توركیا و یێن دی ژی خودان خێرێن كوردستانێ یێن پارێزگەها دهۆكێ د هاوارا ئێزدیان گەهشتن و ڤەحواندن د خانی و مالێن خۆدا و نان و خوارن بۆ وان دابینكرن هەتا رەوش هاتە ئارامكرن و بەشەك ڤەگەریان وخەلكێ شنگالێ و باشیك و بەحزانێ مان دەربەدەر ،ئەڤە سالا چارێ دەرباز بوو مللەتێ شنگالێ دڤێ رەوشێ دا دنالن ژ ئێش و ئازارا،هەر چەندە دەولەتا ئیسلامێ هاتە روخاندن و شنگال و باشیك رزگاربوون بەلێ كەسی خۆ لڤی مللەتێ هەژار بەندەوار نەكرە خودان هەمان بیر و باوەرێن گەنی هاتن جیێ داعش ئەو ژی حەشدا شەعبی خۆ ب خودانێ ئاخا شنگال و باشیكێ زانی و پەكەكێ خۆ ب قارەمانێن شنگال دانە دیاركرن و پێشمەرگەه و ئیدارا حكومەتا هەرێما كوردستانێ ژ دەڤەرێن ڤەقەتیایی ژ هەرێما كوردستانێ دەرئێخستن و خەلكێ بەلنگاز دناڤا ئاگرێ ململانێ یا سیاسی دا سۆتن دا هاوارا ئێزدیان دا بێن و برینێن وان دەرمان كن هەر كەس بۆ بەرژەوەندیا خۆ ل شنگالێ ئاسێ بوو،مللەتەك بێ خودان و بێ كەس ب هەزارا كەس هاتن كوشتن وكەتن دەستێ داعش و لژێر ئالا رەش و بناڤێ(اللە اكبر)سەرێ وان هاتن برین و بەرخودان ژ ئاخ و وەلات كرین قوربانی ل پێ ناڤێ ئێزدیاتیێ و شنگالێ داین،لێ جیێ داخێیە نەبوون جانگۆری و هیچ ئیمتیازەك دەولەتێ و نە كوردستانێ نەدان خێزانێن ڤان كەسا، مەبەستا من ئەڤێن كەتین دەستێ داعش و كوشتین چ ژن چ زەلام یان زارۆك یان پیرەكال بت یانكو ئەوێن كەسێن باب و كچێن وان كەتین دەستێ ڤان كافرا كەس د هاوارا وان نەچۆیە،نە ب مال و حالێ خۆ هاتن قەرەبووكرن،نە جڤاكا نێڤ دەولەتی و حكومەتا عێراقێ وكوردستانێ كارین ئارامی و سەقامگێریێ ل شنگالێ دروست كن ئێزدی ژی مان ل كاڤلێن بیانیا و ل كەمپێن بێ سەروبەر و شنگال ژی بوویە گۆرەپانا ململانێ یا سیاسی ونەهاتە ئاڤەدانكرن وەك خرابەكی مایە و نە ژین و ژیار دئێتە ب رێڤەبرن.
ئەڤ جار شنگال بوویە دارستان ژێك ڤاڤارتنا تۆل ستەندنا ئێك و دوو دناڤبەرا شیعە و سووننە و ئەمریكا و ئیرانێ و سووریا و عێراقێ و توركیا و پەكەكێ و كوردستانێ و حەشدا شەعبی و ئێزدی ژی یێت ئێنە شەوتاندن!،ژبەر ڤێ رەوشا نالەبار و بێ سەروبەر ئێزدی ژ نەچاریا خۆ بەشەكی هەرە زۆر بەرەف ئەورۆپا و دنیایێ ڤە چۆن و دەست ژ ئێزدیخانێ و لالشا نوورانی وخاس و باب چاكێن خۆ بەردان،راستە كوردستانیا و تایبەت سەرۆك بارزانی و پێشمەرگەی درێغی نەكریە و بەرەڤانی ژ ئێزدیاتیێ وشنگالێ كریە بەلێ شیانێن حكومەت و پارتی و سەرۆك بارزانی هندە بوویە،قەیرانەكا دارایی لسەر حكومەتا هەرێما كوردستانێ هات حكومەتا بەغدا شنگال داگیركر ئەڤ چار سالێن بۆری كوردستان ژی كەتە بەر مەترسیێ و رەوشەكا ئالۆز تێرا دەرباس بوو، یا گرنگ دڤیا جڤاكێ نێڤ دەولەتی و حكومەتا بەغدا و كوردستانێ ب هەموو شیانێن خۆ پشتەڤانیا ئێزدیا كربا ئەڤ فەرمانا بسەرێ ئێزدیا هاتی بەرپرساتیا وان بوو دڤیا ئەڤ ئۆل و مللەت بێتە پاراستن ئەڤە(٧٤) فەرمان بسەرێ ئێزدیان هاتن بێ ئەگەر،ئێزدیا بەری هەر كەسی بەرەڤانی ژ ئاخا عێراقێ و كوردستانێ كریە مللەتەك خودێ ناس و باوەری ب ئێكانا خودێ هەین و چوو جارا نەبووینە مەترسی لسەر كەسی تەنها گرێدایی ژیان و ژیارا خۆ بووینە.
ل داویێ ئەڤێ رۆژا رەش فەرمانا بسەرێ ئێزدیاتیێ هاتی زەرەر و زیانەكا مەزن گەهاندە ئێزدیاتیێ،لەوا دبێژین وان بیروباوەرێن گەنی و كەڤنار یێن ئۆلا داعش ریسوا و شەرمەزار دكەین و هیڤیدارین زووترین وەخت خەلكێ مە هەموو ڤەگەرت سەر مال و ملكێن خۆ و كچ و ژنێن دەستێ داعش هەموو رزگاربن و ڤەگەرێن ناڤ كەس و كارێن خۆ و هەموو ئەو مێرخاس و كەسێن بەرەڤانی ژ ئێزدیاتیێ كرین و ب دیل كەتین دەستێ داعش و هاتین كوشتن وەك جانگۆری بێنە هژمارتن و ناڤێن وان ب زێری ل دیرۆكا عێراقێ و كوردستانێ بێنە تۆماركرن و قەرەبووكرن،دبێژینە نەحەز و نەیارێن ئێزدیاتیێ هەر دێ ئێزدیاتی مینت و ئەڤە(٧٤) فەرمان هاتن نكارین ڤێ ئۆلێ و مللەتی ژناڤ ببەن هەر دێ مینت ل پێناڤێ خودێ و تاوسی مەلەك،هیڤیدارین ئەڤ سالا بێت شنگال ئاڤەدان و ئارام وتەنا بت وەكی شنگالا جارا جەژن و داوەت و جەمایا شەرفەدین و خۆشی لێ بێن گێران و چوو كچ و ژن ئێخسیر ل دەستێ داعش دا نەمینت و هەر ئاوارەكی ل چ جی بت ڤەگەرن سەر مال و ملكێن خۆ ڤە.
تُتاح هذه الصورة أيضا في: کوردی
