كوردێن ئێزدی داخازا ئاشكراكرنا چارەنڤیسێ رەڤاندیێن ئێزدی دكەن
باسنيوز:
رێڤەبەرێ نڤیسینگەها رزگاركرنا رەڤاندیێن ئێزدی دیاركركو هەر دەمێ هەموو كچ وژن وزارۆكێن رەڤاندیێن ئێزدی هاتنە رزگاركرن دێ وێ دەمێ ئێزدی خوشترین جەژنێ كەن. هەتا نۆكە چارەنڤیسێ 3154 رەڤاندیێن كوردێن ئێزدی نەیێ دیارە.
حۆسین قائێدی، رێڤەبەرێ نڤیسینگەها رزگاركرنا رەڤاندیێن ئێزدی بۆ (باسنیوز) دیاركر: “ئافرەتێن ئێزدی هێشتا دناڤ دەستێن تیرۆرستێن داعشدا دنالن. هەتا نۆكە حكومەتا عێراقی وەكو پێدڤی بۆ بابەتی رزگاركرنا رەڤاندیێن ئێزدی كارنەكریە. هێشتا چارەنڤیسێ 3154 كچ وژن و زارۆكێن رەڤاندیێن كوردێن ئێزدی دیارنینە، ژوانا ژی پتر كچ وژنن. ب هەلكەڤتا رۆژا جیهانیا ئافرەتان ئەم دەنگێ خوە بلند دكەین بۆ هەموو سازیێن مافی مرۆڤی وئافرەتان ل جیهانێ كاربكەن بۆ رزگاركرنا رەڤاندیێن ئێزدی”.
خویا ژی كر: “هەتا نۆكە ب پشتەڤانیا حكومەتا هەرێما كوردستانێ زێدەتر ژ 3260 كەسان ژ دەستێن تیرۆرستێن داعش یێن هاتینە رزگاركرن وهێشتا پتر ژ سێ هزار كەسان دەستێ تیرۆرستاندا ماینە وچارەنڤیسێ وان دیار نینە”.
پیشتر مەحما خەلیل، قایمقامێ قەزا شنگال بۆ (باسنیوز) دیار كر: “ناسنامەیێن نە دروست بۆ هندەك ژ رەڤاندیێن ئێزدی دهێنە دروستكرن گومان هەیە ئەڤ چەند هاتبتە كرن د دەرهەقێ كچێن رەڤاندیێن ئێزدی دا چونكە بێ رازیبوونا ئێدارا شنگال یا شەرعیەتا ژ خەلكێ شنگال وەرگرتی، حكومەتا عێراقی بریاردان رێڤەبەریا ناسنامەیان ژ شنگال ڤەگوهزنە مووسلێ. وان مەرەمێن خراب ب ڤێ بریارێ هەبوون”.
تُتاح هذه الصورة أيضا في: کوردی
