ژ كەلەپۆرێ باب وكالا
ئلیاس نەعمو خەتاری
پشكا چارێ
پێتڤیێن ئاڤاكرنا خانی ومالا لدەمێ باب وكالە وەكی دیار ل پشكا بۆری مە كربوو بەحسێ خانی ومالێن كەڤن كا دچاوابوون و شێوی وان چاوابوو ژلایێ ژۆرێن وان و بنێ خانی وسەرێ خانی هەتا ب هەموو ژۆر وجیێن مالێ ڤە.
ل هێرە ئەم دێ كەنە بەحسا پەیداكرنا بەرا وگێچێ بۆ ئاڤاكرنا قەسرێن بەرێ وب چ شێوەی دهاتنە ئاڤاكرن،دیسان كا چاوا خانیێن هەری و ئاخێ دهاتنە ئاڤاكرن ل وی سەردەمی،وەكی ب شێوێ جوگرافی ئەگەر بەرێ خۆ بدەینێ دبینین گوندێن ئێزدیان دبەلاڤن وپتریا وان ب رێژەیا هەرە مەزن لبەر تخومێن چیانە وكەند وكۆر و نوهالانە ئەڤە وەكی مێژوو دیاردكت ژبەر فەرمانا وشەر وكوشتنان د درێژیا مێژوویێ دا،لەوما خەلكێ مە وەسا زانی كو گەلەك مفایێ ژ خێر وبەرەكەتا ڤان كر وچیان وەرگرت ژوانە گێج و بەرێ چیایا بكێشنە ناڤ مال وبۆ ئاڤاكرنا قەسر ومالا بكاربینن،هەلبەت بۆ ڤان كاران كو گەلەك ب ماندی و زەحمەت بوون كەسێن شارەزا هەبوون بلیمەت بوون ژبۆ دیاركرنا جیێن باش ژبۆ راكرنا بەرا وگێچێ،گەنج و كەسێن بسپۆر دڤی كاریدا بەرێ خۆ ددانە چیا و كەندا ب ئامیرێن بەرێ وەكی تەڤەرك و لهیز و ماهۆل و دەبورە ژبۆ راكرنا بەرێن مەزن وپاشی دێ شكاندبان وكربانە بەرێن كچك و رێك وپێك ولسەر پشتا دەوارا دێ كێشابانا سەر جیێن شۆلی وكاركرنی ژبۆ ئاڤاكرنا مال وجیان هەلبەت جیێن تایبەت بۆ ئامادە دكرن داكو بەر نەكەڤن وباش هاتبانە گرێدان ل پشتا دەوارا دیسان كارێن جوان ومفادار ب شێوێن هۆنەری وخۆشك ژڤان بەران چێدكرن وەكی قاحفكێن ئاڤێ بەرێ ب تەڤركی دكۆلان و كۆر دكرن ژ بۆ ئاڤ ڤەخوارنا چێل وپەز ونرسم وهند..،دیسان هندەك جۆرێن بەرێن مەزن كونەك لێ چێدكرن،داكو دەوارا پێڤە گرێدەن وبەرێن جوهنی وعەمبارێت ئاڤێ الإماراتی بەرێ وهتدد…،جیێن تایبەت دهاتنە دەست نیشانكرن بۆ دیاركرنا گێجا باش پاشی ئەڤ گێچە ب تێركا دكێشانا مال ل دۆرا گوندی كورهێن گێچێ چێدكرن و ئەو گێچە ب شێوەكی زانستی دهاتە سۆتن و قەلاندن داكو بێتە ئامادەكرن،كورها قەلاندنا گێچێ وەكی خانیەكی كچك ل دۆرا كۆما گێچێ چێدكر وسەرداگرتی دكر بتنێ ئێك كون لسەری دهێلان بەرەك لسەرێ كونێ داتنا و كورها گێچێ هەلدكرن ولبەربوون و تێك ڤەدان،داكو نە سۆزێن لێ چاوا دزانی ئەڤ گێچ هاتە قەلاندن ئەو بەرێ لسەر كورها گێچێ دانایی دەمێ ئاگرێ خۆ ڤەمرانبا ئانكو تەمراندبا دێ هاتبانە بەرەك هاڤێتبا وی بەری ب نیشان لێدابا دەمێ بەر پەلخی با و هوربا رامانا وێ گێچ وا باش هاتیە قەلاندن،لێ ئەگەر ئەو بەر باش هورنەبا و نەبەلخی با رامانا وێ هێشتا قەلاندنا وێ وا مای ئا بڤی شێوەی گێچ دهاتە ئامادەكرن بۆ ئاڤاكرنا مالا.
دەمێ كارێ ئاڤاكرنێ دەست پێ دكر ژمارەكا پالا ئانكو كرێكارا حازردبوون ئێ گێچ شێلابا دگۆتنێ جەبال پچك بچك گێج دئێتە شێلان،ژبەركو زوو هشك دبت ئێ گێج دكێشان دگۆتنێ لپك كێش وب لەپكا ددەنە هۆستایی،هەروەسا بەردەستێ هۆستایی بەرا ددەتێ و ل گەلێك دئێنە بكارئینان ودیوارێ گێچێ ئێكسەر هشك دبت،لەوا ب شێوێ كفانی دئێتە ئاڤاكرن،خانیێن ئاخێ دهاتنە ئاڤاكرن دەمێ لبن دبڕین ژ هەڕیێ و كایێ قالبێ تایبەت ئێ بڕینا لبنا وێ هەی مستگیلە هەری دكرنێ وهێدی رادكرن وەسا وژمارەكا گەلەك یالبنا چێدكن لبەر رۆژێ دهێلان تا باش هشك بانە پاشی رادكرن بۆ ئاڤاكرنا خانیان بكاردئینان ،هەر دیسان خانی ب بەرا وهەڕیێ ژی ئاڤادكرن دیسان سەرێ ڤان خانیان ب شەقلا و مەدا وقەمیشی ونیڤلا داگرتی دكرن پاشی هەری روتكرنە سەروبان ب هەریێ دهنوت وراستی ئێك دكرن و دیوارێن ڤان خانیا ب هەریێ دهنوتن و د جرپاندن،سپیكرنا مالا لپێشییا جەژن وتوافا جۆرەكی ئاخێ هەبوو دگۆتنێ ئاخە شینك سبیەكی ئاسمانییە دكێشانە مال و لناڤ هندەك ئامانا ب ئاڤێ روتكرنە ئانكو وەكی بۆیاغێ لئ دهات ول جیێ بۆیاغێ بكار دئینا ومال پێ سپیدكرن ب شێوەكی جوان وهۆنەری خۆشك.
تُتاح هذه الصورة أيضا في: کوردی
