ژبەر حەشدا شەعبی رێیا شنگال_دهۆك نەهاتیە ڤەكرن
تۆرا لالش یا راگەهاندنێ/رائد غانم
رێیا سەرەكی دناڤبەرا شنگال و پارێزگەها دهۆكێ دا هێشتا داخستی مایە،ژبەر حەشدا شەعبی بوویە رێگر و ئەگەر ئەو رێ نەهاتیە ڤەكرن و بوویە رێگر ل هەمبەر رێكخراوێن مرۆڤایەتی هاریكاریا بگەهیننە خەلكێ شنگالێ.
وەلاتیەكی خەلكێ شنگال نەخواست ناڤێ وی بێتە ئاشكەراكرن دیاركر،هەبوونا حەشدا شەعبی ل دەڤەرێ وەكریە خەلك وەك زیندانیان ببن ل مالێن خۆدا و چ بنەما و یاسا ل جەم وان نینە،هەر ئێك بریارا خۆ ژ خۆ وەردگرت و هەتا گەهشتیە وێ چەندێ كارێن دزیێ دكن،حەشد ئەگەرە هەتا نهۆ باشوورێ چیایێ شنگال ژ مین و تەقەمەنیا نەهاتیە پاقژكرن و هەرۆژ ئەم باجا ڤێ چەندێ ددەین.
رۆژنامەڤان(سەعەد حەمۆ)خویاكر،رەوشا شنگال و خەلكێ وێ یێن نهۆ لێ دئاكنجی بەرەف خرابتر دچە و ئەو هێزێن ئەمنی یێن ل شنگال شیانێن چارەسەركرنا ئێك ئاریشەیا خەلكێ وێ نینن و دەڤەر نەیا كۆنترۆل كریە و چ بەرپرساتی ل دەڤەرێ نەمایە و كەسی هاژ كەسی نینە و هەر ئێك بۆ خۆ كاردكت،ئاماژە ب وێ چەندێ دا ئەو دووراتیا ل ماوێ دوو دەمژمێرا دا دهاتە برین داكو بگەهنە كوردستانێ بوویە شەش دەمژمێر ژبەر داخستنا رێیا سەرەكی یا شنگالێ ب كوردستانێ ڤە گرێ ددەت،خەلكێ مە دخوازت ئەڤ رێ جارەكا دی بێَتە ئەكتیڤ كرن،داخستنا ڤێ رێ بوویە رێگرەك لبەر وان رێكخراوێن مرۆڤایەتی داكو هاریكاریا بگەهیننە خەلكێ و دەمێ ئێك ژ خەلكێ مە دچتە بەر دلۆڤانیا خودێ ئەو نكارن بەرەف وێ ئاخێ ببن یا كو لێ ژ دایك بووی،داكو بێتە ڤەشارتن،ژبەركو حەشدا شەعبی هێزێن خۆ ل شنگال خوجه كرینە.
ژلایەكێ دی ڤە رێڤەبەرێ ناوچەداریا سنوونێ(نایف سەیدۆ)ئاشكەراكر،ئەم باش چاڤدێریا رەوشا دەڤەرێ دكن و دێ هەموو رێیا بكارئینن داكو ڤێ كێشەیێ چارەسەر بكن،مە ب شێوەیەكی فەرمی داخواز ژ پارێزگارێ نەینەوا كر كو ئەو رێیا شنگال ب هەرێما كوردستانێ ڤە گرێ ددەت بێتە ڤەكرن،ژبەركـــو خەلكێ مە ب گشتی باوەری ب خەلكێ باژێرێن تەللەعفەر و مووسل نەمایە و دناڤا وان باژاران دا سەرەدانا هەرێما كوردستانێ بكن،دیسا رەفتارێن حەشدا شەعبی وە كریە خەلكێ شنگال ژ ژیانێ بێزار بن و دلگرانیەكا مەزن ل جەم خەلكێ نهۆ ل شنگال ئاكنجی دروستبوویە و ژ هەبوونا وان ل دەڤەرێ نەرازینە،ئەم حەشدا شەعبی ب ئەگەرێ نەڤەكرنا رێیا شنگال_ دهۆك ددانێن و هەتا نهۆ ئاریشە ل جەم پێشمەرگەی نینە كو ئەڤ رێ بێتە ڤەكرن،لێ حەشدێ رێ نەدایە،ل دەمێ بۆری دا ئەڤ رێ هاتە ڤەكرن ژلایێ پێشمەرگەی ڤە لێ حكوومەتا عێراقێ رێ بڤێ چەندێ نەدان.
تُتاح هذه الصورة أيضا في: کوردی
