بڤێ تاوانێ رژێما ئەسەدی پەیامەكا دی گەهاندە كۆمەلگەهێ نێڤ دەولەتی
خالد خدر
ل رۆژا سێ شەمبوویا بۆری 4/4/2017 رژێما بەشار ئەسەد چەكێ كیمیایی بكارئینا ل دژی كەسێن سڤیل ل باژێرۆكێ ( خان شێخونە ) یێ سەرب پارێزگەها ئیدلبێ ڤە ل باكۆری رۆژئاڤایێ سووریا ، دئەنجامێ وێ تاوانا هۆڤانەیا رژێما ئەسەدی كری ل دژی سڤیلان نێزیكی (90) كەسان هاتنە كوشتن ، كو گەلەك ژوان ژن وزارۆك بوون ژبلی بریندارا ، بڤێ تاوانێ رژێما ئەسەدی پەیامەكا دی گەهاندە كۆمەلگەهێ نێڤ دەولەتی كو ئەو بهیچ شێوەكی دەستبەردانێ ژ دەستهەلاتێ ناكەت و هاریكار نابن دگەل وان بتایبەتی دگەل ئەمریكا و ئیدارا ترامپی كو بەریا نهۆ جۆرە نەرماتییەك هەبوویە لهمبەری رژێما بەشار ئەسەدی ، ئەڤ تاوانە هاتیە رەسوا وشەرمەزاركرن ژئالییێ پترییا وەلاتێن جیهانی ڤە.
و ژئەگەرا ڤێ تاوانا رژێمێ جڤاتا ئیمناهیا نێڤ دەولەتی جڤینەك گرێدا ل ڤی دەربارەی و ئەمریكا ب پشتەڤانییا فەرەنسا وبریتانیا پرۆژە بریارەك پێشنیار كر ژبۆ ڤەكرنا ڤەكۆلینێ لسەر تاوانا بكارئینانا چەكێ كیمیایی ژئالیێ ئەسەدی ڤە ، بەلێ رووسییا ل دژی ڤی برۆژەی راوەستیا ومافێ ڤیتۆ بكارئینا ، سەرەرایی ڤێ چەندێ فەرەنسا یە رژدە ژبۆ سزادانا رژێمێ ،هەروەسا برێتانیا وئەمریكا ژی هەمان هەلویستێ فەرەنسا هەیە لسەر سزادانا بەشار ئەسەدی كو سەرۆكێ ئەمریكا ترامپ زۆر نیگەران بوویە ژبەر ڤێ تاوانا مرۆڤایەتی ، كو لسەر ڤی بابەتی گەنگەشە كرینە دگەل كاربدەستێن بنتاگۆنێ و باسێ هلبژاردەیێن لەشكەری كرینە ، وب كێماتی رێكێ ل فرینا فرۆكێن سووری بگریت ، ئەو بوو هەدارا ترامپی نەما ل سپێدەییا رۆژا ئینییێ رێكەفتی 7/4/2017 ئەمریكا ب مووشەكا دەربەكا لەشكەری داوەشاندە بنگەهێ شوعیرات یێ هێزێن ئەسمانیێن سووری ل پارێزگەها حمسێ ،وەك كارڤەدانا لسەر بكارئینانا چەكێ كیمیایی ل خان شێخونە، ئەڤ دەربا ئەسمانی یا هێزێن ئەمریكی ل دژی هێزێن ئەسمانیێن سووری ، بوویە جهێ دلخۆشییا هەمی وەلاتێن هەرێماتی و یێن رۆژئاڤا ژبلی رووسییا و ئیرانێ كو هەردوو وەلات زۆر نیگەران بووینە ب سەدەما وێ هێرشا ئەمریكی لسەر رژێما ئەسەد و بتایبەتی رووسیا ئەڤ هێرشە شەرمەزاركر.
هەر ب سەدەما ڤێ چەندێ جۆرە دووبەرەكییەك كەتیە دناڤبەرا ئەمریكا و رووسییا دا ، ول رۆژا 7/4 جڤاتا تەناهییا نێڤ دەولەتی جڤینەكا بلەز ئەنجامدا لسەر هێرشا ئەمریكا ودهێتە پێشبینی كرن كو گڤاشتن زێدەتر لێ بهێن لسەر رژێما ئەسەدی ب تایبەتی پشتی ڤێ تاوانا هاتی كرن ل پارێزگەها ئیدلبێ ، وژئالییەكی دیڤە دێ كارتێكرنێ ل شەرێ دژی تیرۆرستا كەت ب تایبەتی ل دژی داعش كو رووسیا ژی شەرێ وێ دكەت ، دهێتە زانین كو نەجارا ئێكێ یە رژێما ئەسەد دهێتە گونەهباركرن ب بكارئینانا چەكێ كیمایی ل دژی گرۆپێن چەكدار ، بەلێ ڤێ جارێ رەوش یا جێوازە ژبەركو ل دژی سڤیلا هاتیە بكارئینان ب تایبەتی ل دژی خێزانا كو ژن و زارۆك دناڤ دا بوون ، دهێتە چاڤەرێكرن شەر وئالۆزیێن سووریا ئالۆزتر لێبهێن ، ئەڤە شەش سال دەرباز بوون وهێشتا گەلێن ڤی وەلاتی دناڤ شەر و ئاوارەبوونێ دا دنالیت ل داویێ ژی تووشی چەكێ كیمیایی بوون ، سووریا بوویە جهێ تۆلڤەكرنێن هەرێمایەتی و نێڤ دەولەتی كو وەلاتێن زلهێز و مەزن یێن دەڤەرێ و جیهانێ سەرەمێن سەرەكی نە ژبۆ خۆشكرنا ئاگرێ شەر و هەڤركییێ ل سوورییا و هاوەلاتییێ بێ گونەه و بێ دەستهەلات باجا هەمییێ ددەتن و دبتە قووربانی.
تُتاح هذه الصورة أيضا في: کوردی
