ئەم هەموو شانازیێ ب كچا كۆچۆ وئێزدیخانێ دبەین
خالد خدر
پشتی كو چەكدارێن رێكخراوا تیرورستی یا دەولەتا ئیسلامی دەڤەرا شنگالێ داگیركری ل تەباخا سالا2014 ،تێتە زانین ئەوان تاوانێن مەزن ل دژی ئێزدیان ئەنجامدان كو هەولا پاكرنا نەژادێ ئێزدیان كرن و تاوانا ژهەمیێ مەزنتر ئەنجامداین ل دژی ئێزدیان ئەوژی رەڤاندن وبرنا ب هەزارا كچ وژنان ل دەڤەرا شنگالێ وفرۆتنا وان وەك متایەكی ل باژێرێن مووسل و رەقایێ،جهێ دلخۆشیێ یە كو گەلەك ژوان كچ ودایكان زڤرینەڤە و رزگاربوون ژدەستێ وان هۆڤان ،كچا كۆچۆ وئێزدیخانێ (نادیە موراد) ئێك ژوان كچێن رزگاربوویە ژ دەستێ درەندەیێن دەولەتا ئیسلامی ،پشتی كو ئەو چوویە وەلاتێ ئەلمانیا وپاشی گەهشتییە وەلاتێن ئێكگرتیێن ئەمریكی ، وخالا هەرە بهێز وكاریگەر ئامادەبوونا خوشكا(نادیە موراد) ل ناڤ جڤاتا تەناهییا نێڤ نەتەوەیی دا.
ناڤهاتیێ هەموو سەرهاتییا خۆ یا تراژیدی و دلتەزین دگەل وان هۆڤا ڤەگێرا بۆ ئامادەبوویا وئاخفتنێن وێ سەرنجا هەمی ئامادەبوویا ڕاكێشا ورۆندك ژچاڤێن وان ئینانە خوارێ ،ئەڤ دیمەنێ دگەل نادیایێ بوویە بەلگەیەكا مەزن ل ژدی تاوان وكریارێن دەولەتا ئیسلامی ل ناڤەندێن نێڤ نەتەوەیی و بتایبەتی ل جڤاتا تەناهییا نێڤ نەتەوەیی ، كچا ئێزدی نادیە ناما وان كچ وژنێن لبن دەستێ تیرۆرستان گەهاندە جیهانێ ئەو زولم وزۆردارییا بسەرێ كچ و ژنێن ئێزدیان هاتی ب دەستێ تیرۆرستان، نۆكە نادیە موراد بوویە هێمایێ مللەتێ ئێزدی وزێدەتر بوویە هێمایێ هەمی مللەتێن بن دەست و تەپەسەركری ل جیهانێ ،ئیرۆ نادیە بوویە بالیۆزا ئاشتیێ ل هەمی جیهانێ كو نوونەراتییا هەمی كچێن تێنە رەڤاندن وئەشكەنجەدان ب دەستێن هۆڤ وتیرۆرستان ، چ ل عیراقێ بیت یان ل سووریا یان ژی ل نەیجیریا بیت ول هەر جهەكی دیتر بیت ، نادیایێ تیرۆر و تیرۆرست و ئەو كەس ولایەنێن هاریكاری و پشتەڤانی وهەڤهزرییا وان یا قڕێژی كرین هەمی رسوا و شەرمەزاركرن ل پێش چاڤێن هەمی جیهانێ ئەگەر پچەكا شەرمێ دگەل وان مابیت .یا دیارە ویا رۆن وئاشكەرایە كا كیژ لایەن تیرۆر و تیرۆرستن و كا كی نە هاریكاری و پشتەڤانیا وان كرین بتایبەتی ژبۆ هێرشا وان لسەر ئێزدیێن شنگالێ ،كو نادیە و ب هەزاران نموونێن وەك وێ كرینە قوربانیا حەز و مەرەمێن خۆ یێن دیرۆكی.
ئەم هەمی شانازیێ ب كچا كۆچۆ وئێزدیخانێ دبەین ژبۆ هەلویستێ وێ یێ وێرەك و سەربلند چ ل ئەمریكا چ ل مسرێ چ ل یونانێ دیدارێن وێ دگەل سەرۆك و كەسایەتیێن جیهانی ،ل ڤر پێدڤییە سۆپاسی و رێزگرتنێن گەرم وبێ سنۆر ئاراستەی وان كەس ولایەنێن بووینە پشتەڤانی ورێخۆشكەر ژبۆ گەهاندنا دەنگ وناما نادیایێ بۆ هەمی جیهانێ،بتایبەتی كاك (موراد اسماعیل ) سەرۆكێ رێكخراوا ئێزدا ل ئەمریكا و كەنالێ ئەسمانی یێ پر قەشەنگ (البغدادیە) و دكتور عەون حسێن ئەلخەشلووگ وهەروەسا سۆپاسیێن تایبەت و پر بەها بۆ میدیاكارێ ژێهاتی و نیشتمانپەروەر (ئەنوەر ئەلحەمەدانی) ژبۆ پێشەوازی ودیدارا ویا دەنگڤەدایی دگەل خوشكا (نادیە) وبۆ هەستێ ویێ مرۆڤ دۆست دگەل نادیە و دلداریا وی دگەل دۆزا ئێزدیان.
تُتاح هذه الصورة أيضا في: کوردی