رەشكرن و هندەك دابونەریتێن ساخلەمیێ دئێزدیاتیێ دا
ئلیاس نەعمۆ خەتاری
ل دەستپێكێ دڤێت ئەم باش بدەینە ناسین كو د ئاینێ ئێزدیاتیێ دا گەلەك ساخلەت و تایبەتمەندی یێت تێدا هەین ئەو ژی ژ ئیمانا كەسێ ئێزدی یە ب ئاینێ خۆ یێ پیرۆزە، لەوما دێ گەلەك جاران بینین چارەسەری ب رێیا ئاینی دئێتەكرن، دەمێ سەرەدان دئێنەكرن بۆ لالشا نوورانی و باب چاكێن ئێزدیان چ ل لالشێ یان ژی ل ناڤا گوند و كۆمەلگەهێن مە ئێزدیا بن ئەڤەژی ژ سدق و ئیمانێ یە و خۆهاڤێتنا خاس و باب چاكان ئەركەكێ ئاینی یە و چارەسەری بوویە بۆ گەلەك نەخۆشیان،دەمێ مجێور دوعایێ بۆ نەخۆشی دكت(بەلكو گەلەك دوعایێت چارەسەریا دناڤا دوعایێن مە ئێزدیان دا هەینە) دەمێ هندەك ئاخا پیرۆز ل ئنیا وی ددەت یان ل سنگی یان ل زكی ددەن یان ژی ل جیێ ئێش و نالینا نەخۆشی ل داویێ دبتە ئەگەرێ چارەسەریا نەخۆشیێ ب هاریكاریا خودایێ مەزن دئێتەكرن هەلبەت هندەك گهۆرینێت ئەرێنی دناڤا خوونا وی كەسی دا دروست دبن دبنە ئەگەرێ چارەسەریێ.
رەشكرن ب تایبەت رەشكرنا زارۆكان: بەرێ بنگەهێن ساخلەمیێ و تختۆر دكێم بوون و ل هندەك جها هەر نەبوون لەوما بتریا خەلكێ دچۆنە مالێن شێخ و پیرا و بەر ستێرك و نیشانان ب مەرەما رەشكرنێ و چارەسەریا نەخۆشیان، تایبەت زارۆك دێ بربا و هندەك بازن ب تەنی یا چرایێن ستێرەكێ ل دەست و پیێن وی چێدكرن و ل سەر ئنیا وی و ل زكێ وی، هندەك جاران زارۆكان ل بەر تەرونا یان ل بەر كوچكا ب تەنیێ ل دەمێ نەساخبوونا وان زارۆكان ب زك ئێشێ یان ژی ب هەر نەخۆشیەكێ دێ باكربانا شێخەكی یان پیرەكی ژن با یان زەلام با یان ژی هەگەر چ شێخ و پیرێن نێزیك نەبان دێ رابان گۆتبانە كچكەكا بوكر ئەڤی زارۆكی رەشكە، رەشكرن ژی ب ئەڤی رەنگی بوو دێ ب دەستێ زارۆكێ نەخۆش گرتبا و بربا بەر تەرونێ یان ژی لبەر كوچكێ ئاگری دێ دەست و لنگێن زارۆكی هلكربان ئانكو دێ بلندكربان و ب دوعا و باكڕنا ناڤێ خودێ و تاوسی مەلەك دێ دەست و لنگێن وی زارۆكی بازن دابان ب تلیا خۆ پشتی تلیا خۆ ب تەنییا تەرونێ دكر و دێ باش دەست و لنگێن زارۆكێ نەساخ ب بازنێت رەش خەملاندبان پاشی دێ زكێ زارۆكی دیاركربان و خێتەكا رەش ب تبلا خۆ لێ چێكربان و هەر دیسان ل سەر ئنیا وی ژی خەتەكا رەش ل سەرا كێشابان و هەر هۆسا بۆ هەر زارۆكەكی نەساخبا، ب ڤی رەنگی زارۆك ل جەم ئێزدیان دهاتنە رەشكرن و دئێنە رەشكرن ب مەرەما ساخبوونێ ژ نەخۆشیێ ب ئنیەتەكا زەلال و پاقژ و پەروەستەكرن بەرامبەر خودێ و تاوسی مەلەك و باب چاكێن مە ئێزدیان خودێ مەزن لێ دكەتە خێر.
خۆزی و خۆزی لێدان: ئانكو دێ تلیا خۆ كربانە د دەڤێ خۆدا و هندەك خۆزیا خۆ ب رێیا تلیا خۆ ل زكێ نەخۆشیا دابا هەگەر زك ئێش یان تایی و بای با یان ژی دەمێ زارۆك دخەوا خۆدا ڤەدژەنقین و د ترسیان، هەردیسان ئەڤ كارێ هەنێ دڤیا ب دەستێ شێخ و پیرابا و هندەكێن دان عەمر ژ بنەمالێن شێخ و پیران بناڤێ خودێ و تاوسی مەلەك و ب دەستێ خودانی ئەڤ كار ئەنجام ددان.
هەر دیسان د ئاینێ ئێزدیاتیێ دا گەلەك جاران نانێ مالا پیران بۆ زارۆكێن دژوار دئینن داكڕ بن و نەكەنە گری و باش بنڤن، هەر دیسان ئینانا دەزیكا ژ هندەك بنەمالێن شێخا دەمێ دكەنە ستۆ یان ژی د دەستێ خۆدا ژبۆ خۆپاراستنێ ژ گەلەك ئێش ونەخۆشیان، گەلەك داب و نەریتێن كەڤن دئاینێ ئێزدیاتیێ دا هەینە كو ب چارەسەریێ ڤە و خۆ پاراستنێ ڤە د گرێداینە،لێ هەگەر ژناڤ نەچۆبن یێت ماین لێ یێت كێم بووین.
ژەنی و ژەنین ژبۆ چارەسەریێ:ئانكو لێكدانا دوو بەر مەعزیا یان بەرێن ناڤا ئاڤێ یان دبێژنێ خیز ئانكو بەرێن حلو یێت ژناڤا ئاڤێ دئینە دەر، دێ ئێن چنە هندەك مالێن تایبەت كو ئەڤە كارێ وانە، دێ ئێن ئەو كەسێ ب ڤی كاری رادبت هەردوو بەرا لسەر چاڤێن زاڕۆكێ نەخۆش لێكدەت هەتا باش گەرم دبن و قریسكێن ئاگرێ ژێ دچن و ئەو قریسك دكەڤنە سەروچاڤێن وی زارۆكێ پرسك ل سەر و چاڤا هاتی و پاشی هێدی هێدی سەر و چاڤێن وی پاقژدبن.
دوعایا نەزەرێ_برینا زەركیێ: ئەڤ دوعایە دئێتەكرن و دئێتە گۆتن ژلایێ مجێور و قەولبێژان ڤە دەمێ زارۆكی نەخۆشیا زەركێ لێ هەی دبەنە نك وی و دبێژنێ زەركێ ژێ ببرە، دێ ئێت مجێور هیكەكا خاڤ كەتە د دەستێ خۆدا و ل سەر سەرێ وی زارۆكی ب شێوەكی بازنانە زڤرینت هەتا دوعایا نەزەرێ تەمام دبت دبێژت و پاشی وێ هیكێ دشكینت و ب ڤی رەنگی دوعایا نەزەرێ و برینا زەركیێ تەمام دبت.
تُتاح هذه الصورة أيضا في: کوردی
