سەرۆک بارزانی :ئەوێن دەست دگەل جینۆسایدا ئێزدیان دا ھەین، بەلاخۆ ژێڤە ناکەین،ھەتا سەرێ وان نەکەفتە بن پێلاڤێن ئێزدیان
عبدالعزیز محسن بارزانی
من دڤێت بێژم باش ھزرا خو د ڤان ھەردوو ھەلکەفتان دا بکەن ، ئەوژی سیھو حەفت سالیا جینوسایدا بارزانیان و جەژنا قوربانی، دیسان شەش سالیا جینوسایدا شنگالیان و جەژنا چلێ ھاڤینێ واتە قەدەرا مە کوردان ئەڤەیە و ئەڤە بویە و دێ ئەڤە بیت، لێ گونەھا مەیا مەزن ئەوە کو ئەم کوردو کوردستانی یە، لێ ھەتا ئێک کورد بتنێ ژی مابیت دێ کوردستان ھەر یا پاراستی بیت و ھەر دێ بیتە دەولەت.
بەری شەش سالان د سالا «٢٠١٤» دا گروپەکێ تیرورستی بناڤێ داعش گەلەک بێ وژدانانە ھێرش کرنە سەر دەڤەرا شنگالێ و جینوساید دژی وی خەلکێ بێ گونەھ ئەنجامدان، کو دژی ھەمو بنەمایێن مافێن مروڤی بویە.
لێ خوراگریا شنگالیان و قارەمانیا پێشمەرگە و شەھیدبونا «٥٠٠» پێشمەرگەی بتنێ لسەر ئازادکرنا شنگالێ تیرورستێن داعش ژ ناڤبرن و سەرئەنجام روو رەوش و شەرمەزارکرن. و ئیرادا گەلێ کوردستانێ ب سەرکەفت.
لێ دڤێت رۆلێ سەرۆک بارزانێ د روو ب رووبونا دائش دا و رزگارکرنا شنگالێ دا و ئەو سوزێن داینە بابە شێخ و سۆزێن خو بجێیناین چجاران نەھێنە ژ بیرکرن و ببنە فلێن دیکیومێنتاری و سینەمایی داکو ھندی مروڤایەتی ھەیە ببینن و بزانن.
لێ ب مخابنی ڤە ژ ئەنجامێ وێ جینوسایدێ «٦٤١٧» کەس کەفتنە د دەستێن داعش دا و ب ھەولێن رێزدار نێچیرڤان بارزانی شیایە ھەتا نوکە «٣٥٣٠» کەس رزگار بکەن و ب ملیونان دولاران لێ ب مەزێخن.
بەلێ ھێشتا «٢٨٨٦» کەس ماینە بێ سەرشوین و دبێژن باراپتری د ناڤ کەمپا ھولێ دانە ل رۆژئاڤایێ کوردستانێ ل بن حوکمێ پەکەکێ .
دیسان د گەل ڤێ جینوسایدا چەرخێ «٢١» ێ «٣٦٠٠٠٠» ھزار کەس ئاوارەبون و «١٠٠٠٠٠» ھزار کەس پەنابەری وەلایێن بیانی بون و دیسان «٦٨» مەزارگەھ ھاتنە پەقاندن و «٨٠» گورێن ب کوم ھاتنە دیتن و «١٢٩٣» کەس ل سەر دەستێ داعش ھاتنە شەھیدکرن و «١٧٥٩» زاروک مانە بێ باب و «٤٠٧» زاروک مانە بێ دایک و «٣٥٩» زاروک مانە بێ دایک و باب .
ھەژی گوتنێ یە کو ھەموو خەلکێ شنگالێ «٥٥٠٠٠٠» ھزار کەس بوینە ئەوێن ئاوارەی ھەرێما کوردستانێ بوین پشتی خەلکی دەرگەھێن مالێن خو بۆ ڤەکرین و نانێ خو دگەل ب نیڤیکرین و دەرگەھێن مزگەفت و قوتابخانان بۆ ھاتینە ڤەکرن ب سەر «١٤» کەمپان دا ھاتنە بەلاڤکرن، نھا ھێدی ھێدی رۆژانە ھندەک د زڤرنەڤە شنگالێ .
باوەریەکا مەزن ھەیە دوور یان نێزیک دێ شنگال بیتە پارێزگەھەک ب سەر ھەرێما کوردستانێ ڤە و دێ باشترین خزمەتگوزاری بۆ ھێنە پێشکەشکرن .
ل داویێ مە دڤێت ببێژین جینوسایدا شنگالێ زنجیرە جینوسایدەک بویە ب سەر گەلێ کوردستانێ ھاتی ھەر ل جینوسایدا فەیلیان و بارزانیان و گەرمیان و سورداش و قەرەداغ و بادینان و کیمیابارانکرنا ھەلەبجە و خرابکرنا «٤٥٠٠» گوندێن کوردستانێ و تاکو گەھشتیە جینوسایدا شنگالێ ئێک ل دوڤ ئێک ھاتینەکرن ب گونەھا ھندێ کو کوردو کوردستانی بوینە.
بەلێ ئیرادا گەلێ کوردستانێ چجاران نامریت و ھەر دێ سەرکەڤیت.
سەرێ خو بۆ ھەموو شەھیدێن رێکا ئازادیێ د چەمینین ، سەرێ وان بارزانی نەمرو ئیدریسێ ھەردەم زیندی و روو رەشی بۆ دۆژمنێن گەلێ کوردستانێ .
کوردستان ھەر دێ سەرکەڤیت،
تُتاح هذه الصورة أيضا في: کوردی
