گهۆرین د تێكست و وەرارا جڤاكی دا
جوان عزەت 
زمان ئێك ژ فاكتەرێن هەرە سەرەكی یە دگهۆرینا هزرا مرۆڤی دا،چنكو زمان دكارت ئەقل و كاركتەرا مرۆڤان دروست بكت،لەورا هەتا زمان نەئێتە پاك كرن، هینگی هزر ژی پاك نابت،ل ڤێرە پرسێن كو دئێنە ئازراندن دناڤ ڤێ مژارێ دا كو ئەون ئەرێ مە چەند كاریە دناڤ خۆ دا رەخنەیا زمانی بكەینە تێكستێ تێهزركرن و دیالۆكێ ؟ واتە ل گۆر ڤێ نێرینێ پرسێن زمانی دناڤ مە دا چ جاران بێ ئال نەبووینە! چنكو خوەیەتیا لبەر دەستێ مرۆڤان پەیدادبت ژ سەر ئەنجامێ هزركرنا پرس جەوهەرێ زمانی بوویە، ژ ئالیەكی دی ڤە مە چەندین دروشمێن پاشڤەمای دناخێ خۆ دا نژاندینە،دبت هەتا نهۆ مە نزانیە كا ئەنجامێ وان چ بووینە! ب راستی ژی ئەڤ پرسە دووبارە مە رادەستی پێداچۆنێن هزری دكن،چنكو ئیرۆ گەلەك گرنگە مرۆڤ پێداچۆنێ لسەر كۆمەكا تێگەهان بكت مینا ئابووری، سیاسی، جڤاكی و یاسایی،ژبەركو ئەو پرسێن ئیرۆ دخوازنە گوهرانكاریا دەولەت و ئازادیێ ژ سەركێشیا هزرا نووی و زمانەكێ پیڤای دەست پێ دكت،پاشان تاكەك ساخلەم ژ رێتم و وەرارا وی جڤاكی دەردكەڤت،بنێرە ئەو دەولەتا بەردەوام ب خوازت پێشكەفتن و ماهیەتێ دناڤ خۆ دا بەلاڤ بكت، وی دەمی ئەو ل پێ هەلسەنگاندنا هزرا نوو وتاكەكێ ئوتونوم دگەرت، هەتا بكارت وێ تەكنیكا ئەخلاقی و شەهرەزایا پێشەی دناڤ جڤاكێ خۆ دا پەیدا بكت،راستە هەموو جڤاك و مللەت خودان دیرۆك، كەلتۆر و رابردوو نە،بەلێ گەلۆ هینگی ئەو چاوان سەرەدەریێ دگەل بەرسڤا سەنتەربوونا مرۆڤان دكن؟ یان چاوان پشكداری گهۆرینا تێكست و شرۆڤەكرنێن بیاڤێن مەزن دبن؟ یان ب چ رێ پرس و پێشهاتان دهەلسەنگینن!دیارە دەستپێكا هەبوونا پێكهاتێن دەولەتێن پێشكەفتی،فۆرمێن شۆرەش و سیستەمێن گرێبەستان دناڤ بنواشێ جڤاك، ئابووری و تاكی دا دروستكرینە،لەورا كارینە كلیلێن راڤەكرن و چارەكرنێ دناڤ خۆ دا زەفت بكن،بەلێ مخابن مە هەتا نهۆ نكاریە ب دروستی كارێكتەرو فەزیلەتان دناڤ پاشخانێن جڤاكی، سیاسی و ئابووری دا پەیدا بكەین،لەورا مە تاكەك لگۆر هێزا سەردەمی نە دا چێكرن كو ئیرۆ بكارت بەرگریێ ژ پرسێن ئەخلاقی، هەلسەنگاندنا بزاڤێن پێشكەفتنێ، سیستەمێن خۆ گونجاندنا سەردەمی و ئازادی یا هزری بكت،ئەها ژبەر ڤێ یەكێ هەتا نهۆ بنواشێ گەلێ كورد خووندن بۆ سەنگ و بهایێ وان ئەگەران نە دایە فامكرن و سەلماندن،لەورا بەردەوام خۆ د پاوانا داگیركرنێ دا دیتیە،هەروەسا ئەو چەندە ژی دیار دبت كو مە گەلەك پرس هەبووینە، دیارە هێشتا ئەم ب دروستی لسەر رەهێن وان پرسان نەسەكنینە،لەورا چارە و دەردێن مە ژ نەزالبوونا چەندین گرفتێن بەری نهۆ بوویە، ب راستی ژی مە خووندنێن دروست بۆ نەكرینە،ژبەر هندێ ئەم بەردەوام بووینە قوربانێن وێ هشمەندیا كەڤنار، چنكو ئەو تشتێن رێیا تاری بەرەف رۆناهیێ ببەت پێویستیا ب نوبوون و وەرارا هزری هەی ژبەر ڤێ چەندێ هەتا بكارین ئەقلەكێ سەردەمی د هەست و هشێن مرۆڤێ كورد دا دامەزرینین،گەرەكە ئەم پێداچۆنا وان شاشی وشكەستنێن بۆری بكەین هەتا بكارین ناڤەرۆكا سەرپێهاتێن خۆ ناس بكەین.،ئەنجام: ئەگەر ئەم مرۆڤەك و مالباتەك ساخلەم ئاڤا نەكەین، هەلبەت هینگی ئەم نكارن جڤاك و مللەتەكی ساخلەم ژی ئاڤا بكەین،چنكو دەستپێكێ مرۆڤ ئاڤا دبن،پاشان ژێرخانە و سەرخانەیا سازیان دەست پێ دكت،لەورا گرنگە، خۆ بەرامبەر زانین و سەرهلدانا سەردەمی ب بەرپرسیار ببینن.
تُتاح هذه الصورة أيضا في: کوردی
