ئافرەت نیڤا جڤاكی یە
رێژین جە‌هوە‌ر
ل ماوێ چەند سالێن بۆری دا ئافرەتا كورد بهێز و شانێن خۆ هاتیە دگۆرەپانێ دا و هەموو داب و نەریتێن دبنە ئاستەنگ ل پێشیا وێ شكاندینە و دچەندین بیاڤان دا رۆلەكی ئێكجار مەزن و كارا بخۆڤە دیتیە،رۆژ بۆ رۆژێ پێشكەفتی ترە و ل ئاستێن بلند یا خزمەتێ دكت و پێشكێشی جڤاك و وەلاتێ خۆ دكت،ب تایبەت دبوارێ هۆنەری دا ئیرۆ ب هەبوونا خۆ یا كارا هۆنەر خەملاندیە و یا رۆلەكی باش دلەیزت و دبینت ئەڤە بخۆ پێنگاڤەكا هەری باشە هەم ژبۆ ئازادیا ئافرەتا كورد و پشكداریا وێ دهۆنەری دا،هۆنەری د دیرۆكا مرۆڤایەتیێ دا رۆلەكی گرنگ هەبوو ب تایبەت د پێكهاتا ژیانێ دا و دەما مرۆڤ پەیڤا هۆنەری دبهیست خۆشیەك ل نك مرۆڤی پەیدا دبت وەكە هەست و دەروونێ مرۆڤی و ژیانا رۆژانە گەش خۆشتر دبت،دەما ئافرەت دچتە ناڤ بوارێ هۆنەری دا ژیان گەلەك ب ساناهی دكەڤت مرۆڤ هەستێن خۆ دەربرینێ ژێ بكت و دەتە دیاركرن،لسەر ئاستێ جیهانێ گرنگیەكا زۆر ب هۆنەری ب گشتی دئێتە دان بۆ دیاركرنا كەلتۆر وفلكلۆر و شارەستانیەتا مللەتان،ل هەرێما كوردستانێ ژی ئیرۆ ئەو گرنگی یا پێ دئێتە دان و ب تایبەت بۆ پشكداریا ئافرەتێ دبینن گەلەك باشتربوویە چنكو ئافرەتا كورد ژی وەكی هەر تاكەكی دی دجڤاكی دا هێز و شیانێن باش هەنە و یا رۆلێ خۆ یێ ئەرێنی دبینت بۆ گەهاندنا دەنگێ كوردان ب رێیا هۆنەری بۆ سەرانسەری جیهانێ،ئەگەر بەرێ خۆ بدەینە بیاڤێ هۆنەری ل چەند سالێن بۆری دا و هەتا نهۆ ئافرەت ژی وەك زەلامی پشكداری ناڤ هۆنەری بوویە و پێنگاڤێن باش بخۆڤە دیتینە و دئالیێن جودا جودا هەبوونا خۆ سەلماندیە چ وەك هۆنەرمەند و سترانبێژ و شێوەكار و سینەما…و هتد،ئەڤە ژی هات پشتی ئافرەتێ پێل هەموو قەید و زنجیران دانایی و هاتیە دناڤ گۆرەپانا هۆنەری دا و ئازادیا خۆ هەیە كو دەمێ هزر و هەست و بۆچۆنێت خۆ دتابلۆیەكی دا یان ب ژەنینا موزیكەكێ دەربرت وی دەمی دێ پتر باوەری ب خۆ هەبت و حەز ژ هۆنەرێ كوردی كەتن،نهۆ ژی رۆلێ ئافرەتا كورد بەردەوام یێ بەرەف پێشكەفتنێ ڤە دچت و ئەگەرێ ڤێ چەندێ ژی ئەوە كو خۆلێن هۆنەری و پرۆگرام ئافرەتێ فێری لێ گەریانێ دهۆنەری دا دكەتن ،پشكداریا ئافرەتێ دوان خۆلان دا گەلەك كارتێكرن لسەر ئافرەتێ كریە كو بچتە د چارچۆڤێ هۆنەری دا و پتر باوەری ل نك پەیدابوو كو هەست و بیر و بۆچۆنێت خۆ ل ناڤ تابلۆیان دا بدەتە دیاركرن،ئەو ئافرەتێن دوان جۆرە خۆلان دا پشكداربووین نهۆ بزاڤێن جۆرا و جۆر پێشكێش دكن،ل داویێ هیڤیا من ئەوە دەزگەهێن شۆلەژێ یێن هۆنەری و رەوشەنبیری پتر پشتەڤانیا ئافرەتان دبوارێ هۆنەری دا بكن،داكو یا بەردەوام بت لسەر پێشكەفتنا خۆ و كارێن باش ئەنجام بدەت بۆ خزمەتكرنا وەلاتێ خۆ،هەروەسا دخوازن جڤاك ژی چ جاران نەبتە رێگر درێیا وێ دا داكو بدروستی پەیاما خۆ بگەهینت،وەكی گۆتنەكا مەزنان هەیە دبێژت((ئافرەت نیڤا جڤاكی یە)).
تُتاح هذه الصورة أيضا في: کوردی
