ئامیرێن دروتنا دەخلودانی ل دەڤەرا شنگالێ ل دەمێ كەڤن دا
حەیدەر عەرەبۆ یوسفانی
هەر دكەڤندا باب و پاپیرێن مە بیر ل هندێ كریە ئامیرێن پێداویستیا ژیانا خۆ بدەست بێخن ژبۆ ڤەژاندنا كارێ خۆ یێ رۆژانە،ئێك ژ وان ئامیرا ئامیرێن دروتنا دەخلودانی بوون كو ژ چەند ئامیرەكا پێك دهاتن،ئەڤ ئامیرە گرێدایی ژیانا وان بوون ئەڤ ژی وێ چەندێ خویا دكت كو كارێ جۆتیاریێ دناڤ نەتەوا مەدا دكەڤندا سەرهلدایە و بووینە پسپۆرێن ڤی كاری، ژ وان ئامیران:قەیناغ:قەیناغ هەڤال بەند بوون دگەل داسا دروتنێ و دەخلودانی و یا پێكهاتی بوو ژ ئاسنی و چەرمی و چێكرنا وێ هندەك تێلێن ئاسنی دئینان و پان دكرن و ب قەبارێ تبلا و ب درێژاهیا تبلێن دەستی دبری،پاشی هندەك چەرم دئینا و دكرە زڤێلە و ئەو ژی ب قەبارێن تبلێن دەستی و دئێخستە وان تبلێن ئاسنی و پێڤە ئاسێ دكرن و لێكبادان وەكی تبلێن دەستگۆركا،و سەرێ وێ تێلێ ل سەرێ تبلا دەردكەفت و بۆ لایێ پەحنكا دەستی ئەو سەرێن تێلا دچەماندن داكو گەنمی پێ بگرن،داس:داس مەبەست لڤێرە داسا دروتنا دەخلودانیە و داسا دەخلودانی ژ شالۆكێ مەزنترە و دەستكەكێ درێژ پێڤەیە، ئەڤە ژی داكو یا هاریكار بت بۆ وی كەسێ دروتنێ دكت و ل جیێ خۆ بكارت بتر ئەردێ ڤەگرت و راست و چەپ و لبەر سنگێ خۆ دروتنێ بكت و دیسان دا گەلەك پشتا خۆ ژی نەچەمینت،چنكو دەستكێ داسا وان یێ درێژ بوو،شالۆك:وەكی داسێ دهاتە چێكرن بەلێ كچكتر بوون ژ داسێ،دیسان بكاردئینا بۆ دروتنا جەهی و نیسكا و گیایی،هەر زەلامەكی دمالێ دا شالۆكا خۆ هەبوو، سێگوه:ئامیرەكی كەڤنە و دئێتە بكارئینان بۆ دانە بایا بێدەرێ و گەلەك كارێن دی و سێگوه ژ ناڤێ وێ یێ دیارە كو ژ سێ گوها دئێت، ملهێب:یان شانە دهاتە بكارئینان بۆ هەلاڤێژتنا دەخلودانی پشتی گێرەكرنێ،رێیا چێكرنا ملهێبێ ل دەستپێكێ دەست مەرك دئینا و بنێ وی ب تەفشی پان دكر و پاشی هەفت شفتان دئینان كو درێژاهیا هەر ئێكی (٣٠هەتا ٤٠سم) بوو سپی و حلوو دكرن ژ گرێیا و ستووراتیا وان شفتانا هنجی تبلا بەرانی بوو ب تەفشی سەرەكی وان تیژ دكر و ئێك پان دكر و پاشی ئەو شفتان ل ئەردەكی قالب ددان كو وەكو كڤانی لێ بێن و دهێلان هەتا پاش دهاتنە قالب دان و پاشی دئینا ب وێ دەست مەرێ ڤە ئێك ئێكە ئەو سەرێن شفتانا یێن پانكری دانە بەر ئێك ئاسێ دكرن،لێ ب مخابنی ڤە ئەڤ ئامیرە هێدی هێدی ژناڤ دچن و چ پێگیری پێ نائێتە كرن.
تُتاح هذه الصورة أيضا في: کوردی
