رۆژی گرتن ل جەم ئێزدیان خێرەكا مەزنە
مەهدی حەسەن موراد
هەر ئایین و مللەتەكی ب رەنگەكی رۆژیگرتن هەیە و لدوڤ باوەریا هەر ئایینەكی رۆژیگرتن خێرەكا مەزنە و فەرزەكا ئۆلی یە پێ دئێنە سپاردن و فەرە مرۆڤ رۆژیێ بگرت دا ب برسێ و بەلنگازیێ ب حەسیێت و ئاگەه ژ خەلكێ هەژار و بەلنگاز هەبت وەكی د باوەریا هەر ئایین و مللەتەكی دا هاتی،لێ وەكی دیار هەموو رۆژیێن ئێزدیان یێن خێر و فەرز د جێگرن ل دەم وەختێ خۆ ل سالێ،ئەڤ رۆژیێن ئێزی ژی دكەڤنە دئینیا ئێكێ ژ هەیڤا كانوونا ئێكێ ب هژمارا رۆژهلاتی هەر سال دبنە رۆژیێن مە ئێزدیان،لێ ژبەر پیرۆزی و گرنگیا رۆژیا كو د باوەریا ئێزدیان دا رۆژیگرتن فەرزەكە ژ فەرزێن تەریقەتێ كو رێبازا ئێزدیاتیێ یە و مرۆڤێ ئێزدی دژیانا خۆدا پەیرەو دكت و بڤێ رێبازێ وەك ئێزدیەك دئێتە ناسین،دێ بینی ئێزدی بەری رۆژیێن ئێزی ب چل رۆژا وەسا دێ خەلكێ مە رادبنە رۆژیا وتایبەت ل هێڤارا رۆژا چارشەمبوویێ ب رۆژی دبن كو هەر كەسەك ژمارەكا رۆژیا دگرن زێدەباری رۆژیێن ئێزی ب رۆژی دبن هەتا رۆژیێن ئێزی دئێن و دبتە جەژن ئەڤ رەنگە رۆژی گرتن دناڤا ئۆلا مە ئێزدیان دا هەیە،ئەڤ رۆژی بۆ خاس و باب چاكێن ئێزدیا ئەڤێن بۆ خودێ تەعالا خۆ شكاندین و ب شەڤ و رۆژ پەروەستەی خودێ تەعالا بووین دئێنە گرتن، ئەڤ كەسێن رۆژیگر ژی هندەك ژوان هیڤی و مرازا دخوازن یێن هەین نەساخن هیڤیا ژ خودێ دخوازن بۆ دای و بابا، بێ زارۆكی،بۆ رزقی،بۆ تەناهیێ و سلامەتیێ و دوركەفتن ژ قەدا و بەلایە،هیڤی و ئۆمێدێن خۆ ب رێیا ڤان رۆژیا ژ خودێ تەعالا دخوازن ب گەهن مرازێن خۆ،هەر چەندە دباوەریا مە ئێزدیان دا رۆژیگرتن بۆ خودێ یە ئەڤ چەند ژی وێ یەكێ دیاردكت كو خودێ مەزن و پاك و دلۆڤان مرۆڤ ژ هەموو خولیاقەتێ خۆ بتر ڤیایە و حەز ژێكریە لەورا ئەڤ كەرەمە دگەل كریە،دڤێت مرۆڤ ژی هەر دەم هزرا كارێن باش بكت مینا دوعا و رۆژیگرتنێ و خێرخوازیێ ژبەر ڤێ چەندێ ئێزدی بتری هەر ئایین و مللەتەكی هەی ل جیهانێ رۆژیا دگرن بەلێ وەك فەرز سێ رۆژیێن ئێزی نە بۆ خودێ مەزن و دلۆڤان دئێنە گرتن،بەلێ وەك خێر گەلەك رۆژی دناڤا ئێزدیاتیێ دا هەینە،هەر بۆ زانین (92) رۆژی كەسانێن ئۆلی وچلەگر و دیندار و جڤاتا رۆحانی و هەر ئێزدیەكی بڤێت ب رۆژی دبن، بەلێ رۆژیێن ئێزی و ئەڤ رۆژیێن بەری رۆژیێن ئێزی ئەڤێن دبێژین خێرن كو بتریا ئێزدیان ب رۆژی دبن دڤیا ب زانین سالێ نێزیكی(100)رۆژان ئێزدی ب رۆژی دبن ئەو ژی بڤی رەنگێ ل خوارێ ئێزدی رۆژیان دگرن:1_ل چلێ زڤستانێ ئێزدی وەك چلەگر و جڤاتا رۆحانی و كەسانێن ئایینی وهەر كەسێ بڤێت (40) چل رۆژی ب رۆژی دبن دبێژنێ رۆژیێن چلێ زڤستانێ،2_ ل چلێ هاڤینێ ئێزدی وەك چلەگر و جڤاتا رۆحانی و كەسانێن ئایینی و هەر كەسەكی بڤێت (40) چل رۆژی ب رۆژی دبن دبێژنێ رۆژیێن چلێ هاڤینێ،3_ هەروەسا سێ رۆژیێن دیتر هەنە ئێك بۆ خودانی و ئێك بۆ شێخێ خۆ و ئێكێ بۆ پیرێ خۆ،هەر ئێزدیەك فەرە ڤان هەر سێ رۆژیا بگرت،4_رۆژیێن خدر و ئەلیاس بتریا ئێزدیان ڤان هەر سێ رۆژیێن نەبی خدر و ئەلیاس ب رۆژی دبن و رۆژا چارێ دكەنە جەژن،5_رۆژیێن شێشمس كو د باوەریا ئێزدیان دا مەفەرا ئێزدیێن ل وەلاتێ خالتیا و یێن نهۆ ل شنگالێ و وەلاتێ شێخ و هەر جیەكی هەین دگەل رێژەكا زۆر ژ ئێزدیان (3) رۆژیان بۆ شێشمس ب رۆژی دبن ل ئینیا بەری رۆژیێن ئێزی،6_ رۆژیێن باتیزمێ چەندین مریدێن پیر ئالی و چیلكانن سێ رۆژیا ب رۆژی دبن پشتی رۆژیێن ئێزی و رێورەسمێن تایبەت هەنە بڤان رۆژیا،7_ رێژەكا زۆر ژ ئێزدیان هەر كەس ژمارەكا رۆژا ب رۆژی دبن بەری رۆژیێن ئێزی وەك خێر بۆ خودێ تەعالا،8_هەر بۆ زانین دناڤا جڤاكێ ئێزدیان دا هەینە هندەك شكەستی و ئۆلدار و كەسانێن ئایینی سەرتاسەری سالێ هەموو رۆژێن چارشەمبوویا ب رۆژی دبن دگەل چلێ هاڤینێ و چلێ زڤستانێ،دیسان تشتێ هەری باش د ئێزدیاتیێ دا جوداهی ژ ئایین و ئۆلێن هەین ئەركێ ئۆلی هندەك ژێ ڤاڤارتینە وەك رۆژی گرتن فەرە هەر مرۆڤەكی ئێزدی سێ رۆژیێن ئێزی بۆ خودێ تەعالا ب رۆژی بن ئەڤە فەرزەكە ژ فەرزێن تەریقەتێ،بەلێ چلێ هاڤینێ و چلێ زڤستانێ فەرزە لسەر چلەگرا و جڤاتا رۆحانی و شكەستیێن مالا شیخادی و رۆژیێن دیتر هەموو خێرن،هەر بۆ زانین هەموو رۆژیگرتن ب ئێك سیستەم دئێنە گرتن یێن خێر و یێن فەرز پشتی نیڤا شەڤێ،پاشیڤێ دخۆن و دگەل تاری گەوركێ دبتە دەڤگرتن،دەڤگرتن ژی ئەوە:نابت مرۆڤ هیچ تشتەكی بخۆت و ڤەخۆت و دڤێت خۆ ژ هەموو پەیڤێن خراب و گوننەه و بەدكاری یا دوور بكت،هێڤاری بەری رۆژئاڤا رۆژیگر دەست و چاڤێن خۆ دشۆن و خۆ پاك و تەمییز دكن و بەر ب رۆژئاڤا ڤە پەروەستەی خودێ دبن و دوعایا هێڤاری دكن،پشتی رۆژئاڤا دبتە فتار رۆژیگر ب دەستووری خودێ فتاردبن.
تُتاح هذه الصورة أيضا في: کوردی
