بێ دەنگیا جیهانێ هەمبەر جینۆسایدكرنا ئێزدیان
سەردار داود
پشتی فەرمانا (3/8/2014)ێ یا هۆسا مەزن كو ژلایێ رێكخراوا تیرۆرستیا داعشێ ڤە بسەرێ مللەتێ ئێزدی هاتی و دئەنجام دا ب هەزاران خەلك هاتنە شەهیدكرن و ب هەزاران هاتنە گرتن و بازار ب كچ و ژنێن ئێزدیان هاتە كرن،پشتی بۆرینا چەند سالان لسەر ڤێ فەرمانێ و دیتنا ب دەهان گۆڕێن بكۆم ل دەڤەرێن ئێزدیان و پەقاندنا ب دەهان مەزارێن پیرۆزێن ئایینێ ئێزدیان ژ لایێ داعشێ تیرۆرست ڤە،دیار كو جیهان ب گشتی یا بێ دەنگە هەمبەر ڤێ فەرمانێ.
رێكخراوا نەتەوێن ئێكگرتی و دەولەتێن زلهێز وەكو ئەمریكا و بریتانیا و رووسیا و فەرەنسا هەموو بێ دەنگن ئیرۆ بەرامبەر ڤی كارێ هۆڤانە دژی مرۆڤایەتیێ،لڤێدەرێ پرسیار ئەرێ بۆچی جیهان و دونیا هەموو بەرامبەر ڤێ فەرمانێ یابێ دەنگە؟ بەرسڤ چنكو ئێزدی مللەتەكی بەلەنگاز و بێ پشتن و چ لۆبی و پشتەڤانێن وان ل نەتەوێن ئێكگرتی و ئەمریكا و دەولەتێن زلهێز نینن،لەوما ئەم دبینن كو دنیا یا بێ دەنگە بەرامبەر ڤێ فەرمانا مەزن یا بسەرێ مە هاتی سەرەرای دیتنا وان ب چاڤا بۆ ڤێ فەرمانێ،ئەڤجا مللەتێ ئێزدی ژ ژیانا خۆ بێ هیڤی و ئۆمێد بوویە و هۆسا هزر دكت كو كەس نكارت مافێ وی بزڤرینت و ئەو كەسێن تاوان دەرهەقێ ئێزدیان ئەنجام داین بگەهنە سزایێ خۆ.
ژ ئەنجامێ ئەڤێ بێ هیڤیبوونێ خەلكێ مە ب ناچاری ڤە دەست ژ ئاخا باب و باپیران بەرددەن و ب دلەكی پر ب كول و كۆڤان بەرێ خۆ ددەنە وەلاتێن بیانی و مللەت ژی پتر ژ سێ سالان ژیانا خۆ لبن خیڤەتان دا دبۆرینن،ژ ئەگەرێ بێ دەنگیا جیهانێ بەرامبەر وان بێ هیڤیبووینە ژ ڤەگەریانا جیێن خۆ ژ ئەگەرێ نەبوونا چ خزمەتكاریا ل دەڤەرێن وان،لەوما ژیانا وان بەرەف وندابوونێ و نەمانێ دچت و ب ناچاری ڤە دەست ژ وەلاتێ خۆ بەرددەن.
تُتاح هذه الصورة أيضا في: کوردی
