برایێ ئاخرەتێ د باوەریا ئێزدیان دا
مەهدی حەسەن موراد
پشكا ئێكێ
برایێ ئاخرەتێ ئێك ژ فەڕزێن حەقیقەتێ یە دڤێت هەر كوڕەكی ئێزدی برایێ ئاخرەتێ هەبت و هەر كچەكا ئێزدی ژی خوشكەكا ئاخرەتێ هەبت ، ئەڤە ژی بۆ پەیوەندیەكا روحی یە ،چنكو ب وێ هزرێ ل ئاخرەتێ دێ هاریكاریا هەڤ كن، هەر ژبەر هندێ ژی ب برا یان خوشكا ئاخرەتێ هاتیە بناڤكرن ، ئەڤ چەندە ژی ڤەدگەرت بۆ سەردەمێ شیخادی وەختێ هاتی چەند گهۆڕین دناڤ ئێزدیاتیێ دا كرن مینا سیستەمێ چیناتی و فەڕز دانانە سەر مرۆڤێ ئێزدی وەكی فەڕزێن حەقیقەتێ و فەڕزێن تەریقەتێ د ئێزدیاتیێ دا كرنە فەڕزێن ئایینی.
هەر كەسێ ئێزدی پێگیریێ ب ڤان فەڕزا نەكت دێ گوننەهبار بت و ل رۆژا ئاخرەتێ رۆژا هەق و حسابێ دێ ئێتە سزادان دیسا دناڤ جڤاكی دا ژی نەیی دلخواز و خۆشتڤی یە و ب چاڤەكی سڤك لێ دنێرن ، فەڕزێن حەقیقەتێ (٥) فەڕزن و فەڕزێن تەریقەتێ (٦) فەڕزن ئەڤ برایێ ئاخرەتێ دبتە ئێك ژ ڤان فەڕزێن حەقیقەتێ 1_ شێخ 2- پیر 3_ هۆستا 4_ مەرەبی5_یار و برایێت ئاخرەتێ، فەرە هەر مرۆڤێ ئێزدی هەر ژ میرێ شێخا و بابا شێخ و هەتا بەلنگازەكی چ كور یان كچ شێخ و پیر و هۆستا و مەرەبێن خۆ دگەل برایێ ئاخرەتێ هەبن ، وهەر كەس ژ ڤان بەرپرسیارێ برا و مریدێ خۆیە ، ژبەركو د باوەریا مە ئێزدیان دا حەقیقەت و مالا هەق یا مرۆڤی پشتی مرنێ یە ، ئانكو پشتی گیان ژ لەشی جودا دبت و بۆ هەق و حسابێ دچت بەر دەستێ پەدشای، وێ رۆژێ خودانێن فەڕزێن حەقیقەتێ هەر (٥) پێنچ ل حەزرەتا پەدشای ئامادەدبن لێ ئەگەر خێر و گوننەهێن وێ هنجی ئێك بوون دێ جیێ وێ تاریستان بت هنگی شێخ و پیر و یار و برێت ئاخرەتێ دكارن داخوازا بەخشین و لێبۆرینێ ل جەم پەدشای ژێرا بكن و ژ تاریستانێ قورتال بكن لەوا دبێژین:شێخ فە رە _پیر نیشانە_ هۆستا و مەرەبی وەكی وانە _فەڕزا برایێ ئاخرەتێ فەڕزەك گرانە.
ل ڤێدەرێ دیار دبت برایێ ئاخرەتێ پتر هەر چار فەڕزێن دیتر گرنگیا خۆ هەیە ژبەركو ژ چینەكێ یە یان شێخە یان پیرە و برایێ ئاخرەتێ یە، لەوا فەرە هەر مرۆڤەكێ ئێزدی برایێ ئاخرەتێ هەبت چ كور یان كچ بت دەمێ دگەهتە هێمێ ژن ئینانێ فەڕە برایەكی ئاخرەتێ ژ شێخێ خۆ یان ژ پیرێ خۆ بگرت،هەروەسا كچ ژی دڤێت خوشكا ئاخرەتێ ژ شێخێن خۆ یان ژ پیرێن خۆ بگرت.
بن ئادەمۆ تو ل ڤێ دنێ مێڤانی
گەرەكە دەرباز بكە ب ئەدب و ئەركانی
هەر دێ رۆژەكێ زڤڕییە بەر دەستێت خودانی
سەر مە ئێزدیا فەرە پێگریێ ب فەڕزێن ئایینێ خۆ بكەین و كەرب و كینێ ژ دلێ خۆ پاڤێژین و خۆ ژ هەر تشتەكی حەرام دور بكەین ، پێگیری نەكرن ب ئەركان و رێورەسمێن ئایینی دجڤاكێ مەدا یێ شەرمەزارە و لجەم خودێ تەعالا ژی گوننەهبارە وەكی ل ڤێ سەبەقا قەولی دا هاتی:
دبێژمە وە گەلی گوننەهكارا
ڕێیا یار و برایێت ئاخرەتێ مەكەن بازارا
جیێ وە دۆژەیە و دەڤێت مارا
تُتاح هذه الصورة أيضا في: کوردی
