گەلۆ ما دەم نەهاتیە رژێما ئیرانێ یا ستەمكار بێتە رووخاندن؟
خالد خدر
نهۆ هەمی دەڤەر وب تایبەتی ئالاڤێن ڕاگەهاندنێ مژوولی دەنگ وباسێن روودانێت ل كۆمارا ئیسلامیا ئیرانێ چێبوین كو ل ڤان هەردوو حەفتیێت بۆری شەپۆلەكا خۆپیشاندانێت نەرازیبوونێ چێبوون ل دەڤەرێن جودا جوداێیت ئیرانێ،ل دەستپێكێ ل باژێرێ مەشهەد خۆپێشاندان هاتنە كرن وپاشی باژێرێت دی ڤەگرت،پتریا دروشمێت خۆپیشاندەرا ئەو بوون بلا رژێما ئیسلامی ب رووخیت و كاودانێت ئابووری و دكتاتۆریەتا رژێما خودانێت شاشكان هێ نەرازیبوونا وانن،نهۆ جیهان هەمی تەماشەی ڤان خۆپیشاندانێت هەنێ دكن و تشتێ كاریگەر وبالكێش ل ڤر كو رۆژ بۆ رۆژێ ئەڤ شەپۆلا خۆپێشاندانێت جەماوەری ل ئیرانێ زێدەتر لێتهێن و خورتردبن.
كۆمارا ئیسلامی یا ئیرانی هژمارا دانشتوویێن وێ نێزیكی (90) نۆت ملیۆن كەسی یە و داهاتیێ وەلاتی یێ سەرەكی لسەر نەفتێ یە و وەك یا دیار رەوشا وەلاتێن ژێدەرێ نەفتێ نە هند یا باشە ل دەڤەرێ ،ئیران وەك وەلاتێن دی یێن دكتاتۆری ل دەڤەرا رۆژهەلاتا ناڤین ، داهاتیێن خۆ ل كاروبارێن لەشكەری و ئەولەهییێ و هەوالگیریێ دا دمەزێخن و هاوەلاتیێن خۆ سەركۆت دكن و ستەمێ لێ دكن و رژێما ئیرانێ نموونەكی هەری پیسە دڤی باری دا كو ب سالانە ب دەهان هاوەلاتیێن خۆ ل سیدارێ ددەتن و ب شێوەكی دڕندانە ،ب تایبەتی هاوەلاتیێن رۆژهەلاتێ كورستانێ و گەلێن ئیرانێ د رەوشەكا زۆر خراب یا ئابووری دا دەربازدبن،هەروەسا رژێما ئیرانێ داهاتییەكی مەزن و زەبەلاح دمەزێخیت بۆ گرۆپێن تیرۆرستی یێن سەرب وان ڤە ، وەك رێكخراوا حزوبولللا یا لوبنانی ژبۆ كاروبارێن لەشكەری و كریاریێت تیرۆرستی ل لوبنانێ وسووریا ،هەروەسا بۆ چەكدارێن حەشدا شەعبی ل عێراقێ وەك گرۆپێن (هادی عامری ) ویێن (ابو مەهدی ئەلموهەندس) و( قەیس خەزعەلی ) و هندەكێن دی، و ل یەمەنێ ژی بۆ چەكدارێن حوسییان وشەرێ وان ل دژی ئالیگرێن سەرۆكێ یەمەنێ یێ شەرعی،ئیران ڤێ چەندێ هەمییێ ل دەڤەرێ ئەنجام ددەتن بێ چاڤدێری ،بەری چەندەكی وان بخۆ دا خویاكرن ولسەر زارێ مەزنە بەرپرسێن وان ، كو نهۆ ئیران چار پایتەختێن ئەرەبی ب رێڤەدبەتن ،ئەوژی (بەغدا و بەیروت و دیمەشق و سەنعا) ،و هاریكاری وپشەڤانیا بێ سنۆر یا رژێما ئیرانێ بۆ رژێما بەشار ئەسەدی دڤان حەفت سالێن بۆری دا ، كو ئەو ڤێ هەمی هاریكارییا دارایی و لەشكەری پێشكێشی ڤان گرۆپ و وەلاتێن تاگیرێن خۆ دكەتن ل دەمێ هاوەلاتیێن وی ژ برسا دمرن و پێدڤی پاریەكی نانی نە؟.
تشتێ سەرنج راكێش دڤان خۆنیشاندانێت نهۆدا چ كەس و ئالییەكی خۆ لێ نەكریە خودان ئانكو بتنێ مایە نەرازیبوونەكا جەماوەری ، بەلێ ئەگەر هۆسا پێڤە هەریت دێ بتە شۆرەشەكا جەماوەری یا مەزن ل دژی دەستهەلاتا خودانێت شاشكان ، تێتە زانین كو ل شوباتا سالا 1979 شۆرەشەكا هۆسا چێبوو ل ئیرانێ وسەرگرت و داوی ب رژێما شاهی ئینا، بەلێ جهێ داخێ بوو ئەڤان ستەمكارا خۆ لێ كرە خودان ودەستێ خۆ دەینانە سەر ڤێ شۆرەشا پاقژ،لپێ شرۆڤەكارێت سیاسی و رۆژنامەڤانی تێتە پێشبینی كرن كو ئەڤ خۆپێشاندانە بەرفرەهتر لێبهێن ،ل ڤێدەرێ پرسیارەك تێتە پێش گەلۆ مادەم نەهاتیە رژێما ئیرانێ یا ستەمكار بێتە رووخاندن؟،چنكو ستەما وێ گەلەك زێدەبوویە ل دەڤەرێ ژبلی مایتێكرنێت وێ یێن سۆروسۆر دكاروبارێن وەلاتێن دراوسێ دا ول عێراق وسووریا ب شێوەكی ئێكجار مەزن.
تُتاح هذه الصورة أيضا في: کوردی
