گەلێ كوردستانێ ب ئاهنگ وخۆشی لرۆژا ریفراندۆمێ دەنگێ خۆ دان ب بەلێ
خالد خدر 
لرۆژا 25-9-2017 گەلێ كوردستانێ ب هەمی پێكهاتەیێن خۆڤە چوونە سەر سندۆقێن دەنگدانێ و گۆتن بەلێ بۆ ریفراندۆما سەرخۆبوونا كوردستانێ ، رۆژەكا دیرۆكی بوو سەبارەت گەلێ كوردستانێ كو ئەڤە دەهێن سالایە ئەو چاڤەرێی ڤی رۆژا پیرۆز ، ریفراندۆما سەرخۆبوونا كوردستانێ بوو دیفاكتۆ سەرەرایی وان هەمی هەولێن هاتینە كرن ژبۆ راوەستاندن یان پاشئێخستنا وێ.
گەلێ كوردستانێ خودان ئیرادەیەكا بهێزە و بریارا چارەنڤیسێ خۆدا ، دڤێت وێ راستییێ بێژین كو هەوە سالا 1991 كوردستان نیمچە دەولەتەكا سەربخۆیە بەلێ پشتی رووخاندنا رژێما ستەمكاری ل سالا2003 گەلێ كوردستانێ جارەكا دی چوونە دگەل عێراقێ ئانكو ب حەز وئارەزوویا خۆ و سیستەمەكی فیدرالی پێكئینان ل عێراقێ و بلا راستییەكا دیرۆكا ژبیرا مە نەچتن كو بەریا سالا 1932 هیچ دەولەتەك نەبوو خودان سەروەری بناڤێ عێراقێ و دانپێدان پێ نەهاتبوو كرن بەریا ڤێ دیرۆكێ ژ ئالییێ كۆمەلا گەلان ڤە (عصبە الامم ) و بەریا سالا 1920 بتنێ سێ ویلایەت بوون ژ ویلایاتێن ئیمبراتۆرییەتا عوسمانی ئەوژی (ویلایەتا بەغدا و بەسرا و مووسل ) ئانكو عێراق نە دەولەت بوو بەریا وێ دیرۆكێ ، وژئەنجامێ شەرێ جیهانییێ ئێكێ و لدیڤ رێككەفتناما سایكس پیكو لسەر هەردوو ویلایەتێن بەغدا وبەسرا دەولەتا عێراقێ هاتە دامەزراندن ب سیستەمێ پاشایەتی ،وفیصل كورێ شەریف حوسێنی شەریفێ مەكەهێ یێ بناڤێ فیصلێ ئێكێ بریتانیا كرە شاهێ عێراقێ پشتی ژ سووریا هاتی دەرێخستن ،وپشتی هنگێ ب زۆری باشوورێ كوردستانێ گرێدان دگەل عێراقێ ،و لدیڤ پیلانەكا نێڤ دەولەتی كوردستان دابەشكرن ،و لدیڤ یاسایا نێڤ دەولەتێ هەر گەلەكی مافێ چارەنڤیسێ خۆ هەیە كو ئایندێ خۆ دیار بكن ، و ریفراندۆما كوردستانێ نە تاوانە و بەلكو مافێ گەلێ وێ یە ، وئەڤە نێزیكی 2700 سالایە كوردستانێ سەربەخۆیا خۆ ژدەست دایی ژ سەدەما پیلانەكا خیانەتكاری دژمنكارانە لسەر دەمێ ئیمراتۆرییەتا میدیا یا كوردی ، ئەڤە سەدێن سالایە گەلێ كوردستانێ خەباتێ دكت و قووربانییێ پێشكێش دكت ژبۆ رێیا ئازادییێ ، گەلێ مە هەمی شێوێ ستەم و ستەمكارییێ دیتی یە ژدەستێ رژێمێن عێراقێ یێن ئێك لپێ ئێك.
گەلێ مە ژبێ دەولەتی تووشی ئاوارەبوونێ و تەرحیلێ و تەعریبێ و مالوێرانییێ بوون ، ژبلی خرابكرنا گوندا و ژناڤبرنا ژێرخانەیا ئابووری و تێكدانا كەسایەتییا تاكێ كوردستانی ، ویا ژهەمییێ خرابتر بكارئینانا چەكێ كیمیاوی ل دژی مللەتێ مە و ئەنفالێن رەش بسەر مەدا سەپاندن ، و راپەلێ ژ هەمییێ خرابتر و دلتەزین تر دژمنا ل دژی گەلێ كوردستانێ بكارئینای ، شەرێ تیرۆرستێن داعش بوو ل تەباخا سالا 2014 ، كو هێرشەكا دڕندانە و كێم وێنە ئینانە سەر كوردستانێ ، و تاوانێن مەزن هاتنە ئەنجام دان ل دژی گەلێ كوردستانێ ب تایبەتی ل دژی خەلكێ مە یێ ئێزدی ل شنگالێ كو هەر تاوانەكا دووری رەوشت و بنەمایێ مرۆڤایەتی هاتە كرن ل دەرهەقا ئێزدیان دا ، داعشێن هۆڤ ئێزدی تووشی جینۆسایدێ و قركرنێ كرن ، سەركردایەتییا سیاسی یا كوردستانێ و سەرۆك مسعوود بارزانی بریارەكا ژیرانە و دیرۆكی و گونجای دان ب ئەنجامدانا ریفراندۆمێ دڤی دەمی دا ، و گەلێ كوردستانێ ب ئاهنگ وخۆشی لرۆژا ریفراندۆمێ دەنگێ خۆ دان ب بەلێ ، و ئەو رۆژە كرنە جەژن و شادی وچاڤەرێی سەرخۆبوونێ.
تُتاح هذه الصورة أيضا في: کوردی
