چارەنڤیسێ شنگالێ هەلاویستی مایە
جیهان عەبۆ 
بێ گۆمان شنگال باژێرەكَ كوردستانی یە و پرانیا ئاكنجیێن وێ كوردێن ئێزدینە، لێ پشتی كارەستا رەش یا ژلایێ تیرۆرستێن داعش ڤە ل سەر عێراقێ و ب تایبەت دەڤەرێن ئێزدیان زۆرترین قوربانیێن ڤێ پەلامارا تیرۆرستی بوون ل گشت عێراقێ بگرە ژ كوشتن و تالانكرن و رەڤاندنا كچ و ژنان و گهۆرینا ئایینێ زارۆكێن ئێزدیان و فێركرنا وان بۆ كارێ توند و تێژیێ و خۆ پەقاندن ئەڤە حەموو نەبەس بوو ، لێ نۆكە ژی پرسیار ئەوە شنگال بوویە جیێ مەیدانا ململانا پارت و لایەنێن سیاسی ، چۆل نەكرنا شنگالێ ژلایێ ئەڤان لایەنێن سیاسی ڤە چارەنڤیسێ شنگال هەلاویستی مایە و بەرەف ووندا بوونێ دچت ؟،ژبەر چی شنگال نائێتە ئاڤەدانكرن ؟ ئەرێ چارەسەری چیە ؟ ژبەركو بوویە مەزنترین قوربانیا دەستێ داعشێ ل عێراقێ و هەتا نۆكە ژی ئەڤ كارەساتا رەش یا بەردەوامە.
شنگال باژێرەكێ كوردستانی یە ب درێژاهیا دیرۆكێ و خودان قوربانی و بەرخوەدانە ، ل سەر دەمێ هێرشێن دەولەتا ئۆسمانی و رژێما بەعس ل بەر خوەدایە و چیا و دەڤەرا خۆ پاراستنە و ل سەر جی و وارێ خۆ مایە ، لێ نۆكە رەوش ل وێدەر جوودایە، ژبەركو شنگال و شنگالی چارەنڤیسێ وان ووندایە ژبەر هەبوونا چەندین پارت و لایەنێن سیاسی ل ژێر ناڤ و ئالایێن جوودا دا ل وێ دەڤەرێ ئێزدی نشین و دبنە قوربانیێن ململانا لایەنێن سیاسی ، لەورا ئەز دبینم پیتڤیە حزبێن هاریكاربوون دئازادكرنا شنگالێ دا دگەل پێشمەرگەی ڤەگەرنە سەر جیێ خۆ و خەلكێ شنگالێ هەردەم دبێژت باشترین چارەسەری ئەوە كو سۆپاسدارێ وانن و كارەكێ مرۆڤایەتی بوو كو هاریكاریا مە كرین ژبۆ رزگاركرنا ئاخا مە و ئەو لایەن شنگالێ چۆل بكن و هێزەكا تایبەت ب گەنجێن ئێزدیان و شنگالیا دروست بكن ، ژبەر ئەڤان لایەنێن ململانكار كو ژبەر هەبوونا وان ل وێدەر رێكخراوێن نێڤ دەولەتی نكارن دەڤەرا وان ئاڤابكن ، بێ گۆمان بووینە رێگر بەرامبەر كەیسا جینۆسایدا ئێزدیان ل دادگەها نێڤ دەولەتی ، ئەڤ چەندە بوویە سەدەمێ نەڤەگەریانا وان ژبەركو زۆربەیا ئاوارەیان ژترسا نەخۆشكرنا ژیانا زارۆكێن وان ، رێگرن بۆ پاراستنا نێڤ دەولەتی بۆ دەڤەرێن ئێزدیان ، پشتی چۆلكرنا ڤان لایەنێن ململانكار ژ ئەڤێ دەڤەرا زولم لێكری ، ئەركە ل سەر حكومەتا عێراقێ و هەرێمێ ب زووترین دەم ڤێ دەڤەرێ ئاڤەدان بكن ، بانگ و هاوارا وەلاتێن ئەورۆپی و بیانی و نێڤ دەولەتی مینا یوئێنێ بكن كو سەرەدانا ئەوان گۆرێن بكۆم بكن،ژبەركو ئەو بەلگێن گەلەك بهێزن هەردیسان ب سەدەهان چیرۆكێن تراژیدی و دل هەژین ل ڤی وەختێ هەستیار دا ل شنگالێ هەنە باشترین بەلگەنە بۆ ناساندنا كەیسا جینۆسایدا ئێزدیان ل دادگەها نێڤ دەولەتی.
دیسان دبینم بۆ ئاڤەدانكرنا شنگالێ هەر پارتەك چۆل بكت ئەو دێ شنگالێ ئاڤەدان كت و دێ گەلەكێ ژ نەخۆشیێ و دەردەسەریێ ئاوارەبوونێ رزگار كت ، هەر پارتەكا ئێكەم جار ئەڤێ پێنگاڤێ پاڤێژت و دەستبەردارێ شنگالێ بت و بێژت ئەز هاتبووم دەڤەرێن وان رزگار بكەم نەك داگیر بكەم،بێ گۆمان دێ پارتێن دن ژی چاڤ لێكەن، چارەسەریا ڤێ چەندێ د دەستێ شنگالیا دایە لەورا دڤێت دڤی وەختێ هەستیار دا براتیا خۆ بهێز بكن و ئێك دەست بن و گەلەكێ ژ ئاوارەبوونێ و مالوێرانیێ رزگار بكن،هزرا رزگاركرنا كچ و ژنێن مە یێ مای بكن ، هزرا نڤشێ داهاتی یێ ئێزدیان بكن ، هزرا ئاڤەدانكرن و چارەنڤیسێ گەلێ خۆ بكن ئەگەر نە شنگال دێ دەڤەرەكا هەلاویستی مینت دناڤبەرا پارت و لایەنێن سیاسی دا و چارەنڤیسێ وێ دێ ووندا بت ، دڤێ چەندێ دا دێ زەرەرمەندێ ئێكێ هەر خەلكێ ئێزدی یە و شنگالی ب خۆ نە.
تُتاح هذه الصورة أيضا في: کوردی
