بەراوەردییەك دناڤبەرا رەوشا شنگالێ و باشیك وبەحزانێ دا!!
خالد خدر 
تێتە زانین كو پتریا دەڤەرێن كوردێن ئێزدی كەفتنە بەر هێرشا داعش ل تەباخا سالا 2014ێ، ب تایبەتی ئەو دەڤەرێن ژئالیێ ئیداری ڤە سەرب پارێزگەها نەینەواڤە و ب شێوەیەكێ تایبەتی دەڤەرا شنگالێ و ناوچەدارییا باشیك وبەحزانێ.
نائێتە ڤەشارتن ول پێش چاڤێن حەموو جیهانێ ئێزدیێن شنگالێ تووشی پیسترین وكرێترین رەنگێ زۆرداریێ بوون ژ دەستێ درندەیێن داعش كو كوشتن و رەڤاندن و سەبیكرنا ژن وكچان ل دژی ئێزدیێن شنگالێ هاتنە ئەنجامدان ،سەرەرایی وێرانكرنێ وخرابكرنێ وتێكدانا ژێرخانەیا شنگالێ وتشتێ ژ حەموویێ مەزنتر وگرنگتر كو نۆكە دەڤەرا شنگالێ بوویە جهێ هەڤركی و ناكۆكیێن گرۆپێن چەكدار ، و ململانێیەكا دژوار ل شنگالێ دئێتە كرن ژئالیێ ڤان گرۆپ و ئالیێن سیاسی و چەكداری ڤە و نۆكە رەوشا شنگالێ ئالۆزتر لێهاتیە پشتی هاتنا چەكدارێن حەشدا شەعبی و گەهشتنا ژمارەكا چەكدارێن ئێزدیان بۆ ناڤ رێزێن حەشدا شەعبی، و بێ گۆمان ئەڤێ چەندێ ژی كارتێكرنێن خۆ یێن نیگەتیڤ هەنە ل سەر رەوشا دەڤەرا شنگالێ ، كو پرۆسێسا زڤراندنا خەلكێ وێ یێ ئاوارە ل ناڤ كەمپان دا گیرۆكریە و هیڤیێن دووبارە ئاڤەدانكرنێ تێكدایی نە ، و یا ژ حەموویێ خرابتر هەبوونا گرۆپ و ئالیێن سیاسی و چەكدارێن ژ دەرڤەی یاسایێ وەكرییە ئەو دەڤەر ببتە گۆرەپانەكا نە رەوا بۆ ئەنجامدانا ئەنجدایێن وەلاتێن هەرێمایەتی و یێن هەڤرك ل سەر سامان وتماكاریێن دەڤەرێ ژئالیەكێ ڤە ، وژ ئالییەكێ دی ڤە شنگال بوویە ژینگەهەكا خۆش و بەرفرەهە ژبۆ كوشتن و تالانكرنێ و بجهئینانا تۆلڤەكرنێن كەسۆكی و رەگەزپەرستییا بەرتەنگ یا كو تەنها ئێزدی بووینە قوربانیا وێ ب درێژاهیا دیرۆكێ ، دئەنجام دا ئێزدیێن خەلكێ شنگالێ باجا ڤێ چەندێ حەموویێ داینە و هەتا نۆكە ژی ددەن و قوربانیێن ڤێ سیاسەتێ هەر ئەوبخۆنە،ئەگەر بەرێ خۆ بدەینە رەوشا باشیك و بەحزانێ و ئاورەكا هوور لسەر بدەین ، و بەراوەردییەكێ دناڤبەرا رەوشا شنگالێ و باشیك وبەحزانێ دا بكەین ، كو دوو دەڤەرا ئێزدیان یێن زیندی و ئیستراتیجی هەر چاوابە شنگال گرنگترە و مەزنترە و بناڤ ودەنگترە ، بەلێ باشیك و بەحزان ژی رولێ وان نەیێ كێمە ل سەر ئاستێ جڤاكێ ئێزدیان ، كو دئێتە هژمارتن وەك بنگەهەكێ رەوشەنبیری و ئێزدیناسیێ و جهێ قەوالێن ئێزدیایە و هتد…، خەلكێ باشیك وبەحزانێ و پشتی دەڤەرا وان هاتیە ئازادكرن لبن دەستێ هۆڤێن داعش ئەوان دووپاتكر كو ئەو گەلەكی پێشكەفتی و شارستانی یە ، كو دەست ب ئاڤەدانكرنا دەڤەرا خۆ كرنەڤە وەك كارەكێ ب كۆم ول سەر ئەركێ خۆ دەست ب پاقژكرن و ئاڤەدانكرنا باژێرێ خۆ كرن ، هەروەسا ب شیانێن خۆیێن تایبەت بێی هیچ جهەكی حكومی یان رێكخراوەكا مرۆڤایەتی یان خێرخوازی هاریكاریا وان بكەتن ئەوان حەموو قووب و مەزارگەهێن خۆ جارەكا دی ئاڤاكرن یێن هاتینە پەقاندن و ژناڤبرن ژئالییێ داعش ڤە.
ئەم دكارین گەلێ یان خەلكێ باشیك وبەحزانێ وەك گەلێ ئەلمانی بدەن دیاركرن ل دەمێ شەرێ جیهانیێ دووێ ب داوی هاتی و دئەنجامدا وەلاتێ وان وێرانبووی گەلێ ئەلمانی حەموویا بهەڤرا ژنوو دەست هاڤێتە ئاڤادانكرنێ و وەلاتێ خۆ نووژنكرن و گەهاندنە ئاستێن بلند و نۆكە ئەلمانیا وەلاتەكێ خودان سەنگ وبەهایە ژئالیێ ئابووری و سیاسی و لەشكەری ڤە وئەز دكارم بێژم گەلێ باشیك وبەحزانێ نەكێمترە ژ چوو گەلێن دی ئەگەر دەرفەتێن باش و گونجای بۆ وان بێنە پێش و دئازادبن وب مەرجەكی چوو گڤاشتنێن سیاسی وئاینی ل سەر وان نەبن.
تُتاح هذه الصورة أيضا في: کوردی
