داعشێن ناڤخۆیی
كۆڤان حسێن
دبیت په‌یڤا داعش پشتی هه‌یامه‌كا دی بیته ئیدیه‌مه‌كێ سیاسی بۆ ره‌نگه‌گێ توندره‌وی و هۆڤاتیا مرۆڤان بهێته بكارئینان، یان بۆ هه‌ر كاره‌كێ درونه‌د بهێته بكارئینان، داعشێ نموونه‌كا زه‌لاتا هۆڤاتیا مرۆڤان نیشا دا، ئیدیه‌مه‌ك ل فه‌رهنگا سیاسی و زانستێ تاوانێ زێده كر، ئێدی داعش و فاشیزم و نازیزم و شوفینیزم و گه‌له‌كێن دی دێ هێنه گۆتن بۆ ره‌فتارێن مرۆڤان، داعش وه‌ك بزاڤه‌كا تیرۆرستی دبیت ژناڤ بچیت و دبیت شینوارێن وێ یێن (فیزیكی) وه‌ك رێكخراو نه‌مینن یان لاواز ببن، لێ هزێن داعشێ و ره‌فتارێن داعشێ كت كته دێ گه‌له‌ك مینن، هه‌می جڤاكێن ده‌ڤه‌رێ پێدڤی ب (ڤاكسینه‌كا) تایبه‌تن بۆ خوه پاراستنێ ژ هزرا داعشێ، ل كوردستانێ ژی ئه‌گه‌ر جڤاك و ده‌وله‌ت دهشیار نه‌بن ئه‌و ژینگه‌ها داعش دخولقینیت ره‌نگه ده‌رفه‌تا دووباره‌بوونا هنده‌ك كه‌سێن هه‌لگرێن هزرا داعشێ په‌یدا بن، هزرێن داعشێ ل ژینگه‌هێن هه‌ژار و جڤاكێن بێ كار و وه‌لاتێن بێ عه‌داله‌ت و نه‌خوینده‌وار و پری گه‌نده‌لی سه‌رهل دده‌ن، و ل كوردستانێ ژی ژینگه‌هه‌ك وه‌سا هه‌یه و ئاماژه ژی هه‌نه كو ئه‌ڤ ره‌نگه هزرا درونده جهێ خوه بگریت و زۆر كه‌س هه‌نه ب راستی یان داعشن یان (داعش كێم ربعه‌كن)؟! ئه‌ڤه مه‌ترسیه‌كا مه‌زنه و دبیت ل ده‌مێ شه‌ری هه‌ست پێ نه‌هێته‌كرن، لێ دبیت پشتی ده‌مه‌كێ دی گه‌ف بن ل سه‌ر ئاسایشا جڤاكی. كوردستان پشتی شه‌رێ داعشێ پێدڤی ب شه‌ره‌كێ دی یه دگه‌ل هه‌ژاریێ دگه‌ل بێ كاریێ دگه‌ل گه‌نده‌لیێ دگه‌ل قورغكاریێ دگه‌ل ژێده‌رێن هزری یێن هزرا داعشێ دگه‌ل (جه‌هاله‌تێ) دگه‌ل فاكته‌رێن توندوتیژیێ ب هه‌می ره‌نگ و ناڤا، ئه‌ڤ شه‌ره ب پێشمه‌رگه‌ی ناهێته كرن، ب چه‌كێ(میلان) ناهێته‌كرن. ب ژماره‌كا یاسایێن دژوار و ب ژماره‌كا رێنمای و په‌روه‌رده‌كا ساخله‌م و مینبه‌ره‌كا (ئیسلامیا) كورده‌واریا دروست و دوور ژ وان نڤشت و پرتووكێن توندیێ دكه‌نه ئالاڤێ مرۆڤان. دهێته‌كرن، هندی ل وه‌لاتێ مه دادی و وه‌كهه‌ڤی و كار و پرۆژێن مرۆڤ دوست هه‌بن، هندی هه‌ژاری و نه‌داری و نه‌خوینده‌واری ل وه‌لاتێ مه ل كێمێ بده‌ت هنده جڤاك موكم دبیت ل به‌ر هزرێن داعشێ و هه‌ر هزره‌كا دی یا توندره‌و. هندی ژیانا سیاسی یا ساخله‌م و زه‌لال بیت هندی جڤاك ئاگه‌داری هه‌می پێشهات و ڤه‌رێژا سیاسیان بیت هندی به‌شداریا ئه‌رێنی یا ب هێز بیت د دروستكرنا بریارا سیاسی و ئابووری دا.
هنده‌ك جڤاك دێ خوه ب خودانێ وه‌لاتێ خوه زانیت و ده‌رفه‌ت بۆ هزێن داعشێ و یێن وه‌ك داعشێ كێمتر دبیت، ب باوه‌رم كه‌سێن هزرا داعشێ هه‌ی كه‌سێن ب تنێ خوه پیرۆز و راست دزانن پری كوردستانێ نه، ژ من ڤه ب تنێ وه‌خت نه‌دیاره ئه‌گه‌ر دێ رۆژه‌كێ راستی گیانێ ڤی جڤاكی بن.
تُتاح هذه الصورة أيضا في: کوردی
