كا..چاكسازی د (پارتی) دا
كۆڤان حسێن
پارتی ژ ئه‌نجامێ دابه‌زینێ ژ چیا بۆ باژێران ژ ئوردیگایێن په‌نابه‌ریێ بۆ ئیدارا وه‌لاته‌كی. پارتی بوویه سازیه‌كا مه‌زن و ئورگانه‌كێ ب قه‌ره‌بالغ و تێر كاراكته‌ر. راسته پارتی ژ هه‌می ئالێن دی پتر كۆنگره گرێدانه، لێ پرانیا كۆنگرێن پارتی نه د وه‌ختێ خوه دا هاتینه ئه‌نجام دان. یان ئاوارته بووینه یان گیرو بووینه، پرانیا سازیێن پارتی وه‌ك كادرێن پارتی ب خوه ئاماژێ بۆ دكه‌ن پێدڤی ب دووباره پێداچوون و گوهارتنانن. سازیێن پارتی هه‌می و هه‌یكه‌لێ وێ و فه‌لسه‌فا رێكخستنا وێ وێ پێدڤی ب چاكسازیه‌كا مه‌زنه، پارتی دڤیا دگه‌ل قه‌بارێ ئارمانجا نوكه هه‌لگرتی بۆ ده‌وله‌تبوونێ بیر و فه‌لسه‌فه و رێكخستنا خوه ب شێوازه‌كێ دی ساز بكه‌ت، ناهێته ڤه‌شارتن و ئاشكرا سه‌رۆك بارزانی دیار كریه پارتی پێدڤی ب چاكسازیێ یه، ب وی ئاوای بیت دگه‌ل قه‌بارێ نوكه بگونجیت، پارتی دڤیا به‌رسڤا هنده‌ك پرسیارا هه‌بیت، ل سه‌ر هه‌نوكه‌یا كوردستانێ و ئاینده‌ی، ئه‌رێ بۆچی پارتی ب تنێ نوكه خوه میراتگرا ڤێ حكوومه‌ت و سه‌ربۆرا كوردستانێ دزانیت ل ده‌مه‌كێ هه‌می ئالی پشكداری ژیانا سیاسی نه، پشكداری ل حكوومه‌تێ و پشكداری ل ژیانا سیاسی ژێك جودانه، ژ لایه‌كێ دی ڤه كاركرن ل گه‌ل هه‌یكه‌لێ پارتی بێته خومالیكرن و كارێ سیاسی و بازرگانی د ناڤ كاراكته‌رێن پارتی دا بێته جودا كرن، ئه‌و په‌رێ شه‌فافیه‌تێ ل سه‌ر ملك و دارایی یا پارتی دیار بیت. ئاستێ په‌یوه‌ندیێن پارتی یێن نه‌ته‌وه‌ی زێده‌تر زه‌لال بن و پارتی سه‌نگا خوه‌یا جاران ڤه‌گه‌رینیت گه‌ر بۆ به‌ره‌ف ئاره‌ستا چاره‌سه‌ریا پرسا كوردی ل پارچێن دی یێن كوردستانێ، چاكسازی د پارتی دا ب تنێ دڤێت گوهارتنا هنده‌ك كه‌س و كاراكته‌را نه‌بیت. به‌لكو دڤیا پارتی به‌رسڤ بۆ زۆره‌كا پرسێن سیاسی و ئابووری و جڤاكی یێن كوردستانێ هه‌بیت، كاركرنا پارتی ب تێگه‌هێ (بنكه و رێكخراو) بۆ شێوه‌یێ په‌یوه‌ندیێن هه‌نوكه‌یێن كوردستانێ نه‌گونجیا و ئه‌ڤ هه‌یكه‌لێ(به‌لشه‌فیكا) بۆ پارتی (70) سال سه‌را ده‌رباز بوون. پارتی بۆ چاكسازیێ پێدڤی ب هنده‌ك بریارێن ب وێره‌ك هه‌یه، وه‌ك دیار پارتی ژ هه‌می ئالیان پتر پێدڤی ب كۆنگره‌كێ (نوعی) هه‌یه، گوهۆرینێ د هه‌می ئاستێن پارتی دا بكه‌ت، پارتی ده‌وله‌مه‌ندترین حزبا كوردستانێ یه ژ ئالیێ هه‌بوونا شیانێن گه‌نج و تازه ڤه، ره‌وشا كوردستانێ و عیراقێ و شه‌رێ داعشێ، ئه‌ڤجا هندی پارتی له‌زێ ل چاكسازیا خوه نه‌كه‌ت و پرۆژێ سه‌رۆك بارزانی بۆ چاكسازیا پارتی زێده‌تر گیروبوونێ هه‌لناگریت و هه‌لكه‌فت ب له‌ز ده‌رباز دبن، پارتی ل سه‌ر و به‌ندێ گوهۆرین و چاكسازیا راستی خافیه‌كا به‌رچاڤ بوویه، له‌ورا چاكسازی بۆ پارتی روتینه‌كا دی یه بۆ ئارمانجا مه‌زنا كوردستانێ كو پارتی سه‌ركێشیا وێ دكه‌ت.
تُتاح هذه الصورة أيضا في: کوردی
