ئێزدیان ئۆمێد ب حكوومەتا عێراقێ و جڤاكێ نێڤ دەولەتی نەمایە
بەختیار قادر
كارەساتا دلتەزینا ب سەرێ خەلكێ بێ گونەهێ شنگالێ دا هاتی ژبال توندرەوترین رێكخراوا تیرۆرستی یا داعشێ ڤە،ووژدانا جیهانێ هەژاند ژئەنجامێ كریارێن هۆڤانە یێن تیرۆرستان دژی كوردێن ئێزدی ئەنجامداین،بگرە ژ كوشتن و گرتن و سەبیكرن وكرین و فرۆتنا كچ و ژنان وئاوارەبوونێ،د هەمان دەم هێشتا جڤاكێ نێڤ دەولەتی و رێكخراو و سازیێن پاراستنا مافێ مرۆڤی یێ تەماشەی تاوانێن ڤان تیرۆرستان دكن ددەرهەقێ ئێزدیان دا،ئەرێ كەنگی دێ ئێنە سەر هێلێ بۆ ساخكرنا مرۆڤایەتیێ ئەوا ل چەرخێ بیست و ئێكێ مری.
رۆژا 3/8/2016دبتە دووەمین سال ل سەر بیرەوەرییا كۆمكوژیا ئێزدیان ل شنگالێ،هێشتا ب هەزاران گرتیێن ئێزدی ددەستێ هۆڤێن تیرۆرستێن داعشێ دانە،رۆژانە راستی نەخۆشیان دبن ل ژێر دەستێ تیرۆرستان،ل ڤێ بیرەوەریێ دا كو ب چەندین چالاكیان ل سەرانسەری جیهانێ هاتە ساخكرن جارەكا دی ئێزدیان بانگ و داخوازیێن خۆ گەهاندنە سازیێن مرۆڤی و جڤاكێ نێڤ دەولەتی كو ئێدی تەماشەڤان نەبن و ب كریار و جدی كاربكەن بۆ رزگاركرنا ئێزدیان،چنكو ئەو دبینن بزاڤ وپشتەڤانیا نێڤ دەولەتی نە ل ئاستێ پێدڤی دایە،سەر ڤان هەموو تاوانێن كو ب دژی مرۆڤایەتیێ دئێنە هژمارتن هێش جیهان یا بێ دەنگە و ب ئەركێ خۆ رانەبوویە هەمبەری دۆزا ئێزدیان،گەلۆ هەتا نۆكە وژدانا مرۆڤی ل جیهانێ نەهاتیە هەژاندن یان چنكو كوردێن ئێزدی نە چوو بزاڤ بۆ ئازادكرنا وان نائێن كرن،ژبەركو بچووكترین تاوانا مرۆڤی ددەرهەقێ كەسەكێ بێتە كرن ل جیهانێ هەتا وی رادەی كو ژبال چەند كەسان ڤە هاتبتە ئیشاندن و ل راگەهاندنێ بابەت بێتە بەلاڤكرن،هەموو سازیێن مرۆڤی دێ ل دووڤ دا چن و دووڤچوونێ ل سەر دكن و ئیدانە دكن و ڤی قەبارەیێ مەزنێ كارەساتا ئێزدیان ل پێش چاڤ نابینن و گرنگیێ پێ نادەن.
مرۆڤایەتی رۆژ بۆ رۆژێ ل جیهانێ یا بەرەف نەمانێ و مرنێ دچت، حكوومەتا هەرێما كوردستانێ هەتا نۆكە نەبت،جهەكێ دی خۆ ب كەیسا ئێزدیان نەكریە خودان و داخوازێ ژ هەرێمێ دكەم پتر هەولێن خۆ بێختە كاربۆ قورتالكرنا ئێزدیان یێن هەتا نۆكە ددەستێ داعشێ دان،ژبەركو ئێزدیان چ ئۆمید ب حكوومەتا عێراقێ و جڤاكێ نێڤ دەولەتی نەمایە.
تُتاح هذه الصورة أيضا في: کوردی
