پارتی د ناڤبه‌را به‌غدا و سه‌رخۆبوونێ دا
كۆڤان حسێن
پارتی نوكه خوه ب هه‌لگرا ئالایێ سه‌رخۆبوونێ دزانیت و د هه‌می واره‌كی ژی دا بزاڤێ بۆ دكه‌ت, باروه‌رناكه‌م پارتی سه‌رخۆبوونێ وه‌ك پرۆپاگنده‌كا سیاسی ب كار بینیت. یان بۆ ره‌ڤینێ ژ هنده‌ك قه‌یرانێن كوردستانێ بیت، وه‌ك نه‌یارێن پارتی دبێژن, لێ تشتێ بالكێش ئه‌وه مانا پارتی ب ڤێ قورسایه‌تیێ ئایه باوه‌ریه ب عیراقێ یان (شعره معاویه) یه هێشتا ئه‌م عیراقینه ل سه‌ر كاغه‌زێ؟َ راستی دبیت پارتی ژی د ڤی واری دا سیاسه‌ته‌كا كه‌توارانه ئه‌نجام بده‌ت, سه‌رخۆبوون پرۆژه‌یه و مه‌رج نینه سه‌ر بگریت و مه‌رج نینه ژی سه‌خۆبوون نوكه بیت.
به‌غدا بۆ كوردان هێشتا پایته‌خته, هه‌ر چه‌نده هیچ مه‌رجه‌كێ پایته‌ختبوونێ بۆ كوردان تێدا نه‌مایه, لێ ب حوكمێ تاریخ و جوگرافیایێ به‌غدا جیرانه‌كا ئه‌زه‌لیه بۆ كوردستانێ, بابه‌تێ ژێ ستاندنا باوه‌ریێ ژ به‌رێز هشیار زێباری ئه‌و چه‌نده ئازراند كو زێباری سیاسیه‌كێ پارتیه ل به‌غدا و مانا وی ل ده‌ستهه‌لاتا به‌غدا, راستی بۆ پارتی جهێ پرسیارێ یه ل ڤی ئاستێ بلند هێشتا د حكوومه‌تا عیراقێ دا؟! ئه‌رێ پارتی هێشتا پیچه‌كا باوه‌ریێ ب به‌غدا مایه یان ژی ب ئه‌ڤا پارتی دكه‌ت ب تنێ گڤاشتنه ل سه‌ر به‌غدا؟! باوه‌ر ناكه‌ن پارتی و بارزانی ب تایبه‌تی هیج ره‌نگه باوه‌ریه‌ك ب ئێگرتنا عیراقێ ما بیت و هه‌بوونا كه‌سایه‌تیه‌كێ پارتی وه‌ك هشیار زێباری ل به‌غدا ره‌نگه بۆ پارتی قورس بیت، لێ د سیاسه‌تێ دا مه‌حال نینه هێشتا روویێ دروستێ رۆژهه‌لاتا ناڤین ب تمامی زه‌لال نه‌بوویه و پارتی خواندنا خه‌له‌ت ناكه‌ت بۆ پێشهاتێن ب له‌ز ل ده‌ڤه‌رێ, حكوومه‌تا عیراقێ ب خوه رۆژانه وێ راستیێ دیار دكه‌ت كو حكوومه‌ته‌كا به‌رپرس نینه ژ وه‌لاتیێن خوه ل سه‌رئاستێ هه‌می عیراقێ و ئه‌و ب خوه پالده‌ره‌كا سه‌ره‌كیه.
كورد و پاشی سونه ژی بیر ل شێوه‌كێ دی یێ په‌یوه‌ندیێ دكه‌ن دگه‌ل به‌غدا مینا (كومنویلسه‌ك عیراقی) بۆ وه‌لاتێن سه‌ربخۆ؟َ! ئه‌ز باوه‌رم ئه‌گه‌ر پارتی نه‌چاری هه‌لبژارتنێ بكه‌ن به‌غدا یان سه‌رخۆبوونێ، پارتی بێ دودلی دێ سه‌رخۆبوونێ هه‌لبژێریت. لێ چ ره‌نگێ سه‌رخۆبوون و د چ قه‌باره‌ی دا؟َ! هشیار زێباری ژی ب خوه به‌شه‌كه ژ حكوومه‌ته‌كا گه‌نده‌ل ل به‌غدا وه‌ك كه‌س دبیت یێ پاك بیت، لێ ئه‌و بخوه ئه‌ندامێ حكومه‌ته‌كا تائیفی و گه‌نده‌له, ئه‌ڤه راستیه‌كه دڤێت باوه‌ریێ پێ بینین و پاشی پارتی كۆمه‌كا نه‌یارێن سیاسی ل عیراقێ و كوردستانێ هه‌نه دبیت هشیار زێباری باجا سیاسه‌تا پارتی بده‌ت ل به‌غدا و پارتی دڤیا پتر ئاماده بیت باجێ بده‌ت نه‌مازه بۆ پرۆژێ سه‌رخۆبوونێ.
تُتاح هذه الصورة أيضا في: کوردی
