پرسا شنگالێ و بازرگانیكرن!
حكمه‌ت زێوكى
هه‌ر كاره‌ساته‌كا ل جهه‌كی روو بده‌ت، هنده‌ك ئالی بۆ خوه ب ده‌لیڤه دزانن كو ئه‌جیندایێن خوه بێخنه كاری و وێ كاره‌ساتێ بۆ به‌رژه‌وه‌ندیێن خوه یێن تایبه‌ت بكار بینن، چ ل سه‌ر ئاستێ نیڤده‌وله‌تی بیت و چ ل سه‌ر ئاستێ هه‌رێمی یان ژی ناڤخۆیی بیت. هنده‌ك ئالی به‌رژه‌وه‌ندیێن خوه پێ دپارێزن و هنده‌ك ژی بازرگانیێ پێ دكه‌ن، بێگومان بازرگانیكرن ژی هه‌ر بۆ ب ده‌ستڤه‌ئینانا به‌رژه‌وه‌ندیانه.
به‌ری دو سالان، ئانكو ل 3/8/2016 تیرۆرستێن داعش ب سه‌ر ده‌ڤه‌را شنگالێ دا گرت و ژ هه‌می ئالیان ڤه وێران كر، هه‌تا كو ب هزاران كچ ژن و زارۆك و گه‌نج و دانعه‌مرێن ئێزدی گرتن و ب ده‌هان هزار ژی ده‌ربه‌ده‌ر بوون و هه‌تا نها ژی ب هزاران كچ و ژنێن ئێزدی دبێ سه‌روشوونن، هه‌روه‌سا ته‌ڤكوژی ب سه‌رێ وه‌لاتیێن ئێزدی ئینا هه‌تا نها ب ده‌هان گۆڕێن ب كۆم هاتینه ئاشكراكرن كو ب سه‌دان كچ و ژن و زارۆ و گه‌نجێن ئێزدی تێدا هاتینه بن ئاخكرن. هه‌كه ل گۆر ستانداردێن جیهانی ته‌ماشه بكه‌ین پێدڤیه ئه‌ڤ ته‌ڤكوژیا ئێزدیان وه‌كو جینوساید بهێته هژمارتن، چونكی مه‌رجێن جینوسایدێ ئه‌وه كو ژناڤبرنا هه‌موو یان پشكه‌ك ل سه‌ر پرسا نه‌ته‌وه‌یی، ئایینی، نه‌ژادی ته‌ڤكوژی ل هه‌مبه‌ر بهێته‌كرن یان ده‌ست درێژیا سكسی ب زۆری لێ بهێته‌كرن. له‌ورا وه‌كو یا دیار ئێزدی ل سه‌ر ئولێ و نه‌ته‌وی و نه‌ژادی هاتینه كوشتن و ب ده‌هان گۆڕێن ب كۆم هاتینه دیتن و شاهدێن بوویه‌رێ ژی هه‌نه. لێ بۆچی هه‌تا نها وه‌كو پێدڤی كار ل سه‌ر باده‌كا ناساندنا جینوسایدێ نه‌هاتیه كرن؟.
ل ڤێرێ ژ نوو دێ ل بابه‌تی زڤرم یێ من ئارمانج پێ هه‌ی! مخابن گه‌له‌ك هێز و ئالیێن كوردی، كو ئێزدی ب خوه ژی ل گه‌لن خوه ل ڤێ پرسێ كریه خودان و بێگومان هه‌ر ئێكی به‌رژه‌وه‌ندیه‌ك هه‌یه، هێشتا شنگالێ یا پڕه ژ وان هێزێن رۆندكێن تیمساحان بۆ شنگالێ دبارینن و مزایدێ ب خوین و رۆمه‌تا قوربانیێن شنگالێ دكه‌ن، چونكی مرۆڤ دبینیت چه‌ندین رێكخراو و سه‌نته‌ر دبێژن ئه‌م ڤه‌كۆلینان ل سه‌ر كاره‌ساتا شنگالێ دكه‌ین و دێ ڤێ باده‌كێ گه‌هیننه ئالیێن په‌یوه‌ندیدارێن نیڤده‌وله‌تی و ڤان رێكخراو و سه‌نته‌ران ئێكی های ژ یێ دی نینه! ئه‌ڤه وێ ئێكێ دیار دكه‌ت كو هه‌ر ئێكی به‌رژه‌وه‌ندیێن خوه هه‌نه!، چونكی هه‌كه راست دبێژن پێدڤیه ئه‌و ڤی كاری ب هه‌ماهه‌نگی بكه‌ن، نه‌مازه حكوومه‌تا هه‌رێما كوردستانێ لیژنا بلندا ناساندنا جینوسایدێ و ده‌سته‌یا جینوسایدی ب ره‌سمی داناینه و دووڤچوون و ڤه‌كۆلینا ڤێ كاره‌ساتێ دكه‌ن و هه‌می پێزانین و به‌لگه‌یان ل سه‌ر كۆم دكه‌ن، كو ل سه‌ر ئاستێ نیڤده‌وله‌تی و دادگه‌ها لاهای ئیعتراف ب ده‌سه‌تایا ناڤبری كریه، له‌ورا پێدڤی بوو هه‌می رێكخراو و سه‌نته‌ر و ئالیێن ڤه‌كێشكانێ ب پرسا شنگالێ دكه‌ن ب هه‌ماهه‌نگی دگه‌ل حكوومه‌تا هه‌رێمێ كار ل سه‌ر ناساندنا جینوسایدا شنگالێ كربایه، لێ به‌رۆڤاژی ئه‌م دبینین كو هه‌ر ئالیه‌ك دبێژیت ئه‌زم خودانێ شنگالێ و رۆندكێن تیمساحان بۆ دبارینن.
ل ده‌مه‌كی كارێ ڤان سه‌نته‌ر و رێكخراوان ل سه‌ر ئاستی نیڤده‌وله‌تی دبیته لاوازی بۆ باده‌كا شنگالێ، چونكی هه‌ر ئالیه‌ك ناڤی و چالاكیێ بۆ خوه حساب دكه‌ت و ره‌نگه ژ ده‌رڤه‌ی كوردستانێ هه‌ر ئێك ب شێوه‌یه‌كی ڤێ پرسێ نمایش بكه‌ت، ل ده‌مه‌كی هه‌كه هه‌ماهه‌نگیه‌ك هه‌بیت بریار و گۆتن و هه‌لویستێن هه‌می ئالیان دێ ئێك بیت و ئێكبوونا ڤێ ئێكێ دبیته فاكته‌رێ ب هێزبوونا باده‌كا ناساندنا حینۆسایدا شنگالێ و وی ده‌می ئالیێن نیڤده‌وله‌تی دێ پتر گرنگیێ ده‌نه ڤێ پرسێ و پتر دێ بیته جهێ باوه‌ریێ.
ژ ئالیه‌كێ دن ڤه پشتی ل 13/11/2015 د داستانه‌كا دیرۆكی دا ب سه‌رپه‌رشتیا سه‌رۆكێ هه‌رێما كوردستانێ هێزێن پێشمه‌رگه‌ی ب پشته‌ڤانیا فرۆكێن هه‌ڤپه‌یمانان، شیان باژێرێ (شنگالێ) رزگار بكه‌ن و پێشمه‌رگه بوویه جهێ گرنگی و حێبه‌تیا گه‌له‌ك وه‌لاتان، چونكی شیایه رۆله‌كێ مه‌زن د شكاندن و پاشڤه‌برنا چه‌كدارێن داعش دا ببینیت، هه‌روه‌سا ناڤێ پێشمه‌رگه‌ی بوویه تایتلێ میدیایێن جیهانی، لێ مخابن هه‌تا نها هنده‌ك ئالی یێ ل سه‌ر ئێك و دویا خوه و هێشتا دخوازن بۆ به‌رژه‌وه‌ندیێن خوه یێن تایبه‌ت شنگالێ ب كاربینن و ناڤێ پێشمه‌رگه‌ی كرێت بكه‌ن. ئه‌ڤه ژی دكه‌ڤیته د كڤانێ وان مزایداتێن سه‌ر پرسا شنگالێ دهێنه كرن.
ل دووماهیێ دبێژم پێدڤیه ته‌ڤ ئالی خوه هشیار بكه‌ن، ب تایبه‌تی گرۆپ و ئالیێن ئێزدی و ژیرانه ل سه‌ر پرسا ناساندنا جینۆسایدا شنگالێ كار بكه‌ن دوور ژ هه‌ر مزایده‌كا سیاسی و بازرگانی، چونكی هێشتا شنگال ب خه‌لكێ خوه ڤه یا برینداره و تاقه‌تا مزایده و بازرگانیكرنێ نینه.
ئه‌ڤ گۆتار ل مالپه‌رێ ئه‌ڤرۆ نيوز،ل 20/8/2016به‌لاڤ بوويه.
تُتاح هذه الصورة أيضا في: کوردی
