محه‌مه‌د ئيبراهيم ئامێدى:بلا په‌یاما سه‌رۆك بارزانی بیته‌ شۆره‌شه‌كا سه‌رده‌م

بلا په‌یاما سه‌رۆك بارزانی بیته‌ شۆره‌شه‌كا سه‌رده‌م
محه‌مه‌د ئيبراهيم ئامێدى
په‌یاما سه‌رۆكێ هه‌رێما كوردستانێ، رێزدار مه‌سعود بارزانی یا رۆژا (23/6/2016) پێنگاڤه‌كا مێژوویی یه‌ وه‌ك هه‌موو وان پێنگاڤ و ده‌ستپێشخه‌ریێن جه‌نابێ وی به‌ری نوكه‌ هاڤێتین. بۆ كوردستانه‌كا ئارام و ئێكگرتی و پرۆژێن ئاشتیێ و ئازادیێ و سه‌ربخۆیێ و راگه‌هاندنا ده‌وله‌تا كوردی. كو ئه‌ڤه‌ خه‌ونا ملله‌تێ كورده‌ یا سه‌ده‌هان ساله‌. ئه‌ڤ په‌یامه‌ هه‌می ئالیێن سیاسی و لایه‌نێن په‌یوه‌ندیدار، داخواز كرینه‌ ل سه‌ر مێزه‌كا دانواستاندنا و گه‌نگه‌شه‌ و رێكه‌فتنێ ئاما ده‌بن. بۆ پرۆسا ریفراندۆمێ وه‌ك مافه‌كێ شه‌رعی و ره‌وا یێ ملله‌تێ كورد پێخه‌مه‌ت راگه‌هاندنا ده‌وله‌تا كوردی. كو ئه‌م كورد چاره‌مین نه‌ته‌وه‌ینه‌ ل ده‌ڤه‌را رۆژهه‌لاتا ناڤین. پشتی نه‌ته‌وا عه‌ره‌ب و تورك و فارس. ب ژمارا (50) ملیۆنان سه‌ر ئاستێ جیهانێ. وه‌ك تاكه‌ نه‌ته‌وا دبێ ده‌وله‌تین. سه‌ره‌رایی هه‌بوونا هه‌می مه‌واسیق و ته‌شریعاتێن نه‌ته‌وێن ئێكگرتی و دوه‌لی یێن تایبه‌ت ب دانانا كیانێ سیاسی و ده‌وله‌تا خوه‌. كو پالپشتی و دوپاتكرنێ دكه‌ن سه‌ر ڤێ چه‌ندێ. هه‌ر ژ په‌یمانا دوه‌لی یا سالا 1976 ئه‌وا هاتیه‌ مۆركرن ژ لایێ 149 ده‌وله‌تان ڤه‌. و عیراق ئێكه‌ ژ وان ده‌وله‌تان ل په‌ی مادێ ژماره‌ ئێك پشكا ئێكێ برگا 13 ژ په‌یمانێ. په‌یمانا سیڤه‌ر ئه‌وا ل 10/8/1920 هاتیه‌ مۆركرن. ژ لایێ بریتانیا و فرنسا و ئیتالیاڤه‌ ب برگێن (62-63-64) یێن تایبه‌ت ب دامه‌زراندنا كیانه‌كێ كوردی یێ سه‌ربخۆ ل ده‌ڤه‌رێ. گۆته‌بێژا داخویانیا عیراقی و بریتانی یا هه‌ڤپشك ل (22/12/1922) یا ئیعتراف ب مافێ ملله‌تێ كوردی كری و حكوومه‌ته‌كا كوردی بهێته‌ پێكئینان د چارچوڤێ عیراقێ دا. بریارا جڤاتا (عصبه‌ت الامم) یا نه‌ته‌وێن ئێكگرتی ل 16/1/1926 یا تایبه‌ت ب بریار ل سه‌ر مافێ كوردان و پێكئینانا هه‌رێمه‌كێ بۆ كوردان. پشتی سنوور هاتیه‌ دانان وه‌ك هێلا دوه‌لی ناڤبه‌را توركیا و عیراقێ (هێلا برۆكسل) و ها ئه‌ڤه‌ 100 سال ژی ل سه‌ر رێكه‌فتنا سایكس پیكۆ بۆرین و نوكه‌ ده‌مه‌كێ دی یه‌ نه‌ یێ ل سه‌ر ده‌مێ رژێمێ ره‌گه‌زپه‌رست و دكتاتۆریێ یه‌. پرانیا ده‌وله‌تێن جیهانێ یێن گه‌ل مه‌ بۆ بریارا چاره‌نڤیسی و راگه‌هاندنا ده‌وله‌تا كوردی. كو دبلوماسیا كوردی ب رۆله‌كێ هه‌ستیار و باش رابووینه‌ و ب تایبه‌تی رۆلێ سه‌رۆك بارزانی یێ پیرۆز و ئه‌كتیف د ڤی بیاڤی دا. له‌ورا یا فه‌ره‌ و پێدڤیه‌ ئه‌م هه‌می رێ ل په‌یامێ خۆش كه‌ین. و هه‌موو پارت و لایه‌ن و جهێن داخوازكرین ئاماده‌ بن ب هه‌سته‌كێ نه‌ته‌وه‌یی. یا دوور ژ ململانا حزبی و ناكۆكیا, وه‌ك شۆره‌شه‌كا كوردی ئه‌م هه‌می پێكڤه‌ ده‌ست ناڤ ده‌ستی به‌رب رۆژه‌كا نوو و كوردستانه‌كا ئێكگرتی و سه‌نگه‌ره‌كێ خورستی ب ئێك دل و جان و ده‌لیڤا ژ ده‌ستێ خوه‌ نه‌كه‌ین و مفایێ ژ گهۆرینێن نوكه‌ بكه‌ین ئه‌وێن ل ده‌ڤه‌رێن چێ دبن ج ل عیراقێ بیت ئان ل ده‌ڤه‌را رۆژهه‌لاتا ناڤین بن. كو ڤان گهۆرینا كارتێكرن دێ هه‌بن ل سه‌ر ده‌ڤه‌رێ ب تایبه‌تی پشتی نه‌مانا داعش. و ئه‌ڤ چه‌نده‌ مه‌ دخوازیت پالپشتیا په‌یاما سه‌رۆك بارزانی و دئاماده‌ بین بۆ به‌رگریێ بۆ هه‌ر هنگاریه‌كێ و زێره‌ڤانێن ئه‌زموونا هه‌رێما كوردستانێ بین. زێده‌باری بابه‌تێ سه‌ركی یێ ڤێ په‌یمانێ كو ریفراندۆمه‌، لێ ده‌لیڤه‌كا گه‌له‌ك گرنگه‌ بۆ چاڤپێكه‌فتنا هه‌می ئالیێن سیاسی ل سه‌ر مێزه‌كێ و به‌ر ب رێخستنا مالا كوردی ڤه‌ یه‌. ده‌رگه‌هێ دیالۆكێ یه‌ و دانوستاندنا سه‌ر نه‌مانا ناكۆكیان و خالان دانه‌ سه‌ر پیتا و رۆبه‌ر و هه‌موو بابه‌ت دێ هێنه‌ شرۆڤه‌كرن و چاره‌سه‌ركرنا خالێن سه‌ره‌كی وه‌ك پاراستنا ئاسایشا نه‌ته‌وه‌یی ل كوردستانه‌كا رزگارگری و به‌خته‌وه‌ریا گه‌لێ كوردستانێ و چاوانیا هاڤێتنا پێنگاڤێن پراكتیكی بۆ نه‌هێلانا قه‌یرانا وه‌ك قه‌یرانا سیاسی و دارایی و ئاریشێن دگه‌ل به‌غدا و دانا ئه‌ولییه‌تێ بۆ شه‌رێ دگه‌ل داعش و كاروبارێن پێشمه‌رگێن قاره‌مان، له‌ورا په‌یاما سه‌رۆكی ده‌لیڤه‌كا مێژووی یه‌ ژ ده‌ستێ خوه‌ نه‌كه‌ین و ده‌مێ پێدڤی بۆ بهێته‌ ته‌رخانكرن. و ده‌ست د ناڤ ده‌ستا دابن و بێ هیڤی و ئومێد نه‌بین و هه‌موو ئالیێن سیاسی ئاماده‌ بن ب سه‌ركرده‌ڤه‌ وه‌ك فه‌رمانه‌كا نه‌ته‌وه‌یی سه‌خمه‌راتی به‌رژه‌وه‌ندیا گشتی یا ملله‌تێ كورد و مافێ ره‌وا و خوینا ب هزاران شه‌هیدێن سه‌ر فه‌راز و سه‌ر بلند و رێبازا بزاڤا رزگاری خوازیا كوردی یا پر شۆره‌ش و سه‌رهلدان و داستان و رۆژێن سه‌خت دژوار و خه‌بات و سه‌ركه‌فتن و ده‌ستكه‌فتیان، وه‌ك شۆره‌شه‌كا سه‌رده‌م چه‌كێ وێ ئێكرێزی و ته‌ڤایی و ئێك گوتارا سیاسی. درووشمێ وێ ل ده‌مێ بریارێ و بابه‌تی په‌یوه‌ندی ب پرسێ و به‌رپرسایه‌تیا ملله‌تی ڤه‌ هه‌بیت. ئه‌م هه‌مو كورد به‌رپرسین و به‌ر پرسیارین.