ب هەزاران ئێزدی بوونە قوربانیێن تاوانێن داعش
خالد خدر 
پشتی چەكدارێن رێكخراوا تیرۆرستییا داعش ل 9/6/2014 مووسل داگیركری و دەستهەلاتا خۆ سەپاندی و شوون پێت خۆ مووكمكرین ل دەڤەرێ ورێبەرێ وان ئەبو بەكر بەغدادی راگەهاندنا خیلافەتێ كری ، دەست ب پیلانا خۆ یا دژمنكارانە كرن و بەرێ خۆ دانە دەڤەرا شنگالێ و هێرشەكا درندانە و هۆڤانە ئینانە سەر ئێزدیان ، ل 3/8/2014 تیرۆرستێن داعشێ شنگال داگیركر ومەزنترین تاوانێت هۆڤانە ل دژی ئێزدیان ئەنجامدان و ب هەزاران شەهید كرن و ب هەزاران ژن وزارۆك رەڤاندن و ل بازارێت رەقە و مووسلێ وەك كۆلەیا فرۆتن ب نرخێت بێ بەها و ب سەدان گۆرێن ب كۆمەل ئەنجامدان ل دەڤەرا شنگالێ .
ئەڤە دوو سال دەربازبوون لسەر ڤێ كارەساتا دلتەزین ئەوا ل دژی ئێزدیێن شنگالێ هاتی ئەنجامدان ژلایێ داعش ڤە ،وژئەنجامێ وێ چەندێ هەتا نهۆ ب هەزاران كچ و ژن وزارۆكێن مە ئێزدیان ماینە لژێر دەستێن تیرۆرستێن داعشێ، سەرەرایی كو هژمارەكا بەرچاڤ ژ وان گرتییا هاتینە رزگاركرن لژێر دەستێ داعشێ ، ئەڤا تیرۆرستێن داعشێ ئەنجامدای ل دەرهەقا ئێزدیان دا ل شنگالێ تاوانەكا بێ وێنەبوو د دیرۆكا هەڤچەرخدا لژێر ناڤێ ئایینی و ل پشت عەبایێ ناسیۆنالیزما عەرەبییا رەگەزپەرستا پاشڤەڕوویا تووندڕەو ،و ب هاریكاریا هندەك هۆزێن عەرەبی و تووركمانێت سوننە مەزهەبێت خەلكێ تلەعفەرێ وهندەك ژ خەلكێ شنگالێ یێت نە ئێزدی بوونە هاریكار پالپشت و رێنیشاندەرێن تیرۆرستێن داعشێ ژبۆ ئەنجامدانا وان تاوانێت ل دژی ئێزدیان و لدیڤ پیلانەكا دژمنكارانەیا رەش و كۆرە و ژەهرا خۆیا هندە سالێن بۆری بەردان و ئەو چەندا هاتی كرن ژبۆ مەرەما پاككرنا نەژادێ ئێزدیان بوو ،و هەولا وێ چەندێ دكرن ئێزدیان ژ ناڤببەن و ژهۆلێ ڕاكەن، جارەكا دی ئێزدیان وەك وان فەرمانێت بۆری ئەڤ فەرمانە ژی دەربازكر و خۆراگرتن و لبەرخۆدان و نەهاتنە قركرن وەك پیلان بۆ وێ چەندێ هاتی دارژتن ژلایێ تیرۆرستێن داعش ڤە .
جهێ داخێ ومخابنیێ یە كو هەتا نهۆ ب هەزاران كچ وژنێت وزارۆكێت مە ئێزدیان ماینە لژێر زولم و زۆردارییا داعشێ ،و تشتێ هەری نەخۆش و ب مەترسی ئەو زارۆكێت لبن دەستێ وان دا نهۆ دهێنە پەروەردەكرن وفێركرن ب هزر و تێگەهێ كافركرنێ وجیهادێ و تووندڕەویێ و سەپاندنا باوەریا داعش لسەر وان زارۆكان ،وژلایێ رێكخراوێت مرۆڤایەتی و نێڤ نەتەوەیی ڤە ل ڤی دەربارەی هیچ كارڤەدانەك نەبوویە ، و خالەكا دی یا گرنگ سەرەرایی پەیدابوونا هەمی بەلگەنامێت پێدڤی و دانپێدانێت داعشێ و هەبوونا قووربانیێت رزگاربووی دەربارەی كۆمەل كوژییا ئێزدیان هەتا نهۆ دانپێدان ب قركرنا ئێزدیان (جینوساید) نەهاتیە كرن نە لسەر ئاستێ عیراقێ و نە لسەر ئاستێ نێڤ نەتەوەی ، تشتەكی سەیر وسەرنج راكێشە كو هەتا نهۆ ئەو تاوانا هاتی كرن ل دژی ئێزدیێن شنگالێ ب (جینۆساید) سەرەرایی هەبوونا هەمی مەرجێت پێدڤی دەربارەیی ڤێ چەندێ .و هەروەسا دیسا خەلكێ مە یێ شنگالێ كەلەك یێ شەپرزە و پەریشانە ل ڤان كەمپا و ناڤ چادرا و لبەر گەرما هاڤینێ ،كو هەتا نهۆ دەڤەرێت وان ب تەمامی نەهاتینە ئازادكرن و یێن هاتینە ئازادكرن ژی هیچ مەرجەكی ژیانێ لێ نینە و بتایبەتی باژێرێ شنگالێ كو هاتیە كاڤلكرن . هیڤیدارین جینۆساید بۆ ئێزدیان بهێتە بەرقراركرن و كەچ وژن وزارۆكێت ماین لبن دەستێ داعش دا بهێنە رزگاركرن و هەمی دەڤەرا شنگالێ بهێتە ئازادكرن وئاڤاكرن و شنگال ببیتە ئیدارەكا سەربخۆ سەرب كوردستانێ ڤە .
تُتاح هذه الصورة أيضا في: کوردی
