خانەنشین (پالێن پیشی)؟!
كۆڤان حسێن
هەمی جیهانێ خانەنشین تەخەکا رێزدار و جهێ پویتەدانێ نە و هەمی سالان ل هندەک وەلاتان بودجەکا تایبەت یان سەرەدەریەکا تایبەت ژ ئالیێ حکوومەتێ ڤە بۆ دهێتەکرن. خانەنشین بێهنا (دوهی)نە پانۆراما روودان و سەرهاتیێن ژیانێ نە. مارکەکا ئورجینالا کار و پیشەیێن خوەنە، خانەنشین هەکە (عەسکری) بن یان (مەدەنی) بن خودانێن ڤی وەلاتینە، ئەڤ وەلاتە ئەڤ ئاڤاهی و ئەڤ سیستەم و ئەڤ گەشەپێدان و وەرارا جڤاکی و ئابووری و سیاسی و سەربازی و دبلۆماسی هەمی ب ناڤێ وان (تاپۆ)یە، شین تلێن وان ل هەمی سازی و دەزگەهێن کوردستانێ هەنە، لیستا ناڤێن خانەنشینا دبیت ل وەلاتێ مە هندەک زێدەگاڤی تێدا بن، دبیت هندەک نەهەژی خانەنشینیێ بن، و دبیت هەتا هندەک نە ل (عەمرێ) خانەنشینیێ بن. لێ مسوگەر 80% خانەنشینێن کوردستانێ هەژی رێزەکا مەزنن، ئەم وەختێ بەحسێ خانەنشینان دکەین ئەم بەحسێ ژیانا وان دکەین و چەوانیا بۆراندنا بەرمایێ وێ ژیانا مای، ئەوێن هەمی گەنجاتیا خوە گوری کەرتێ گشتی کری، نوکە وەک شیرحەلالیەک بۆ خانەنشینا پێدڤیە کوردستانێ ب تەمامی سەرەدەریا خوە ل گەل بگهۆریت و وەک تەخەکا مری (مع وقف التنفیژ) بەرێ خوە نەدەتێ، ئەڤە کەسێن بناڤ سالڤە چووینە و هەلکانن و شیاناڤە، هەمی زاخ و شیانا خوە گوری ئەڤرۆیا مەکریە، ب دیتنا من پشتی (پێشمەرگەی) دڤیا خانەنشین مووچەی وەربگرن، ئەڤە زێدەکرن و (مزایدە) نینە ئەڤ ئەمەکداریە بۆ وان کەسا، دبیت هندەک نە هەژی (مەقامێ)خانەنشینیێ بن و دبیت ئالیێن سیاسی گەلەک خانەنشین کربن بۆ مەرەمێن خوە، لێ دیسا پرانیا وانا هەژی چاڤدێریێ نە و ئەم بەحسێ (رزق) و ژێدەرێ ژیانێ دکەین ئەم بەحسێ نانێ مرۆڤا دکەین ئەم بەحسێ بهایێ دەرمان و پێدڤیێن پیراتیێ دکەین، و پاشی هەمی مرۆڤن و هەمی کوردن و ب رەنگەگی یان یێ دی زیان دیتیە و هەژینە کو حکوومەتا کوردستانێ دبن ناڤی خانەنشینیێ دا وان خەلات بکەت، کورد هەمی هەژی (بیمەکا)چڤاکینە (بیمەکا) ساخلەمیێ نە، وەک دیار خانەنشینێن نوکە نەهەق نینن ژ حکوومەتا کوردستانێ دلگران بن و گەنج و کاربدەستێن نوکە ژی دڤیا بزانن ئەڤ سەرەدەریا نەماقیل چاڤەرێ وان ژی دکەت پشتی ژ زاخێ خلاس دبن و بنە خانەنشین. نەهەق نینن وەک پالێن پیشی بهێنە پێشچاڤ نوکە.
تُتاح هذه الصورة أيضا في: کوردی
