كورد چ بكن بۆ سەربەخۆبوونێ
سەباح زهێر 
ب درێژاهیا مێژویا كەڤن و هەڤچەرخ گەلەك جاران دەرفەتێن زێرین هاتینە بەردەم نەتەوا كورد، ب مەبەستا گەهشتن ب ئارمانج ودەستكەفتنا مافێن خوە،لێ نەشیایە وەك پێتڤی مفای ژڤان دەرفەتان وەربگرن ئەو ژی ژبەر چەند فاكتەران وەك نەبوونا ئێكگرتنێ و ناكۆكیبێن ناڤخوە ودەرەكی و نەبوونا هەلویستەكێ ئێكگرتی دسیاسەتێ دا ،ئەم وەك كورد وەك زۆربەیا مللەتێن جیهانێ خودان چەندین پەیماننامە و رێككەفتنامەین دمێژویێ دا،هندەك ژ وان پەیمانناما جهێ شانازیێ نە و هندەك ژی وەك لاپەرەكا رەشن دمێژویا كوردان دا.
سەربەخۆیی هیڤی و ئومێدا هەرتاكەكێ كورد بوویە هەر ژمێژویێ هەتا نها،دیاسایا نێڤدەولەتی دا سەربەخۆی مافەكێ سروشتیێ هەر مللەتەكێ یە،لێ جهێ حێبەتیێ یە پشتی تێپەربونا 96سالان ب سەر پەیمانناما سیڤەر هەرێما كوردستانێ رۆناهیەك ژ هیڤیێن وێ سەرهلدایە پێنگاڤێن باش هاڤێتن وهندەك بارودۆخێن باش و گونجای ژی هاتینە بەردەم بۆ سەربەخۆبوونێ لێ ئەڤ پێنگاڤێن باش و خۆراگریە دكاتینە نەك دوم درێژ،نها هەرێما كوردستانێ خودان دەزگەه و پەرلەمان و حكومەت و ئاسایش ولەشكەرە،هەروەسا ڤەكرنا چەندین كۆنسلخانێن بیانی ل هەرێما كوردستانێ دا، دیسان هەرێمێ پەیوەندیێن دوبلوماسی و ئابوری و دگەل وەلاتێن نێڤدەولەتی دا هەنە،كوردستان نمونەكا جوانە ژئارامیێ و سەقامگێریێ ل سەر ئاستێ رۆژهەلاتا ناڤین،پێشمەرگە گیان و خوینا خوە ل جهێ هەمی جیهانێ دژی مەزنترین رێكخراوا تیرۆری دجەنگیت،ئەڤ یەك ژی ل سەر ئاستێ نێڤدەولەتی بۆ كوردان سەربلندیێ یە بۆ ب دەست ڤەئینانا هاریكاریێن ماددی و مەعنەوی،كونگرێسا ئەمریكا هێزا پێشمەرگەی ب كاریگەرترین هێزل سەر ئاستێ رۆژهەلاتا ناڤین وەسفكر.
پێتڤییە ئەم وەك كورد بۆ خوە وانێ ژ ئەزمونێن سیاسی یێن بوری وەربگرین شاشیێن خوە دوبارە نەكەینەڤە،لێ مخابن وەك پێتڤی مەنەشیایە مفای ژسەربۆرێن بوری وەربگرین بۆ كێشێن كوردی تایبەت سەربەخۆبونێ،چنكو هەتا نها لایەنێن سیاسی ژبۆ بەرژەوەندیێن خوە یێن تایبەتی و بۆ ب دەسڤەئینانا پشتەڤانیا پارتا خوە پەیوەندی ب هندەك لایەنێن دەرەكی ڤە گرێداینە،لێ دئامادە نینن ل سەر ئاستێ ناڤخوە هندەك دەست پێشخەریان بكن دگەل لایەنێن سیاسی یێن ناڤخوە ب مەبەستا چارەسەركرنا گرفت و قەیرانێن دارایی،لەوما دڤێت سەركردایەتیا كوردی ب گشتی و ب رژدی هەول بدەت بەرژەوەندیێن گشتی دانتە ل جهێ بەرژەوەندیێن تایبەتی یێن حیزبی،دیسان رێزێ ل سەر وەری و بنەمایێن دەستوری بگرن،كاربكەن ل سەر ئێك رێزی و ئێكتر قەبولكرن و دادپەروەری و ئاشتی و پێكڤە ژیان و هەلویستێ ئێكخستنا مالا كوردی و بەرژەوەندیێن گشتی یێن ڤی مللەتی دا بۆ پێشڤەبرنا دوزا نەتەوەی و گەهشتن ب ئارمانجان و بنیاتێ دەولەتەكا سەربەخوە خەونا چەندەها سالێن نەتەوا كورد بجه بینن،گۆتنەك ژی یا هەی دبێژیت(هەتا مار راست نەبیت ناچیتە دكونێ ڤە)هەتا لایەنێن مەژی دگەل ئێك راست نەبن ناگەهینە هیڤی و ئومێدبێن خوە،لەوما دڤێت ئەم وەك كورد وان سەربورێن تالێن مێژوی كو ب سەر مللەتێ كوردا هاتین دوبارە نەكەینەڤە و ئێك مالیا مللەتێ كورد بهێتە پاراستن ژ لایێ هەمو پارت و ئالیان ڤە.
تُتاح هذه الصورة أيضا في: کوردی
