لژێر پەراوێزا كریارا تیرۆرستییا فرۆكەخانەیا ئستەنبۆلێ 
خالد خدر
پشتی كو چەكدارێن رێكخراوا تیرۆرستییا داعشێ هاتینە لاوازكرن ل عێراق وسوریا و هەروەسا هندەك گڤاشتن لسەر هاتینە كرن ژلایێ دەولەتا توركی ڤە ، داعشێ كریارەكا خۆكوژی و تیرۆرستییا مەزن ل فرۆكەخانەیا ئستەنبۆلێ ئەنجامدا ،گەلەك كارڤەدان و پرسیارێن هەمەجۆر ڤێ كریارا هەنێ لپێ خۆ هێلاینە، چنكو پەقینەكا مەزن بوو كو بنچینەیێن دەولەتا توركی هەژاندن، و گەلەك یا جێواز بوو ژ پەقینا ئەنقەرە ژلایێ قەبارە و دەنگڤەدانێ ڤە.
هەرچەندە هەتا نهۆ داعشێ ئەو كریارا هەنێ نە ئێخستییە ستوویێ خۆ ،ئەڤ چەندە هاتە كرن پشتی كو دەولەتا توركی كەفتیە دناڤ هەڤپەیمانیا نێڤ نەتەوەی یا لدژی رێكخستییا تیرۆرستییا داعشێ ،دهەمان دەمدا پەیوەندیێن خۆ دگەل هەر ئێك ژئیسرائیل و ئەمریكا خۆشكرین وئاسایی كرین ب تایبەتی دگەل ئیسرائیلێ ، د ماوەیێ چەند سالێن بۆری دا توركیا یا پاراستی بوو ژ هێرشێن داعشێ بەلكو بەردەوام توركیا دهاتە گونەهباركرن ب هاریكارییا ڤێ رێكخستییا تیرۆرستی ب تایبەتی ژلایێ سنورێ وێ دگەل رۆژئاڤایێ كوردستانێ و ل دژی شەرڤانێن كورد و هندەك گرۆپێن ئۆپزسیۆنا سووریا یا میانڕەو،تشتەكێ سروشتی بوو كو حكومەتا توركیا هاریكارییا داعشێ بكت ونە داعشێ بتنێ بەلكو هەموو گرۆپ و ئالیێن رادیكال ژ ئۆپزسیۆنا سوورییا ب تایبەتی بەرەیی نووسرە ، توركیا بارێ خۆ گران كریە كو رۆژ بۆ رۆژێ نەیار ودژمنێت خۆ زێدەتر لێ دكت.
ژلایەكی دی ڤە دگەل كوردێن باكوور و تێكدانا پرۆسێسا ئاشتیێ وژلایەكی ڤە رژێما بەشار ئەسەدی و ژلایەكێ دیڤە رووسیا ب تایبەتی پشتی ئێخستنا فرۆكا وێ هەر چەندە ل ڤی ماوەیێ داویێ دەولەتا توركی وب تایبەتی سەرۆك كۆمارێ وێ بەرێز ئەردۆغان دهەولدانا دایە ژبۆ زڤراندن و خۆرتكرنا پەیوەندیا دگەل حكومەتا رووسیا ،ل داویێ رێكخستییا داعش بوویە بارەكێ گران بۆ دەولەتا توركی ،وخالا هەرە گرنگ وجهێ نەئارامیێ ژلایێ حكومەتا توركی ڤە پرسا كوردستانا باكوور و كوردێن توركیا ،وب تایبەتی كو ئەڤە ماوەیێ نێزیكی سالەكێ یە شەرە ل دەڤەرێن كوردی كو زیانەكا مەزن یا مادی و لەشكەری گەهشتییە دەولەتا توركی ژبلی زیانا مرۆڤی یا خەلكێ مە ل كوردستانا باكوور ،ژ ئەنجامێ ئەڤی شەری و ژ ئەگەرێ هەلوەشاندنا پرۆسێسا ئاشتیێ دناڤبەرا وان پارتییا كرێكارێن كوركستانێ (پەكەكێ ) دا، زیانێن مەزن گەهشتینە ئابووریا دەولەتا توركی و دهەمان دەمدا هاوەلاتیێن كورد ژی تووشی زیانێن ئابووری و ئەولەهیێ و تەناهیێ بووینە ، وب سەدەما ئەڤێ چەندێ دەولەتا توركی بەهایێ خۆ یێ بەری چەند سالان ژدەستدایە و دهەمان دەمدا ئەو هەڤسەنگیێن ل دەڤەرێ هەمی هاتینە تێكدان ،ب تایبەتی پشتی شكەستنێن وێ ل سووریا لبەرامبەر بەرەیێ ئیران ورووسیا و بەردەوامی ومانا رژێما بەشار ئەسەدی ل سەر دەستهەلاتا وی وەلاتی كو تێتە هژمارتن ژ مەزنترین دژمنێ توركیا ل دەڤەرێ ،ئەڤە ژلایەكی ڤە وژلایەكێ دیڤە ژناڤچوونا پرۆژێ وێ یێ ل دژی بزاڤا كوردی ل كوردستانا باكوور و كوردستانا رۆژئاڤا ، و شكەستنا رێكخستییا تیرۆرستییا داعش ل سەر دەستێ پێشمەرگەیێن قارەمان و شەرڤانێن كورد باشترین گرۆڤەنە ل سەر ئەڤێ چەندێ.
تُتاح هذه الصورة أيضا في: کوردی
