هه‌رئێك خه‌ریكی خوه‌یه و ئه‌م خه‌ریكی چنه؟
فاظل عمر
من دڤێت هنده‌ك رێزان لدۆر ره‌وشا ده‌وله‌تێن كوردستان داگیركری و یا كوردان بنڤێسم.. و پاشی پرسیاره‌كا له‌وچه بكه‌م. پێشوه‌خت من دڤێت داخوازا جوامێریا هه‌وه بكه‌م چونكی نه‌دووره هنده‌ك په‌یڤێن بێئه‌ده‌ب بكاربینم.
ئیران، خه‌ریكی خه‌ریتا خوه‌یه و كڤانێ خوه (كڤانێ شیعی) نێزیكی ته‌مامكرنێ كریه.. هه‌لبه‌ت، ژبلی ده‌ڤه‌را هێزا پارتی، وه‌كی دی كڤان گه‌ره‌نتی بوویه. هه‌ڤبه‌ندیێن خوه دگه‌ل رۆژاڤا خوه‌شكرینه و نێزیكه، گه‌رمتر دێ هێته ناڤ بازاڕێ نه‌فتێ و تێهنا ئه‌تۆمی. ل ئه‌ڤی وه‌ختی، باسێ رامالینا هه‌رێما كوردستانێ دكه‌ت، داكو دگه‌ل ئیراقێ و سۆریێ و لوبنانێ ئیمپراتۆریه‌كا سه‌رانسه‌ری دامه‌زرینت.
تركیا، پشتی ئاكپارتی ژ خه‌ونا سولتانێ ئیمپراتۆریا ئۆسمانی هوشیاربووی، خه‌ریكه دگه‌ل رۆسان و جهوویان پێكبهێت داكو رێ لبه‌ر هه‌رێما كوردستانێ و رۆژاڤا و هێزێن باكۆری بگرت.. دبت دگه‌ل سعۆدیێ و خه‌لیجی ژی پێكبهێت و به‌رماییكێن داعشیان بده‌ته جه‌بهه‌ت ئه‌لنوسره و ناڤمالیا خوه پاكژبكه‌ت. نه‌خاسمه پشتی قومارا په‌كه‌كێ بۆ ئیرانێ كری، مه‌زنترین تراجیدیا ل باكۆرێ كوردستانێ ژێ په‌یدابووی و ره‌نگه چاڤنقاندنه‌كا جیهانی ل په‌ی هاتی.. تركیا نه‌چار بوو یان ژبه‌ر ده‌نگ ژێ نه‌ئینانێ هاته نه‌چاركرن، چاڤگێڕانه‌كێ ل سیاسه‌تا خوه بكه‌ت.
ئیراقا مریمری یان بێژین نه‌مری نه‌مای ژی، وه‌ختێ ده‌لیڤه هه‌بت، دربێ خوه دوه‌شینت.. گێله‌شۆكا مللی دهنێرته ده‌ڤه‌رێن سنۆری، به‌هرا هه‌رێمێ ژ داهاتییێ ئیراقێ و چه‌كی ناده‌ت، هنده‌ك كوردان چه‌كدار دكه‌ت، و یا ژ هه‌میێ خوه‌شتر و سه‌یرتر ئه‌وه، هێشتا كورد هه‌نه دچنه به‌غدا، به‌لكو تشته‌ك هه‌بت بئالیسن!
ئه‌ره‌بێن سونه، یێن داعشی و نه‌داعشی، په‌یمان دگه‌ل داعشێ گرێدان و پشتی ده‌ڤه‌رێن خوه رزگاركرین، ئێكه‌مین بزاڤا كرین، بزاڤا ستاندنا پایته‌ختا ئیراقێ نه‌بوو، به‌لكو بزاڤا داگیركرنا كوردستانێ بوو!
ل ئه‌ڤێ ره‌وشێ، كورد خه‌ریكی چنه؟
هه‌می لسه‌ر هێزێن هه‌رێمی و جیهانی دابه‌شبووینه.
ل ناڤخوه، هه‌ر هنده‌كان په‌یمانه‌ك دژی یێن دی گرێدایه.
هنده‌ك دژی به‌غدا راوه‌ستاینه، هنده‌ك ژ كه‌ربان دچنه به‌غدا.
هنده‌ك دژی ئیرانێنه، هنده‌ك هه‌ڤپه‌یمانن.
هنده‌ك سه‌ربخوه‌ییێ و ده‌وله‌تێ دخوازن، هنده‌ك دبێژن هێشتا زووه.
پارتێن ماركسی دڤێن ئابۆرا كوردستانێ بێخنه ده‌ست به‌غدا و یێن ترادسیۆنال دڤێن سه‌ربخوه‌ییا ئابۆری هه‌بت!
شه‌ڕێ داعشێ، ئابلۆقا ئیراقێ، مه‌لیۆنه‌ك و هه‌شتسه‌د هه‌زار په‌نابه‌ر، مووچه‌یێن گیرۆ و نیڤه‌ڕۆ، بێكاری و بێبه‌رهه‌می.. ل ئه‌ڤی وه‌ختی، باسێ هه‌لبژارتنان دهێته‌كرن. ب دیتنا من، نهۆ، هه‌لبژارتن خوه‌ش ده‌لیڤه‌یه، به‌س بۆ تشته‌كی، ئه‌و ژی ئه‌وه؛ هنده‌ك پاره (ژ ده‌رڤه) بۆ پارت و گرۆپێن سیاسی بهێن.
هێزه‌ك نه‌فتێ د تركیا را دفرۆشت، یا دی بزاڤێ دكه‌ت د ئیرانێ را بفرۆشت.
ئه‌ڤه ره‌وشا كوردانه و ئه‌و ره‌وشا هه‌ڤڕك و دژمنێن وانه.
ل ئه‌ڤی دیمه‌نێ گشتی ئه‌ز دبینم؛ ل رۆژهه‌لاتا ناڤین پێناسا هه‌می ده‌وله‌تان و ئارمانجێن وان، ئاشكرانه: ئیرانا فارسان و شیعه‌یان، ئیراقا ئه‌ره‌بان و شیعه‌یان، تركیا تركان و سونه‌یان.. من دڤێیا بزانم؛ كوردستان چییه و یا كێیه؟ پرسیارێ، دێ پچه‌كێ رۆهنتر لێ كه‌م: وه‌كی وه‌لاته‌ك هه‌یه ب ناڤێ كوردستان و یا كوردانه وه‌كو ئه‌م دبێژین، بۆچی بێ پێناسه و بۆچی به‌ربازاڕ دكه‌ین؟
ئه‌ڤ گۆتار ل مالپه‌رێ وار ميديا،ل 4/7/2016 به‌لاڤ بوويه.
تُتاح هذه الصورة أيضا في: کوردی
