گەلێ عێراقێ 40 سالە دبن زولم وزۆرداریێ و شەران دا دژیت 
خالد خدر
پشتی عێراق تووشی شەڕێ تیرۆرێ بووی وبتایبەتی ژلایێ رێكخراوا تیرۆرستیا داعش ،ژئەنجامێ وی شەڕی عیراق تووشی قەیرانەكا زۆر مەزن یا دارایی بوو،ڤی شەڕی بارگرانیەكا مەزن ئێخستییە سەر حوكمەت و گەلێ عیراقێ ،نەخاسمە دابەزینا بەهایێ نەفتێ ل بازارێن جیهانی كو بایەخدانامەزن یا بودجا عیراقێ یاگشتی لسەر نەفتێ یە ،ئەڤ چەندە هەموو بوونە سەدەم كو گەلێ عیراقێ دەست ب خۆنیشاندانێن نەرازیبوونێ بكەن ژبەر ڤی بارودۆخێ بسەر وان داهاتی ، وبتایبەتی پشتی وێ بانگەوازیا لێڤەگەرێ بلندێ شیعەیان (علی سیستانی) دایی حكومەتێ ،و دئەنجامدا لرۆژا 9/8/2015 دكۆمبوونا نەئاسایی یا جڤاتا وەزیرێن عیراقێ دا سەرۆك وەزیر دكتور حەیدەر عەبادی بریارا چاكسازیێن سەرانسەری دا ،ب تایبەتی چاكسازیێن سیاسی وئیداری وبگرە ژ كێمكرنا پاسەوانێن تایبەت یێن هەرسێ سەرۆكایەتیا وئەندامێن پەرلەمانی و پلەیێن تایبەت و رێڤەبەرێن گشتی.
بێگۆمان پێنگاڤێن كارا وگرنگن هاتینە هاڤێتن ژلایێ عەبادی و حكومەتا وی ڤە ل ڤێ داویێ،بەلێ چارەسەریا دروستی نە دكێمكرنا پاساوانا و جیگرێن سەرۆكایەتیادا یە،چنكو ل هەژارترین وەلاتێن جیهانی ژی جێگرێن سەرۆكایەتیێ هەنە و هەروەسا پاسەوان ژی هەنە ،چارەسەریا دروستی د بنبڕكرنا گەندەلیێ دا یە ڤێ گەندەلیا گەلێ عیراقێ ژبەر دنالیت ب سالانە وگەندەلی گەهشتییە هەموو دەزگایێن حكوومەتێ ،حكومەتا مالكی تێتە هژمارتن ب گەندەلترین حكومەت د دیرۆكا حكومەتێن عیراقێ دا، پێدڤییە كاربەدەست وسەرانێن ڤێ حكومەتا ناڤبری لێپرسین دگەلدا بێتە كرن وبێنە دادگەهكرن ژبەر وێ گەندەلیا كرین و وی داهاتیێ وەلاتی و وەلاتیا یێ دزین دڤان دەه سالێن بۆری دا و ل پێشیا هەموویان مالكی بێتە دادگەهكرن،چنكو ئەو چەندە هەموو ب فەرمان و ئاراستەیا وی دهاتەكرن،سەرەرایی كو مالكی وعەبادی كورێن حزبا دەعوە یا رادیكالن یا ب كراسێ شیعەتیێ، بەلێ عەبادی نەچارە ڤان چاكسازیان ئەنجام بدەت چنكو وی دوو پشتەڤانێن بهێز هەنە ئەوژی گەلێ عیراقێ و لێڤەگەرا ئایینی ل عیراقێ ، ئەگەر گەلی ڤیا تشتەك بكت هیچ هێزەك نكارە ببە ئاستەنگ د رێیا ڤیانا وی دا.
گەلێ عێراقێ ژ هەژییە ب بەختەوەری و خۆشگوزەرانی بژیت چنكو ئەڤە پتر ژ (40) سالایە دبن زولم وزۆرداریێ و شەران دا دژیت ،عیراق دەولەمەنترین وەلاتە ل دەڤەرا رۆژهەلاتا ناڤەراست و خودانا مەزنترین یەدەكێ نەفتێ كو دناڤ دەه وەلاتێن خودان یەدەكێ نەفتێ دایە ،ژبلی سامانێن دی یێن سروشتی ،بەلێ جهێ داخێیە ئەو داهاتی و سامانێ وەلاتی ژبۆ شەرا وهەڤركیێن نافخۆیی ودەرەكی هاتنە مەزاختن ژلایێ رژێمێن عیراقێ یێن ئێك لدیڤ ئێك هەتاكو گەلێ عیراقێ گەهاندنە ڤێ وێرانكرنێ و دەربەدەركرنێ و كۆچكرنێ و عیراق كرنە وەلاتەكی هەژار و پاشی وژێرخانەیا وی هاتە ژناڤبرن.
تُتاح هذه الصورة أيضا في: کوردی
