بێ دەنگییا ژنێت كورد ل هەمبەر گرتنا ژنێن كوردێن ئێزدی
شه‌مال خدر
ب بۆرینا سالەكێ لسەر گرتنا كچ وژنێت كوردێن ئێزدی لرۆژا 3ئابا سالا2014 ژلایێ چەكدارێن رێكخستییا تیرۆرستییا دەولەتا خیلافەتا داعشێ ،ئەڤێ رۆژا رەش و بێ ئێغبال لسەر تەڤایا مللەتێ ئێزدی وب شێوەكی تایبەتی ژنێت ئێزدی ئەوێن كەتینە ژێر دەست و دیلیا داعشێ دڕندە و هۆڤانە ،تێتە زانین كو ل ڤێ رۆژا ناڤبۆری دا زێدەتر ژ پێنج (5)هەزار ژنێت كوردێن ئێزدی هاتنە رەڤاندن ژئالیێ داعش ڤە ژبلی زارۆك و پیر وكالێن بناڤ سالڤەچوویی ،ل چەرخێ بیست وئێكێ دا ژن و كەچێت كوردێن ئێزدی ل بازارێن مووسل و رەقە دا ب ئەرزانی هاتنە فرۆتن و هاتنە پێشكێشكرن مینا دیاری بۆ ئەمیر وسەركردەێن تیرۆرستێن داعش.
جهێ شەرمەزاریێ بوو ئەڤ چەندە هاتە كرن ئانكو ژنێت ئێزدیان هاتنە فرۆتن ب ڤی رەنگێ بێ بەها و بێ رەوشتی و لپێش چاڤێن هەموو ڤێ جیهانا پێشكەفتی وئازاد و دیموكراسی و دڤی سەردەمێ ڤێ وەرارا مەزن دا ل جیهانی ،تشتێ سەرنج راكێش و جهێ باسكرنێ و لسەر راوەستیانێ و من دڤێت ئاماژێ پێ بكم،كو ل دەمێ قەومینا ڤێ كارەساتا هندە مەزن و دەنگڤەدایی ل هەموو جیهانێ و ژ هەموویێ مەزنتر گرتنا ڤێ ژمارا مەزنا ڤان كەچ وژنان ب دەستێ چەكدارێن تیرۆرستێن داعش ،بێدەنگییا ژنێت كورد لهەمبەر گرتنا ژنێت كوردێن ئێزدی كو هیچ هەلویستەكی بهێز و كاریگەر نەبوویە ژلایێ وانڤە لسەر كارەساتا خەلكێ شنگالێ وبتایبەتی وێ چەندا ب سەرێ ژنا ئێزدی هاتی دچارچووڤێ وێ كارەساتێ دا ، ژنا كورد بەلكو بچووكترین هەلویست نەبوویە لهەمبەر ڤێ بێ رەوشتییا دگەل ژنێت كوردێن ئێزدی هاتینە كرن.
ئەگەر ئەم بهێین و رەفتار وچالاكیێن ژنێت كورد لسەر هندەك پرسێن ژنان یێن رابردوو بینینە بیرا خۆ ،دێ زۆر سەرسۆرمان بین كو ئەڤ كارەساتا هندە مەزن هاتە ئەنجامدان دژی ژنێت كوردێن ئێزدی و قەبارێ وێ زۆر بچووك لێهاتیە ژلایێ گەلەك ژنێت دەوروبەرێن مە، بەلێ پێتڤی بوو لسەر ژنا كورد كو هەلویستێ وێ كاراتربا و نەبوایە جهێ پرسیارێ ؟ ،داخوازێ ژ هەموو جیهانێ دكەین كو هەموو دهاریكاربن ژبۆ رزگاركرنا ژنێت ئێزدیان ژ دەستێ تیرۆرستێن داعش،دگەل دابینكرنا پاراستن و ئێمناهیێ بۆ دەڤەرێ و پەیداكرنا ئالاڤێن خۆشگوزارنیا ژیانێ بۆ خەلكێ شنگالێ و پاشی زڤراندنا ڤی خەلكێ ئاوارە بۆ دەڤەرا وان.
تُتاح هذه الصورة أيضا في: کوردی
