ژنا كورد وەكی پێشمەرگەی دبەرەڤانیكرنا كوردستانێ دە رۆلێ خۆ گێرایە
تۆرا لالش یا راگەهاندنێ/هۆگر نه‌جيب
ژبۆ پشتەڤانیكرنا دۆزا كورد و بلندكرنا مۆرالا پێشمەرگەی ،ژنێن كوردستانێ وەكی جاران مل ب ملێ برایێ خۆ یێ پێشمەرگە ڤە رۆلێ خۆ دگێرن و خزمەتا وان دكن ،كەسایەتیێن ئاینی یێن ئێزدی و موسلمان وكریستیان ڤی كارێ ژنان ب پیرۆزی ل قەلەم ددەن.
واجیدە رێكانی،رێڤەبەرا گرۆپێ “وارڤین”یێ خۆبەخش دیاركر:”پشتی رێكخراوا تیرۆرستیا بناڤێ دەولەتا ئیسلامی (داعش) هێرش كریە سەر سەنگەرێن پێشمەرگەی و كوردستان كەفتیە د مەترسیێ دە ل تەبەخا (2014) من ب فەر دیت گرۆپەكی دابمەزرینم ب ناڤێ (وارڤین) ل دهۆكێ ب شێوەكێ خۆبەخش ،هەژمارا مە دگەهتە نێزیكی (150) ئافرەتان و مەخشتە هەیە ژبۆ كاركرنێ و ئەم (كادا) چێدكەین ئەوژی ژبەر سڤكیا وێ و زێدەباری دروستكرنا خوارنا كوردەواری ئەوژی ل سەر داخوازا پێشمەرگەی ، ئەم بۆ هەموو سەنگەران دهنێرن بێی جێوازیا رەنگا و حزبا و دەڤەرا ، سەركەفتنێن پێشمەرگەی وەكریە ئەم هەست ب ماندیبون و قەیرانا دارایی ناكەین بەردەوامبین ل سەر كارێ خۆ، ژبەركو پێشمەرگە ئایندێ كوردستانێ دیاردكت و دپارێزت چەند بۆ بكەین كێمە”.
شەپال ئیبراهیم،بەرپرسا ئێكەتیا ئافرەتان ل پارێزگەها دهۆكێ خویاكر:”ژ دەستپێكا شەرێ داعش مە پێنگاڤ هاڤێتن ژبۆ دروستكرنا خوارنێ ،مە وەكو ئێكەتیا ئافرەتێن كوردستانێ ل سنوورێ پارێزگەها دهۆكێ ب ئەركێ خۆ زانیە ڤی كاری ئەنجام بدەین ، ئەم وەكو ئەركێ خۆ دزانین خوارنێ بۆ سەنگەرێن پێشمەرگەی دروستبكەین و ڤرێ بكەین ، هەموو ژن ژ هەموو ئاینان و دەڤەران یێن ئەندام دگەل مە رۆل گێراینە و هاریكاربوینە ، مە هندەك ئەندام هەبوون دگەل مە د هەژاربون مرۆڤی هزر نەدكر دێ كارت هاریكاریەكێ پێشكێش كت،لێ وان خوارن ژبۆ پێشمەرگەی دروستكر،ژبلی خوارنا كوردەواری ئەم كادا چێدكەین ژبەركو خوارنەكا سڤكە زوو دگەهتە پێشمەرگەی ، دەمێ پێشمەرگەی هێرشی شنگال كری ژبۆ رزگاركرنێ ئێكەتیا مە دگەل (100)سەد ئەندامێن مەیێن ژن و ئافرەت یێن هەموو ئاین و دەڤەران ب هاریكاریا چڤاتا پارێزگەها دهۆكێ ب (تەنان) مە كادە دروستكرن و بۆ هەموو بەرەیان مە ڤرێكرن بێی هیچ جیاوازییەك و دێ دبەردەوامبین ل سەرڤی كاری،كەس وكارێن پێشمەرگەی رۆلەكێ ئەكتیڤ و چالاك هەبوویە د دروستكرنا خوارنێ و هەرهاریكاریەكا دی”.
شەپال ئیبراهیم ئەو ژی دیاركر:”ئەم دگەل پێشمەرگاینە نەبتنێ د هنارتنە خوارنێ بۆ سەنگەری،بەلكو بۆ شەری ژی هەروەك چاوان ژنا كورد رۆلێ خۆ گێرایە مل ب ملێ برایێ خۆ یێ پێشمەرگەی د خەباتا چیایان دا”.
شەرو ئیبراهیم كشتو،قەول زانێ ئێزدی دبێژت:”چەندین سەبەقەیێن قەولی دسەلمینن كو ژنا ئێزدی بەرەڤانی ژ كوردستانێ كریە ، بەری هەزارێن سالان دەمێ زولم ل كوردستانێ دهاتەكرن و رۆلێ خۆ گێرایە مل ب ملێ برایێ خۆ یێ زەلام،دەست خۆشێی ل هەموو ژنێن كورد دكەم بۆ ڤی هەلویستێ جوامێرانە رابووین و بەردەوامن د دروستكرنا خوارنێ دا و هەر هاریكاریەكە دی بچتە د خزمەتا پێشمەرگەی دا”.
خولی فلیب،كەسایەتیێ كرستیان گۆت:” ئافرەتا مەسیحی د بزاڤا رزگاریخوازا كوردستانێ رۆلێ خۆ گێرایە مل ب ملێ خوشكێن خۆ یێن ئاین و نەتەوێن دی ل كوردستانێ،پشتی هاتنا تیرۆرستێن داعشێ ب ئەركێ خۆ زانیە رابت ب دروستكرنا خوارنێ و ڤرێكرن بۆ سەنگەرێن پێشمەرگەی ئەڤ كارە ژلایێ كێڤە بهێتە ئەنجامدان دەستخۆشێی لێ دكەین،ئەڤ چەندێ نەبتنێ ئەركەكێ دینی بەلكو نشتیمانی دهێتە زانین ، ئاینێ مە خێرەكە مەزن ددەتە هژمارتن ژبەركو پێشمەرگەهی رۆلەكێ گرنگ و پەرچاڤ د پاراستنا پێكهاتەیا مەسیحی دا هەبوویە ، داخواز دكەم ژ هەموو ئافرەتێن كوردستانێ بەردەوامیێ بدەنە ڤی كارێ پیرۆز،ژبەركو ب پێشمەرگەی پێكڤەژیان و ئازادیی دهێتە پاراستن نەك هێزەكا دژی مرۆڤایەتیێ ،هەر تشتەكێ خزمەتێ ب كوردستانێ بگەهینت و ورەیا دوژمنێ مرۆڤایەتیێ لاواز بكت درێغیێ ناكەین”.
مەلا ئیحسان رێكانی،سەرۆكێ ئێكەتیا زانایێن ئیسلامێ لقێ دهۆكێ دیاركر:” دەست خۆ شیێ ل وان گرۆپێن ئافرەتان دكەین ئەوێن بەردەوام هاریكاریا پێشمەرگەی دكن ب خێرەكا مەزن دهێتە هژمارتن و رۆلێ ئافرەتێ د دروستكرنا خوارنێ و د هاریكاریكرنا پێشمەرگەیی دا بلند دبینن ،ژبەركو پێشمەرگە بەرەڤانیێ ژ بەهایێن مرۆڤایەتیێ و كوردستانێ دكت و دژی دوژمنێن مرۆڤایەتیێ شەری دكت،زێدەتر ژ سێ جاران مە وەكو ئێكەتیا زانایێن ئیسلامێ لقێ دهۆك ئەو گرۆپ و لایەن خەلاتكرینە ، ڤێ چەندێ ئەم ب ئەركەكی ئاینی و مرۆڤایەتیی و نیشتمانی ددانین ،ئەو كەسَین بەرەڤانیێ ل هەموو پێكهاتەیێن كوردستانێ مافێ وانە ئەم ژی بەرەڤانیێ ژوان بكەین ،قەیرانا دارایی ژی رۆلێ ئافرەتێ لاواز نەكریە ژبەركو هەستا نەتەوی ژڤێ چەندێ مەزنترە ،ئەگەر كەسەكی بڤێت هاریكاریێ بۆ سەنگەران ڤرێ كت و رێگری ل هەمبەر بهێتە ئەنجامدان ئەم ب خیانەتەكە نیشتمانی ددانین”.
تُتاح هذه الصورة أيضا في: کوردی
