هیلاری ئێكه‌م ژن پشتی 239 سالان دبته به‌ربژارا ئێكانه یا پارتا خوه بۆ سه‌رۆكاتییا ئه‌مریكا
وار
جارا ئێكێ یه خانمه‌ك ب بیته به‌ربژارا سه‌رۆكاتییا ئه‌مریكا ژ ئالیێ پارتا دیموكرات ڤه و ئه‌گه‌ر پۆستێ سه‌رۆكاتییا ئه‌مریكا ژی د هه‌لبژارتنێن داوییا ئیسال دا ب سه‌ركه‌ڤت دێ بیته جارا ئێكێ ژنه‌ك ببیته سه‌رۆكا ئه‌مریكا.
هیلاری كلنتۆن، به‌ربژارا دیموكراتان بۆ پۆستێ سه‌رۆكاتییا ئه‌مریكا، ب سه‌ر بێرنی ساندرز دا ب سه‌ركه‌ڤت، ئه‌ڤه ژی دبیته جارا ئێكێ خانمه‌ك ب گه‌هیته قۆناغا داویێ د پارتا دیموكرات دا و هه‌روه‌سا جارا ئێكێ یه ژی د هه‌یاما 239 سالێن بۆری دا كو ل وی ده‌می ژ نوو سیسته‌مێ سه‌رۆكاتیێ هاتییه دانان.
كلنتۆن 68 ساله و ل ده‌ما سه‌رۆكاتییا بێل كلنتۆن، خانما ئێكێ یا ئه‌مریكا بوو و هه‌روه‌سا پۆستێن ئه‌ندامه‌تییا كۆنگرێسی و وه‌زاره‌تا ده‌رڤه‌یا ئه‌مریكا وه‌رگرتینه، كلنتۆن ل ده‌ما سه‌ركه‌ڤتنا خوه ل نیۆیۆرك راگه‌هاند؛ سه‌ركه‌ڤتنا وێ سه‌ركه‌ڤتنه‌كا مه‌زن و نوویه د دیرۆكا درێژكا خزمه‌تكرنا ژنان دا، هه‌روه‌سا پێشتر ژی راگه‌هاندبوو؛ ئه‌و ب هیڤی یه ئالیگرێن ساندرزی ژی ده‌نگێ خوه ب وێ بده‌ن بۆ وێ یه‌كێ نه‌خۆشی و توندوتیژییا ل هه‌مبه‌ری ژنان دهێته‌كرن ئێدی بهێته راوه‌ستاندن، هه‌روه‌سا مافێن گه‌نجان ژی ئێدی بهێن پاراستن.
ژ ئالییه‌كێ دی ڤه هێرشه‌كا مه‌زن كره سه‌ر به‌ربژارێ كۆمارییان، دۆنالد ترامپ، ژ به‌ر كو ترامپ هێرشی ژنان و موسلمان و كۆچبه‌ران كربوون و ب كاره‌كێ نه هه‌ژی بۆ به‌ربژاره‌كێ پۆستێ سه‌رۆكاتیێ ناڤكر، هه‌روه‌سا دوپاتكر؛ ترامپ نه‌یێ پێگه‌هشتی یه و نه‌شێت هه‌ستێن خوه كۆنترۆل بكه‌ت،
هیلاری كلینتۆن ل 24 ویلایه‌تێن ئه‌مریكا سه‌ركه‌ڤتنه‌كا مه‌زن ئینایه و ل هه‌مبه‌ر ژی بێری ساندرز ل 20 ویلایه‌تان و ب ڤێ یه‌كێ ژی ده‌نگێن هیلاریێ 13 ملیۆن بوون و یێن ساندرز ژی 10 ملیۆن ده‌نگ بوون.
پارتا دیموكرات ل تیرمه‌ها بهێت دێ كۆنگره‌یه‌كێ مه‌زن ل ویلایه‌تا فیلادلفیا گێڕیت بۆ وێ یه‌كێ ب فه‌رمی هیلاریێ بۆ پۆستێ سه‌رۆكاتییا ئه‌مریكا به‌ربژار بكه‌ت، كو دهێته چاڤه‌ڕێكرن ل هه‌شتی چریا دووێ یا ئیسال هه‌لبژارتن بۆ پۆستێ سه‌رۆكێ ئه‌مریكا دناڤبه‌را هیلاری وه‌ك به‌ربژارا دیموكراتا و دۆنالد ترامپ ژی وه‌ك به‌ربژارێ كۆمارییان بهێته‌كرن.
تُتاح هذه الصورة أيضا في: کوردی
