تۆرا لالش
سه‌رۆكێ حكومه‌تا هه‌رێما كوردستانێ گرنگیه‌كا مه‌زن ب رزگاربوویێن ئێزدی دده‌ت، د بریاره‌كا نووی دا رزگاربوویێن ئێزدی ل زانكۆێن ئه‌هلی و حكومی بێ به‌رامبه‌ر دخوینن و هه‌موو پێتڤیان ژی بۆ وان دابین دكه‌ن و ل خویندنا بلند ژی دێ ئێنه وه‌رگرتن.
ل دۆر ڤی بابه‌تی سه‌عید جردۆ، سه‌رۆكێ بنگه‌هێ لالش یێ ره‌وشه‌نبیری و كۆمه‌لایه‌تی بۆ تۆرا لالش یا راگه‌هاندنێ دا خویاكرن: ل سه‌ر داخوازیا بنگه‌هێ لالش ب رێكا نڤیسینگه‌ها سه‌رۆكێ حكومه‌تا هه‌رێما كوردستانێ مه داخواز كربوو ڕزگاربوویێن ژێر ده‌ستێ داعش بێ به‌رامبه‌ر ل زانكۆ و په‌یمانگه‌هێن حكومی و نه‌حكومی یێن هه‌رێما كوردستانێ بخوینن و ل خواندنا بلند ژی بهێنه وه‌رگرتن، رێزدار مه‌سرور بارزانی سه‌رۆكێ حكومه‌تا هه‌رێما كوردستانێ ئێكسه‌ر رازه‌مه‌ندی نیشان دا و فه‌رمان ده‌ركر.
گۆتژی: بریارا سه‌رۆكێ حكومه‌تا هه‌رێما كوردستانێ دوو بریاران ب خۆڤه دگرت، و ژوانژی رزگاربووییێن ژێر ده‌ستێ داعش ئه‌وێن مه‌رج ژێ دگرن د كارن ل زانكۆ و په‌یمانگه‌هان خواندنا خۆ ته‌مام بكه‌ن و حكومه‌ت دێ هه‌موو پێتڤیاتیان دابین كه‌ت و خواندن ژی بێ به‌رامبه‌ره و ئاسانكاریێن ته‌مام ژی بۆ ڤێ چه‌ندێ دئێنه كرن ل سالا بۆری كه‌فته د بیاڤێ جێبه‌جێكرنێ دا و دێ یا به‌رده‌وام بت، هه‌روه‌سان بۆ خواندنا بلند ژی ماسته‌ر و دكتۆرا هه‌ر د چارچۆڤێ بریارا سه‌رۆكێ حكومه‌تا هه‌رێما كوردستانێ ئاسانكاری دێ بۆ وێ چه‌ندێ ژی ئێنه كرن، ئه‌ڤه‌ژی پشكه‌كه ژ پرۆژێ هه‌یڤا هه‌فت یا سالا بۆری بۆ رزگاربووییێن ژ ده‌ستێ داعش و ژماره‌یه‌كا رزگاربوویان دێ مفادار بن.
سه‌عید جردۆ، دیار ژی كر: سه‌رۆكێ حكومه‌تا هه‌رێما كوردستانێ رێزدار مه‌سرور بارزانی بریار یا ئیمزاكری، بۆ سالا نوو یا خواندنێ دێ ئێته جێبه‌جێكرن، ئه‌ڤه‌ژی بوویه جهێ دلخۆشیا رزگاربوویان و ب ڤێ بریارێ دلخۆشن، ڕێزدار مه‌سرور بارزانی سه‌رۆكێ حكومه‌تا هه‌رێما كوردستانێ ئه‌وا د شیانێن جه‌نابێ وی دابت درێغیێ نه‌كریه و خزمه‌تا ئێزدیان و رزگاربوویان دكه‌ت، مینحه‌یا هه‌یڤانه بۆ رزگاربوویان به‌رده‌وام دئێنه دابین كرن و كه‌ناله‌كی ئاسمانی ژی ب ناڤێ سه‌ما بۆ كوردێن ئێزدی ڤه‌كریه و ل هه‌موو ده‌ڤه‌رێن ئێزدیان خزمه‌ته‌كا مه‌زن پێشكێش كریه، ئه‌ڤه جهێ رێز و سوپاسیێ یه.
تُتاح هذه الصورة أيضا في: کوردی
