تۆرا لالش
ئیرۆ ل رێكه‌فتی 6/11/2025ێ، ل باره‌گایێ بنگه‌هێ لالش ل دهۆكێ و د چارچۆڤێ بانگه‌شه‌یا هه‌لبژارتنان دا، ب ئاماده‌بوونا كه‌سایه‌تیێن حكومی و حزبی و كۆمه‌لایه‌تی و كۆمه‌كا بژاره ژ ئه‌كاديمى، ماقوول و مامۆستا و ڕه‌وشه‌نبيرێن ئێزديان و سه‌رۆك و ئه‌ندام و لایه‌نگرێن بنگه‌هێ لالش یێ ره‌وشه‌نبیری و كۆمه‌لایه‌تی و د.فارس ئه‌لیاس كتی به‌ربژێرێ ژماره 14 ل سه‌ر لیستا 275 یا پارتی دیموكراتی كوردستان، بنگه‌هێ لالش پشته‌ڤانیا خۆ بۆ به‌ربژارێ ناڤبری دووپاتكر.
ل ده‌ستپێكێ ئه‌ندامێ ده‌سته‌یا بلندا بنگه‌هێ لالش خێرێ ئیبراهیم كورو ده‌ست ب ڕێڤه‌برنا ڕێ و ره‌سمێن داناسینا د.فارس كتی كر و هه‌روه‌سان ل دووڤدا وه‌ك ڕێزگرتن ل سه‌ر گيانێ پاكێ جانگۆريێن كوردستانێ سه‌روه‌رێ وان بارزانيێ نه‌مر و كاك ئه‌دريسێ جوانه مه‌رگ ئاماده‌بوويى خۆله‌كه‌كێ سه‌كنين.
دووڤدا به‌رێز سه‌عید جردۆ سه‌رۆكێ بنگه‌هێ په‌یڤه‌ك پێشكێشكر و گۆت: ئاماده‌بوویێن هێژا هوون بخێرهاتن و سه‌رچاڤان و هه‌لبژارتنێن 2025ێ یێن ئه‌نجومه‌نێ نونه‌رێن عیراقێ نێزیك دبن و پێتڤیه ئێزدی ب گه‌رم و گوریه‌كا مه‌زن ڤه پشكداریه‌كا كاره د هه‌لبژارتنان دا بكه‌ن و هه‌موو به‌ربژارێن پارتی رێزدارن و خودان سه‌ربۆرن، داخواز دكه‌م ده‌نگێ خۆ بده‌نه د.فارس كتی ئه‌ندامێ بنگه‌هێ لالش و به‌ربژارێ ژماره 14 ل سه‌ر لیستا 275 یا پارتی دیموكراتی كوردستان، ژبه‌ركو ناڤهاتی هه‌موو ده‌رگه‌هـ ژ بۆ دۆزا ئێزدیان قوتاینه و خزمه‌ت كریه و خودان سه‌ربۆره.
گۆتژی: بهێزبوونا پارتی بهێزبوونا هه‌موو پێكهاتێن كوردستانێ یه، ژبه‌ركو پارتی ب رێیا ده‌ستوری به‌ره‌ڤانیێ ژ هه‌موویان دكه‌ت ب تایبه‌ت ئێزدیان، هه‌روه‌سان فه‌ره ل په‌ی چالنچا هه‌ردوو جێگرێن پارتی دیموكراتی كوردستان رێزداران مه‌سرور بارزانی و نێچیرڤان بارزانی بچین و پارتا مه ئێك ملێون ده‌نگان ب ده‌ستخۆڤه بینت، ژ به‌ركو سه‌رخستنا لیستا پارتی سه‌رخستنا هه‌موو پێكهاته‌یانه و ئازادیا ڕاده‌ربرینێ بهێز دكه‌ت.
دووڤدا د. فارس ئه‌لیاس كتی به‌ربژارێ ژماره 14 ل سه‌ر لیستا 275 یا پارتی دیموكراتی كوردستان په‌یڤه‌ك پێشكێشكر و گۆت: هه‌ڤال و دۆست و ئه‌ندام و نونه‌رێن هه‌موو تایی و نڤیسینگه‌هێن بنگه‌هێ لالش و پشته‌ڤانێن هێژا هوون بخێرهاتن و سه‌رچاڤان و سوپاس بۆ حازربوونا وه‌یێن هێژا، ژ دل سوپاسیا هه‌موو خه‌لكێ خۆ و نوونه‌رێن تای و نڤیسینگه‌هێن بنگه‌هێ لالش دكه‌م ژبه‌ركو مال ب مال ل سنوورێ ده‌ڤه‌رێن خۆ دگه‌ل من دا بوون و بۆ پشته‌ڤانیا من و لیستا پارتی بۆ هه‌لبژارتنێن ئه‌نجومه‌نێ نوونه‌رێن عیراقێ یێن 2025ێ دكرن.
گۆتژی: پشتی ژناڤچۆنا رژێما به‌عس یا ژناڤچۆیی ل سالا 2003ێ، ل سالا 2005 پشكه‌ك ژ پێكهاته‌یێن پارێزگه‌ها موسل ئاماده نه‌بوون پشكداریێ د هه‌لبژارتنان دا بكه‌ن و ده‌نگێ خۆ ب ده‌نه ده‌ستووری لێ ب خۆشبه‌ختانه سه‌رۆك بارزانی گۆته ئێزدیان پشكداریێ بكه‌ن و ده‌نگێ خۆ بده‌نه ده‌ستوری و سه‌ره‌نجام ئێزدیان 93% ب ده‌نگێ به‌لێ ده‌نگێ خۆ دان، ئه‌ڤێ جارێ سه‌رۆك بارزانی ته‌كه‌ز كریه خۆلا شه‌شێ یا په‌رله‌مانێ عیراقێ دێ خۆلا جێبه‌جێكرنا ده‌ستووری بت، له‌وران داخواز دكه‌م ده‌نگێ خۆ ب ده‌نه من و دێ بمه جهێ باوه‌ریا وه ل په‌رله‌مانێ عیراقێ، هێژایان د خۆلێن بۆری دا فراكسیۆنێن كوردستانی ب هه‌موو هێز و هه‌ولێن خۆ كارین ب پرۆژه هه‌له‌بچه ببته پارێزگه‌هـ، ئه‌ز سۆزێ دده‌م هه‌گه‌ر بوومه جهێ باوه‌ریا وه و چۆمه په‌رله‌مانی كار ل سه‌ر پرۆژێ پارێزگه‌هكرنا شنگالێ بكه‌م ژبه‌ركو نهۆ شنگال ب سه‌ر مووسل ڤه‌یه لێ ب مخابنی ڤه ژ هه‌موو ئالیان ڤه هاتیه پشتگۆهـ هاڤێتن ژوانژی قه‌ره‌بووكرنا زیانپێكه‌فتیان و رزگاربوویان و خزمه‌تكوزاریان..هتد.
هه‌ر د.فارس ئه‌لیاس كتی به‌ربژێرێ ژماره 14 ل سه‌ر لیستا 275 یا پارتی دیموكراتی كوردستان دیار ژی كر: دگه‌ل فراكسیۆنا خۆ و هه‌موو فراكسیۆنان دێ كار ل سه‌ر جێبه‌جێكرنا رێككه‌فتنا شنگالێ و كێشه‌یا مووچه‌یێن فه‌رمانبه‌رێن كوردستانێ كه‌م، هه‌روه‌سان دێ كار ل سه‌ر دانپێدانا كۆمكووژیا ئێزدیان كه‌م ل په‌رله‌مانی.
ل داویێ گۆت: بنگه‌هێ لالش سه‌ركردان ئاڤادكه‌ت له‌وران هه‌گه‌ر بوومه جهێ باوه‌ریا خه‌لكێ خۆ ب هه‌مان دید و كار و به‌رنامه دێ خزمه‌تا خه‌لكێ خۆ و هه‌روه‌سان هه‌موو پێكهاته‌یان كه‌م بێ جیاوازی، چنكو ئه‌ڤه فه‌لسه‌فه‌یا پارتی دیموكراتی كوردستان و ئاینێ مه‌یه، له‌وران ده‌نگێ خۆ بده‌نه ژمارا من 14 و لیستا 275 یا پارتی دیموكراتی كوردستان ل سنوورێ پارێزگه‌ها موسل.
تُتاح هذه الصورة أيضا في: کوردی
