تێ زانین دچارچووڤێ چالاکیێن خۆ دا و دڕێوره‌سمه‌كا ژ هه‌ژى دا، ب هەڤکاری ل گەڵ دەزگەهێ‌ خێرخوازیێ‌ بارزانی، بنگەهێ لالش یێ ڕەوشەنبیری و کۆمەڵایەتی، ل رێكه‌فتی رۆژا ئینیێ 23/گولانا/2025ێ ل گوندێ ئاڤدەلان ل ده‌ڤه‌را بارزان خیڤەتگەها گەشەپێدانا مرۆڤی ده‌ستپێكر و ل رێكه‌فتی 27/گولانا/2025ێ دێ ب داوی ئێت. 

تێ زانین 66 دەرچوو و قوتابیێن ئێزدی یێن زانكۆ و په‌یمانگه‌هان كو نیڤ ژ وان ژ ره‌گه‌زێ مێ نه‌ و نیڤ ژ ره‌گه‌زێ نێرن د پشكدارن هێژایێ گۆتنێ یه‌ كو ب رێیا تای و نڤیسینگه‌هێن بنگه‌هێ لالش ناڤێن وان هاتینه‌ وه‌رگرتن.

 تێ زانین د پلانا خیڤه‌تگه‌هێ دا چه‌ندين برگه‌ و چالاكيێن ڕه‌وشه‌نبيرى و جڤاكى و ده‌روونى و زانستى و چاوانیا سه‌ركردایه‌تیكرنێ و گه‌شتێن زانستى دئێنه‌ ئه‌نجام دان.

پشكدار د كه‌شه‌كێ دلڤه‌كه‌ر دانه‌ و دلخۆشيا خۆ ده‌ر‌برن و سوپاسیا بنگەهێ لالش دەزگەهێ خێرخوازیێ بارزانی دكه‌ن و هه‌روه‌سان هێژایی گۆتنێ یه‌ تا نۆكه‌ سه‌ره‌دانا مه‌زارێ نه‌مران مه‌لا مسته‌فا بارزانی و كاك ئه‌دریسێ هه‌رده‌م ساخ و مۆنۆمێنتا بارزانیێن جینۆسایدكری ل بارزان كرینه‌، و هه‌روه‌سان د پلان دایه‌ سه‌ره‌دانا گوندێ بێدیالێ یێ مه‌سیحیان ل ده‌ڤه‌را بارزان ب كه‌ن داكو زێده‌تر ئاشنایا پێكڤه‌ژیانا وێ ده‌ڤه‌رێ ب بن و هه‌روه‌سان دێ سه‌ره‌دانا شكه‌فتا شانه‌ده‌ر ژی كه‌ن، زێده‌باری چه‌ندین وانه‌ و سمینار و روونشتنێن ڤه‌كری ل دۆر ئاینی و نشتیمانی و ره‌وشه‌نبیری و چاوانیا سه‌ركردایه‌تیكرنێ.

ل دووڤ به‌رنامێ هاتىه‌ ئاماده‌كرن ڕۆژانه‌ 17 ده‌مژمێران ژ 5ى سبێ تا 10ى ب شه‌ڤێ ده‌ست ب ئه‌نجامدانا به‌رنامێ خيڤه‌تگه‌هێ بۆ به‌شداران دهاته‌ كرن و ئێك ژ به‌رنامان هه‌ر رۆژ ل ده‌مژمێر 5ی به‌رێ سبێ پشكدار بۆ پشتی ژ خه‌و رادبن وه‌رزشا سبێ دكه‌ن و ئالایێ كوردستانێ بلند دكه‌ن و دووڤدا پرۆگرام ده‌ستپێدكه‌ت و هه‌روه‌سان شه‌ڤێ ژی پشتی ژ گه‌شتێن زانستی ڤه‌دگه‌رن به‌ریكانێن زانستی دهێنه‌ ئه‌نجام دان و موزیك ژی دئێته‌ ژه‌نین.